Aisea ua faamavae ai le Tausala o Samoa?

Ua talia e le Pulega o Tagata Tafafao le faamavaega faafuasei ma faanatinati a le tamaitai sa manumalo i le tauvaga o le Tausala o Samoa na faia i le masina o Setema 2009 na taualuga i ai le Teuila, o Jacinta Bourne.
O le Aso Gafua, aso 9 Novema 2009 na maua ai e le Pule Sili o le pulega o tagata tafafao le Afioga Matatamalii Sonnja Hunter, le tusi faamavae.
E iai le talitonuga e lei iai ma se silafia o le pulega a mea o le a iai se tulaga faapea o le a oo i ai, ae toe o se vaiaso faatino le tauvaga o le Tausala o le Pasefika o le a talimalo ai Fiti. Peitai o le Aso Gafua na oo atu ai le tusi faamavae a Jacinta, na ia maua ai foi ma le tusi mai le Pule Sili ua talia lana faamavaega.
Sa momoli ai foi ma moomooga ma le faafetai tele i nai masina sa avea ai o ia ma Tausala o le atunuu. E tele faamatalaga salalau solo ma ualesi mosooi ua laumanuia ai le mau mafuaaga eseese o le faamavaega.
O le salalau solo foi o ia tala salatua e mafua ona o le faafuasei ona faamavae le Tausala.
Peitai na maua le avanoa i le tamaitai Pule Sili o le Pulega o Tagata Tafafao le afioga Matatamalii Sonnja Hunter ma tuusao loa i ai se fesili poo a lava ni mafuaaga ogaoga ua faamavae ai le Tausala o Samoa.
“O mafuaaga lava tau i le tamaitai poo personal reasons, ma e leai se malosi o se isi e taofiofi ai pe afai o lona lea manao”, o le tali mai lea a le Pule Sili.
O Jacinta Bourne na manumalo o loo aoga i le Iunivesite Aoao a Samoa sa ave ai ni ana mataupu tau i pisinisi. O ia o se tamaitai e tausaafia ona uiga i totonu o lona nuu o Leauvaa faapea lona aiga.
O lona faamavae mai ua see atu ai le Tausala Samoa mai Amerika na tulaga lua na te faaauauina le tofi ma faaee foi i ai ma le pale. O le tamaitai o Tuisaleia Hope Pomele (silasila ile ata) e alaala mau i Amerikka i le aai o Utah lea sa filifilia mai ai e fai ma sui o tagata Samoa o aumau ma nonofo ai i le tauvaga o le sailia o se Tausala o le atunuu.
Faaalia e le Pule sili o le Pulega o Tagata Tafafao, o le Aso Faraile13 o Novema 2009 na taunuu ai i Samoa Tuisaleia mo le tauaveina o tiute o le Tausala o Samoa.
Ua lua a‘i tausala mai Amerika ua faapaleina i le tofi Tausala Samoa, lea sa muamua pale ai le tamaitai o Gwendolyn Pona Tua‘itanu.
O le tausaga fou 2010 i le vaitaimi o le Teuila o le a toe faia ai le tauvaga e sailia ai se tausala lalelei o le atunuu. E le fesiligia foi le tauva ai o tamaitai Samoa mai Niu Sila, Ausetalia ma Amerika faapea tamaitai talavou i Samoa.