Tali le taitaifono o le komiti a toeaina EFKS, Rev Ioritana Tanielu
Na matuā faateia le mafutaga lona lua a le ekalesia EFKS i Westmere, ina ua faafoi ane la latou taulaga tupe, sa saunia ma momoliina i le komiti sa faamaopoopoina faiga taulaga a le Matagluega Niu Sila i Matu.
O le faateia ma le ofo tele o se vaega o le ekalesia i Westmere, ona sa manatu ai ua leva ona oo ma faamauina le aofaiga o si a latou foi taumafaiga e pei ona masani ai. E ui ina itiiti, peitai ona pau o se mea ua mafai, ma ua tuu e le Atua i loto o tagata e foaiina mo lea foi taimi, e pei ona saunoa i ai le sui mai le vaega faitaulaga.
Peitai ina ua toe momoli ma faafoi ane le seleni, ua matuā fesiligia ai lava ma atili nenefu ai i mafaufauga ma finagalo o tagata lotu sa lafoina lea taulaga. E tele ni fesili ua tutupu a‘e, talu ai lea gaioiga ua faia e toeaiina o le matagaluega.
E lei iai se faamatalaga maumaututu ma le pogai sa faailoa ane e toeaiina, ua mafua ai ona lē talia, ae toe faafoi ane le seleni sa faitaulaga ai lea vaega o le aulotu. O le ala lea ua lē mautonu ai ma ua ausulusulu solo le mamalu o le au faitaulaga, ma tu‘i fesili lea mataupu.
E latalata i le lua tausaga o nofo ma moe ai pea i le komiti a toeaiina o le Matagaluega a Niu Sila i Matu, le taulaga tupe a le vaega na o ese mai i le ekalesia a Westmere EFKS.
O se taimi umi e lei oo lea taulaga tupe i totonu o faamaumauga a le komiti o taulaga, ma le fonotele a le Ekalesia Aoao i Samoa ma faitauina ai i lipoti ma le tala o le tupe e pei ona masani ai.
Pe aisea ua toe faafoi ane ai le taulaga?
Aisea ua umi ai ona nofo pea i toeaiina i Niu Sila le taulaga?
E iai se mea o faaletonu ai le taulaga sa tauaaoina?
Ua lē lava ea le taulaga i le itu tau i le fuainumera?
Aisea ua fai ai faapea i latou?
O fesili e pei ona faailoa, o fesili ia ua matuā manaomia ai lava se tali mai toeaiina o le matagaluega. E tasi lava le mafuaaga o loo laualuga, ma taulai i ai le silasila ma finagalo o tagata o lea foi itu. Ai ona o le tulaga ua vaeluaina ai, ma ua oo i le faamasinoga le mataupu a le aulotu i Westmere.
Manatua foi o loo taoto pea i le Faamasinoga se faaiuga ma le mataupu faalotoifale o le aulotu i Westmere. O le vaega lea na savavali ese ma le aulotu talu ai ina ua alia‘e se faafitauli tele tau tupe, sa aafia ai le faifeau o loo tausia le aulotu. O le vaega tonu lea e ona le taulaga tupe, lea na toe faafoi ane e lē talia.
Ona pau lea o le tulaga o loo talitonu i ai le mamalu o lea itu o le ekalesia, ma ua matuā masalomia o le mafuaga tonu lea ua teena ai la latou taumafaiga.
O loo iai foi se isi lagona e faapea, masalo o le laititi o le fuainumera, ua talea ai le taulaga, ma atonu foi ua lē manaomia lea fesoasoani atu seleni.
Na fiu le Samoa Times e tau faatoatoa le loto tiga ma finagalo lē faamalieina o sui na faaoo maia le lipoti, aemaise ai o nisi o le aulotu sa talanoa i ai e uiga lava i le mataupu.
O le oo mai o lea foi tala i le Samoa Times, sa taumafai ai pea ina ia faia i ai se suesuega agai i finagalo o toeaiina ona e manatu lava i le ava fatafata ma le va fealoaloai, ma ia lipotia pea le mea moni ma le tonu.
O le feiloaiga ma le toeaina Rev Ioritana Tanielu, o le taitaifono o le komiti a toeaiina i Niu Sila, faapea foi le komiti a toeaiina o le Ekalesia Aoao, sa ia faaalia manino ai vaega uma sa silasila i ai a o lei faia faaiuga i mataupu e pei ona lipotia e tagata lotu.
