O lea faato‘ā oo mai i lo tatou ofisa i Samoa nei se lipoti faapea, o le a sauni le Ekalesia Katoliko e aveese se tasi o Mataaga o le taulaga o Apia, le Malumalu lea e i Mulivai a le Ekalesia. O se malumalu ua tele tausaga o avea foi ma mataaga o le taulaga o Apia.
E lei maua mai se tali i se suisooupu o le Ekalesia i lenei tulaga. Ae ua maua e a tatou lipoti, o le afiafi a taeao (Aso Lua, taimi Samoa) o le a faatautaia ai se sauniga, ma o le sauniga lea e faamautu ai loa ma le tala i lalo o le Malumalu tele lenei, ae e lē o mautinoa i le taimi lenei poo le ā se galuega ua fuafua mo lea itu o le fanua a le Ekalesia.
O le taimi lenei e tusa ma le miliona tala atoa le galuega toe faaleleia lea ua amata i autafa lava o le malumalu, le galuega lea o le Maota o le Fetu o le Moana, lea ua tala i lalo, ae o le pito i gatai o le Malumalu lea foi ua iai fuafuaga ina ia aveese ma e faapea mai lipoti, e ono see i fanua i tua atu o le malumalu i le taimi nei ia fale tetele.
E fesiligia pe aisea o le a see ese ai i tua lea nofoaga ua lauiloa ai foi lea itu o Apia, ae na pau lipoti ua oo mai, sa iai se feiloaiga a le Komiti o Tupe a le Ekalesia ma le taitaiga o le Ekalesia e faatatau i le fesuiaiga o fanua e aofia ai le nofoaga lenei o loo tu ai le Malumalu tele i Mulivai, ae ua faataatia nisi feutagaiga seia mae‘a le faiga palota.
Ae afai e moni lipoti ua oo mai faapea e see uma fale tetele e lua e aofia ai le Fetu o le Moana i tua atu o le Malumalu, e fesiligia la pe aisea o le a faaalu ai se seleni e tusa ma le miliona tala mo le toe fausia o le Fetu o le Moana ae o lea o loo iai fuafuaga e toe aveese uma foi i totonu o le tausaga lenei.
O fea o le a ave i ai le Malumalu tele lenei i Mulivai e lei faamautu mai, ae na iai se fuafuaga faapea o lea na tuu e tala i lalo ae ua iai nisi ua tetee ma ua fuafua nei e toe fausia atoa lava foliga nei o le malumalu pe a mae‘a fuafuaga o le aveesea ma lea itu o le taulaga.
E lei iai se fesootaiga ma Patele Spa Silva, le suisooupu o le Ekalesia e faatatau i lenei mataupu, peitai ona pau le tulaga mautu o loo vaaia nei o le galuega tele lea ua amata faatino i le Fetu o le Moana.
E faigata foi ona mafaufau i le aveese ai o le Malumalu lenei ona o loo lagomau ai le Taitai o le Ekalesia i Samoa nei, le afioga ia Katinale Pio Taofinuu i le pito i tai o le Malumalu, ae atonu e mae‘a le sauniga i le po a taeao, ua maua se faamaninoga o le galuega ma fuafuaga a le Ekalesia i lea nofoaga tele o le Ekalesia Katoliko Roma i Samoa.
O loo faagasolo lava foi fesuiaiga o fanua a le Malo ma le Ekalesia ia e i Taufusi, lea ua vaaia ai ua o ese nisi o aiga sa faapea ona nonofo ai i eleele faataufusi ia e i le ogatotonu o le taulaga.
Ua ofo i ai tinoitupe e tapena ese ai, ua faapea foi ona maua o latou fanua i fanua o le Ekalesia o loo i Moamoa, ma ua tele lava aiga ua talia lea tulaga ona e tetele atu tupe o loo maua e aiga ia nai i lo aiga ia e i Sogi ia na ave iai le ta‘i $10,000 e tapena ese ai o latou fale ma ua faamautu nei i Falelauniu.
O loo totogi lava foi fanua ia ua o latou maua i le Malo, ma le faamoemoe a mae‘a ona totogi ia fanua ona pulea lava lea e i latou o latou lava fanua.
Mo sui ua o ese mai i fanua o le Ekalesia Katoliko, ua maua le ta‘i $30,000 tala a le aiga, o lea ua ma‘oti i ai fanua ia ua ave i ai, ma e lē tau totogia ai se seleni i ia fanua ua faamatuu sa‘o atu e le Ekalesia e atia‘e ai i Moamoa.
