A o laititi le tamaititi o Anesi, e iai lava taimi na te lagona ai le faanoanoa, ona o lana matau, e ese le tagi soo o si ona tina, le fafine o Roti.
Ona tuufesili ai pea lea o lona mafaufau, seia oo lava ina loto tele i se tasi aso e faaleo atu i lona tina, “Mama, aisea ea e tagi soo ai oe?” Fai mai le tali a Roti i si ana tama, “Ou te tagi leaga o au o le fafine.”
Na faanunumi le muaulu o le tamaititi, “Se Mama, ou te le malamalama i lau tala.” Ua aapa mai Roti ma fusi atu si ana tama, “Ioe Nesi, e le taitai ona e malamalama i ai.”
E lei faamalieina Anesi i le tali a lona tina, ona faapea lea, sei oo i se aso ona ia manatua lea e fesili i lona tamā, le tamaloa o Pita.
O le aso lea o loo fesoasoani Anesi e faasolo atu meafaigaluega i lona tama a o tau inisinia le latou taavale, na manatua ai loa e Anesi lana fesili.
“Oi Papa, aisea e tagi soo ai Mama?” E tali ane lava le tamaloa ma punou i totonu o le afi o le taavale, “Faiga a na o fafine. E nofo nofo a fetagisi e leai se mafuaaga tatau.”
E lei fiafia foi le tama i le tali a lona tamā, ae ua musu e fesili soo ona e foliga i lana vaai, e le o fia talanoa lona tama i lea taimi, o loo pisi i lana galuega. Ua manatu nei Anesi, ‘e sili ai pe a faataatia lenei fesili sei oo i se isi aso.’
Ua faasolo ae pea le matua o Anesi ma o se tama e ola finafinau ma le fiugofie e saili ma faamautinoa soo se mea e na te fia maua i ai se tali. I lea taimi atoa ua matua ae ai Anesi, o loo ia manatua pea lana fesili lea e lei faamalieina lava sona tali, ‘Pe aisea lava e fetagisi soo ai fafine.’
O Anesi foi o se tama e tausia ae i se aiga lotu, ma ua ia talitonu e pei ona aoaoina o ia e ona matua ma le faifeau, e taua tele le tatalo e talanoa i le Atua, e saili i ai mo se fesoasoani i soo se mea tatou te moomia ai se tali.
‘Oi, lea la ua ou iloa nei le tagata tonu lava na te aumaia ia te au se tali sao, e na o le Atua lava,’ ona amata loa lea o le tatalo faafesili a Anesi i le Atua i se tasi taeao.
Ua mafaufau le tama pe faapefea nei ona tali mai le Atua. Ua fiu Anesi e faatalitali se tali i lena taeao, ae leai lava.
Na oo i le po ona toe tatalo lea o Anesi a o lei moe, ma sa ia toe fesili ai foi i le Atua. “Le Atua e, e mafai ona e tau mai ia te au, pe aisea lava e tagi soo ai lou tina, ma isi foi fafine uma e masani ona ou vaai e fetagisi soo?”
Na uma le tatalo a Anesi ma taoto ifo loa e moe. Ai e lei atoa se sefululima minute talu ona gase le moe a le tama, ae amata loa sana miti malie, o loo ia faalogoina le siufofoga o le Atua lea o loo musumusu ane ia te ia:
“Anesi lou atalii, Ina ua ou faatoa faia lava le fafine, sa ou faia i se auala e sili ona faapitoa. Na ou faia ona tau‘au ia malolosi lelei, ina ia mafai ona ia tauave le mamafa o le lalolagi, ae i le taimi e tasi o ni tau‘au e malolosi ae malūlū lelei foi e lalago ane i ai le ulu o se tasi o loo moomia ni faamafanafanaga.”
“Sa ou tuuina foi i le loto o le fafine se malosi na te lavatia ai tiga o taimi e fanau mai ai ana fanau, ae ia malosi foi e onosaia uiga tetee o le a faaalia e lena fanau i le tele o taimi.
Anesi, sa ou tuu foi i le fafine se loto mausalī e mafai ai pea ona faaauau lana foluga i le olaga, e tusa lava po ua faamaamulu ma faavaivai isi tagata o le aiga; o le loto mausali foi lena e mafai ai ona ia tausia lona aiga i taimi o mai ma soo se vaivai e aunoa lava ma sona faaseā mai.
“Sa ou tuu foi i fafine le lagona magafagafa e alofa ai i lana fanau poo le a lava se mea e tulai mai, e tusa lava pe faafia ona faia e sana tama ni mea e tuia ai lona fatu i le tele o taimi. Anesi, sa ou tuu foi i le fafine le malosi e onosaia ai vaivaiga ma masei o lana tane. E te iloa atalii, ou te lei faia maoti ese le fafine mai le tamaloa.
Sa ou mafaufau e lelei pe a se‘i ese se ivi mai ivi o le tamaloa e amata fausia ai le tino o le fafine, ina ia mafai e le fafine ona ia toe puipuimalu i le fatu o lana tane.
“Sa ou foai foi i le fafine le atamai na te iloa ai, o se tane e lelei, o le a lē taitai ona ia faatiga atu ia te ia, ae o nisi foi taimi, e tofotofoina ai lona malosi ma lana filifiliga maumauai, ina ia tumau pea ona faamaoni e galulue faatasi ma lana tane.
Ae o le mea mulimuli lava na ou ave i le fafine, sa ou ave i ai loimata na te faaaogaina. O la‘u fuafuaga, e na o tina lava e iai le aia atoatoa na te faaaoga ai loimata na, i soo se taimi na te moomia ai.”
Oka se manaia o le faalogologo a Anesi i le la talatalanoa ma le Atua, seia oo ina ia toe faalogo tasi atu lava, “Ua e iloa la Anesi, e le aulelei se fafine ona o le mananaia o ni ona ofu ma ana teuga o fai, pe ona e manaia lona fuaitino, poo le sikaili o loo oti ma teu ai lona ulu.
O le lalelei moni lava o le fafine, e mafai ona e iloa atu i ona mata, aua o le faitotoa lea e ulufale ai se tasi ma iloa lelei mea o i totonu o lona loto, o le nofoaga tonu o loo faamautu ai lona alofa.”
Ua toe nofo ae i luga le tama o Anesi, ua mafaufau loloto i lana miti na fai ma le la talanoaga ma le Atua, ma ua fiafia lona loto o lea ua matua tali atoatoa mai e le Atua le fesili ua fia tausaga o ia tuufesili ai pea.