O le tafatolu o le pulega o le Malo faasino i le pulega poo le Executive, o le Palemene ma le Faamasinoga e le feaiaa’i. O lona uiga e tutoatasi faaiuga fai a le itutino e tasi.
A filifili ni faamasino mo le faamasinoga a le atunuu ua iai le komisi o galuega a le faamasinoga poo le Judiciary Commission e gafa ma le filifiliga, peitai talu ona tutoatasi Samoa i le tausaga e 1962, o lea faatoa tupu le ave i le Palemene e latou te faia se faaiuga o se faamasino le Pelesetene o le faamasinoga o fanua ma suafa.
“O se mea e le masani ai le mea lea, o le tulaga a ia e iai le komisi lea e gafa ma tofiga faale faamasinoga, pau a lona e oo loa i le faamutaina o se tofiga ae tapa e le o aafia le tulaga foi lele e tatau ona tuu mai i luga ona aumai loa lea i le Palemene, ma o iina e aiaina ai loa e le palemene se faaiuga mo se faamasino. E taua le mea lea e silafia ai e tagata e iai le supremacy (maualuga o le pule) a le Palemene”.
O se vaega lea o le finagalo o le Palemia susuga Tuilaepa L Sailele Malielegaoi, ina ua toe fesiligia i le mataupu ina ua pasia e le Palemene lana lafo faatu e talanoaina ai e le fono aoao faitulafono se faaiuga o le afioga Fepuleai Attila Ropati.
“E mafua mai le mea i le faapaleniina o le paoa le check and balance ae faasino foi i le tulaga o le tau fefaatauagai o itutino ia e tolu (Pulega o le Malo, Palemene, Faamasinoga)”. Na faaalia foi e le Palemia o le mafuaaga foi lea na faateia ai le toatele ina ua ia faatu le lafo i le tauaofiaga a le Palemene i le tausaga e 2016, na tofia ai se komisi suesue a le Palemene e silasila i tuuaiga faasaga i le faatinoga o galuega a le faamasinoga o fanua ma suafa.
E pei ona silafia o le lipoti ma fautuaga mai lea sailiiliga ua taoto ai ni suiga tetele i le toe faatulagaina o galuega a le faamasinoga o fanua ma suafa e pei ona iai se tulafono fou ua pasia e le Palemene.
I le suesueina e le fono aoao faitulafono o le mataupu i le faaiuga a le komisi o galuega a le faamasinoga e faamalolo le tumau le Pelesetene, ua faailoa e Tuilaepa sa noatia se finagalo o le kapeneta a avatu loa le mataupu ona faia loa o se faaiuga, ae ua faasee i se komiti a le palemene e silasila iai ona lipoti atu ai lea i le Palemene ma faia ai loa se iuga mulimuli.
O le mae’a o le talanoaina o le tala autu o le Tupe ua i luma nei o le Palemene pe a toe tauaofia i le aso 18 o Iuni o le a liliu ai loa le fono aoao faitulafono e tagofia le mataupu i le Pelesetene ma o le a saili se finagalo o faipule o le maota i se palota. E manaomia ai le lua vae tolu o nofoa e fulisia e faamalolo pe faaauau le tofiga o le Pelesetene.