E lei faigofie i le toeaina ona tali mai, ona talu ai o mataupu faapea, ua mae‘a lava ona iai aiaiga a le Ekalesia Aoao, ma e faaeteete tele i ai ma faaaloalogia. Peitai o le faatauanau pea ma le naunau atu ina ia maua se malamalamaga, na talia ai ma ioe le toeaina mo le faaalia o se finagalo agai i vaega e pei ona faatulai mai.
Le va o le tofi toeaina ma le Ekalesia Aoao
E tele itu sa faafaigata ai se saunoaga ma le faaleoina o le finagalo o le toeaina, peitai sa taumafai lava ina ia fesoasoani mai pea i le mataupu e pei ona fesiligia ai. E tele lona faaeteetega ma lona manumanu i le tulaga o mataupu faapea i le va ma le Ekalesia, o le ala foi lea e lē faigofie ai ona auiliiliina sona finagalo e uiga i faaiuga ma faiga faavae a le Ekalesia.
Saunoa manino Ioritana, o le mea sili ona faigata o le mulimulitai o se taitai i faiga faavae, ma iugafono a le Ekalesia Aoao.
O lona finagalo sa ia ta‘ua ai, o ia atoa ma le komiti a toeaiina, o le latou lea matafaioi o le tausisia pea ma silasila toto‘a i le faia o faaiuga, ina ia mautinoa o loo ogatasi, ma laina tutusa ma le tulaga o loo aiaia ma faatulagaina mai i faavae o le ekalesia.
O toeaiina foi sa faia ma faavaeina tulafono ma aiaiga, o ni auauna atamamai foi ma le faaaogāina e le Atua. O latou foi sa silasila toto‘a ma faatulagaina vaega uma ina ia faamalieina le finagalo o le Atua, ma ia faafeiloaia foi manaoga o taitai ma tagata lotu taitoatasi.
E ao la ina silafia e tagata lotu, o lona taitai ma le komiti a toeaiina, o loo faatinoina faaiuga, ae o loo mulimulitai pea lava i faavae ua mae‘a ona pasia ma faataoto mai i le tele o tausaga ua tuanai i le maliliega a le fono. O le latou tiute lea, o le faataunuuina ma leoleoina lelei ia faaiuga ma meatotino a le Ekalesia Aoao.
Mafuaaga o le toe faafoi o le taulaga a se vaega o le ekalesia Westmere
E ao ina manatua e le vaega ua toe faafoi atu i ai le latou taulaga, o le taimi nei e lē o toe iai se piitaga ma le Matagaluega a Niu Sila. O le uiga o lea faamatalaga, o latou na tulai ese ma o ese mai le ekalesia i Westmere. Sa taumafai pea e fai i ai se galuega ina ia toe foi mai ma matou galulue faatasi. Peitai ua lē mafai, ma o loo tumau pea i lo latou finagalo e pei ona tuua ai ma o ese.
O le latou la lea faitalia, ma le latou aiā tatau ua o ese ai. Afai foi la ua lē toe foi mai e tusa ma le galuega faataitai sa fautuaina ai e toe foi mai, ua faigata tele la ona talitonuina a latou galuega o loo faatino.
E pei foi la o le taulaga na tuuina mai, ua matou malilie faatasi ina ia toe foi ia i latou le taulaga.
Ona e lē o toe iai sa matou aiā ma se matou pulega faataitai, faa-Matagaluega e toe faamalosia ai i latou. Ua o ese, o lona uiga ua pulea lava e i latou a latou lava fuafuaga. Aisea o le a matou toe taliaina ai le taulaga, ae lē o taliaiina le fautuaga ma le tuualalo sa fai atu i ai.
O le mafuaaga moni lava lena ua matou lē talia ai la latou taulaga e pei ona tuuina mai.
E lē mafia, lē mafai ona matou taliaina se taulaga, pe afai o loo tetee pea ma lē fia auai mai i lalo o le taitaiga a toeaiina o le matagaluega ma le ekalesia.
E manino lava le mafuaaga na mafua ai lea faaiuga, e tatau foi ona malamalama i ai tagata lotu ma i latou e ona le mataupu. O le o ese mai i le aulotu, o lona uiga ua lē toe faaaogāina foi. Peitai o loo telē le avanoa e agai ai e toe faatu se isi galuega pe a finagalo ai.
O le latou lea aiā tatau e lē o taofia, afai foi e lē o fia auai i lalo o la‘u taitaiga, e leai foi se afaina o lena itu, ae ia malamalama lelei i le mafuaaga o le faia o faaiuga faapea.
Afai ua o ese ma Westmere, e lē o toe taua foi o se aulotu a Westmere, ma e lē tatau foi ona latou toe faaaogāina le igoa Westmere mo soo se fuafuaga. Aua e lē o toe tautua ma auauna ai i lalo o le faifeau o loo iai nei a Westmere.
