O soo se faamoemoe e lelei lona mafuaaga, lelei le loto e fai ai, maualuga lona tapenaina ma fai i le loto fiafia, o se faamoemoe sili lea ona faamalieina ma manuia lona taunuuga.
O le vaiaso na tea nei na lipotia ai i le Samoa Times le tala i le alii talavou mai le afioaga o Satitoa Aleipata o Ben Leia, lea o loo taoto nei ua leai sona faamoemoe, ona ua pe atoa le itu i lalo o lona tino talu ona faamanualia i le taaloga o le Lakapi mai le Kalapu a Malisi i Apia. Peitai na faato‘ā logo ai tulimanu e fa o Niu Sila i lea tala faanoanoa, ina ua faaali i luga o le Polokalame a le TV3 le Campbell Live i le po o le Aso Tofi na tea nei, lea na faatalanoa faapitoa ai e John Campbell le Kapeteni o le All Blacks ia Richie McCaw.
O lea lava faatalanoaga na faalauiloa ai se faamoemoe i se Tauofoga poo se Faatautui (auction) auā se seleni mo le lumanai o lea alii taalo Samoa, lea na faataunuuina i le po o le Aso Faraile na tea nei i Eden Park.
Sa iai foi se numera na faailoa ai i luga o le TV e faaaogā mo feau i telefoni feaveai (txt messages), e tusa lona tau ma le $3 e ofoina mo lea lava faamoemoe, lea na faailoa e Jonh Campbell i le Aso Faraile e uma ane le lua itula, ua 16 afe txt ua mafai ona mauaina ona o le lagolago a le atunuu ma maimoa ma ootia lagona, aemaise ina ua faaalia ata na pueina mai falemai ma le aiga o Ben Leia i Samoa.
O le faamoemoe la i le Aso Faraile, sa faaigoaina o le Black Friday Sponsor, ai ona ua pa‘ū tonu le aso o le faamoemoe i le Friday 13th. O le fofoga o le po o le alo lauiloa o Samoa i faasalalauga i Niu Sila nei le alii o Oscar Knightly, ma sa matuā matauina le sili atu ma le fitu selau tagata lauiloa i taaloga, e lē gata i le taimi nei ae faapea foi aso ua tuanai, faapea i le au faipisinisi ma le atunuu, sa faaalia le lagolago ina ua faatumulia ai le nofoaga i Eden Park.
O se afiafi felanulanuai, e lē gata ia i latou na auai, a o lagona foi o le po i le tulaga maualuga o soo se tapenaga, na maua ai foi le loimata maligi ina ua toe faaali ata mai Samoa i le tulaga maualalo ma le taufaasoa o le aiga o le alii o Ben, aemaise o le molimau faamomoiloto a John Campbell ina ua malaga i Samoa ma feiloai ma Ben Leia ma lona aiga.
Na faapea foi le lagona o le fia Falealii, ina ua faaalia le loto Kiwi o alii papae, ma le lotonuu o tamafanau tautaua o Samoa i taaloga.
O se tasi o itu mataina o le afiafi, o le Lauga faatamalii a le susuga a le Kapeteni Richie McCaw, aemaise o lona ta‘ua o le taimi na maua ai le tala ma valaau i Samoa e fia talanoa i le alii o Ben, fai mai McCaw o aga lava ia faataitai (Leader), e tatau ona taulamua i soo se mea lelei.
E $94 afe le seleni lava ia na maua i lea afiafi, e lē gata i le ulufale e $150 i le Pepa, a o le tele o oloa taugata na pei e tafefea i le vai i le vave o le alu i le faatautui. O nisi o oloa taugata na maofa ai le loto, o le Pepa Malaga fua (Business Class) e maimoa ai i le taaloga a le All Blacks ma Egelani ia Novema i Peretania, lea na alu i le $22 afe, o le jersey ma le polo Olopeleki 2010 na alu i le $10 afe, faapena foi le ofu tamoe o le alii Jamaica saoasaoa ia Usain Bolt ua uma ona iai le saini, na alu foi i le $10 afe, o le Pepa e maimoa ai i le taaloga a NZ ma Tonga lea e tatala ai le Ipu o le Lalolagi i le tausaga fou na alu i le $11 afe, e $5 afe le ofo mo le avea ma malo a Murray Deaker i le Polokalame o Taaloga a le Sky TV, ma le Siva Samoa a le taupou lea o Maria Tutaia e $4,500, faapea ai ma le anoano o le mau oloa na tiga le taugata ae lei foi ai le au fai Pine.
O le Afioga i le Konesula o Samoa ia Faolotoi Reupena Pogi na fai ma sui o Samoa na potopoto e molimoli le agaga faafetai ma le loto faamalieina i lea afiafi ina ua mae‘a le faamoemoe. Pei lava ona silafia o loo feagai le All Blacks ma le Taamilosaga o le Tafatolu, ma o le 4am i le vaveao lava lea e faamoemoe e tuuvaa ai mo Aferika, peitai na faato‘ā tuua lava le fale e le susuga a Ghram Henry ma le au atoa ina ua mae‘a, o le isi lea tulaga maualuga o le afiafi ona ua milo tauau uma tagata ma le au atoa a le All Blacks, aemaise e tele ina na o le vaai i le TV ae lē faatalofa i ai.
E faafetaia le lagolago malosi a le New Zealand Rugby Players Association (NZRPA), le Orbit faapea le New Zealand Spinal Trust, sa mafai ona faatau mai i ai le manaoga o le afioga a le Peresitene o Malisi ia Su‘a Faafouina Su‘a, le susuga i le faiaoga ia Muliagatele Brian Lima ma le Pulega a Malisi Samoa, lea ua taunuu ma le manuia ai le faamoemoe mo le alii o Ben.
O le $280 afe lea na faalauiloa i lea afiafi, ua faafāina ai le seleni na faamoemoe ai le Komiti o tapenaga e sailia se $75 afe mo le manaoga. Ma o le a faasoasoa atu iinei lea seleni tele mo le tausiaina o mafatiaga o lea talavou, ma ono faamanuiaina ai lona aiga atoa i Samoa.