O nai vaega ia o loo faatautaia ai a matou faaiuga, o loo sosolo lava i faavae ma tulafono autū a le Ekalesia Aoao, e ao ina manino ma malamalama lelei mo le silafia.
Le mataupu e uiga i le toeaina Malolo Manumalo Lisale Tu
O Lisale Tu, sa matou vaavaai lava pea i ai, ma ua matou fesiligia foi lona faamaoni e tusa ai ma aiaiga ma tulafono faavae a le Ekalesia Aoao. Ua leva ona malolo mai, peitai ua alu ai foi i le vaega o loo tetee mai i le ekalesia ma ana faaiuga ma faiga faavae.
E lē o toe lotu mai, ma ua lē toe vaaia foi i le tele o faatasiga ma mafutaga.
O le faaiuga i le penisione a le ekalesia, e iai foi ona aiaiga masani. E tatau ona mulimulitai pea i ai ma tausisi i ai soo se tasi lava e malolo penisione.
O ona aiaiga e tatau ona lotu pea ma auai i soo se faamoemoe. Ia lagolago pea e aunoa ma le tetee i soo se faaiuga.
O taiala ia ua leva ona faataoto ai le mataupu i penisione.
E lei faia la i ai sa matou faaiuga, peitai ua na o se fesili ua tuuina atu i Samoa, pe faapefea tagata faapea.
O le ā se faaiuga e faia i ai, ona talu ai ua lē lagolago, ma ua tetee foi i le ekalesia, e ala lea i le auai i le vaega o loo teena le ekalesia ma ana fuafuaga fai.
Auā o le matou lea vaai ia Lisale ma lona auai i Niu Sila nei.
O le taimi nei, o loo matala pea le faitotoa mo lea foi vaega, ina ia omai ma talanoa mai, peitai e lē o toe omai ma fesootai mai. O le mafuaaga foi lea o le faia ai pea o faaiuga e fuafua i le tulaga o faiga faavae, ma e lē taofia ai ona o manatu o tagata. A o le galuega fesoasoani lava latou ia, e faia pea, ma e tatala pea lava le faitotoa mo soo se tasi.
O le tali mai lea a le toeaina Rev Ioritana Tanielu, o le taitaifono komiti a toeaiina Niu Sila i Matu, ma le Ekalesia Aoao.
Ae ui ina manino ma malamalama le folasaga ma le finagalo o le toeaina ia Ioritana Tanielu, peitai o loo mautinoa e tusa ai ma molimau. Peitai talofa, e lē o malu le faatautaiga ma le taitaiga, ona e foliga mai e lē o tutu faatasi le komiti a toeaiina a Samoa ma Niu Sila, i faaiuga fai ma ituaiga mataupu faapea. E lē gata i lea, ae foliga foi e lē o malu foi le pitolaau a le aufaigaluega galulue, ona o le liki solo o le mau faamatalaga.
O nisi faamatalaga sa tuuina mai e tagata lotu o le itu sa o ese mai i Westmere.
Sa latou ta‘ua ai le eseese o faamatalaga ma le faaliliuina e toeaiina o tulafono ma faiga faavae a le ekalesia. E mafua lea mau, ona e faapea sa latou fesiligia isi toeaiina, ma faifeau i Niu Sila faapea ma Samoa.
O le tali mai a i latou ua matuā eseese lava ma faaiuga ma faamatalaga o loo faamatuuina e le komiti a toeaiina i Niu Sila.
O se tulaga ua lē mautonu ai ma tagata lotu, poo fea tonu le sa‘o ma le tonu, a o fea foi o taoto ai le amiotonu e limataitaiina ai.
Ae ui i lea, e lei manatu e toe fia talanoaina ma e lei toe fia suesueina foi lea tulaga, ae ua taoto ai pea faapea i aao ma finagalo o toeaiina ma taitai, auā o le latou lea matafaioi, ma lo latou faamasinoina.
Tatou tatalo faatasi i le agaga o le Atua, faatasi ai ma le tofa faale-Atua aemaise o le tofa faatamalii, ina ia mafai ona fesoasoani i loto ma agaga o tagata, a ia sili ai lana taitaiga ma lana musumusuga i finagalo o taitai, ma toeaiina mo le faafoeina o le Sa o le Ekalesia, e toafimalie ai ma faalaugatasia ai tagutugutu o mauga ma vanu o le galuega, ae tatala le lagi ma to mai ai manuia mo lana fanau tapuai auā taeao ma le lumanai.
