Tumau atu pea i le Atua poto e toatasi le viiga ma le faaneetaga, aua ua tatau ma onomea. O Ia lava e ona le malosi uma lava ua mafai ai foi ona tatou toe aulia mai lenei vaiaso fou o le amataga o feau ma galuega. E faamalo le soifua laulelei, malo le finafinau, malo foi le tautua atunuu.
O upu masani lava a le faisalamo, “Lou agaga e, ia e faamanu atu i le Alii, aua foi nei galo se mea e tasi o ana meaalofa”. O lē faamaloloina ou mai atoa uma, o lē malie ai lou loto i mea lelei, o lē faaolaina oe mai le tuugamau, o lē faafounina lou taulealea faapei o le aeto, atoa ai ma le tele anoanoai o ana meaalofa faasafua mai mo i tatou.
E le gata la Samoa i le tele o ana meaalofa ua faamanuia mai ai, a o le meaalofa sili e ao ona tatou faafetaia ai pea o Ia, ona o le saili mai lea ia te oe ma au le tagata na leiloa i le loloto o le agasala. Ua ia saunia ai le faaolataga tautele ina ia toe maua ai e i tatou le leleiga ma Ia.
Afai o loo e tulituli matai mai pea a tatou lomiga i lea vaiaso ma lea vaiaso, o lona uiga ua tatau nei ona e malamalama i lou tulaga ua e tulai mai ai, ina ua avea oe o se tasi o le aiga o le Atua. Manatua o le taimi lava tatou te talia ai le galuega faaola a Iesu Keriso na maliu ai i luga o le satauro, ua faapena foi ona suia ai lo tatou tulaga, ma ua suia ai foi ma lo tatou iuga. Fai mai le Tusi Paia o i tatou uma ua faapei o mamoe se ua taitasi le tagata ma agai atu i lona lava ala. Viia le Atua, ua ia faasino mai le ala e ao ona tatou savavali ai. O Ia foi na fetalai, “O au nei le ala, upu moni ma le ola, e le sao atu lava se tasi i le tama, sei vagana ua ui mai ia te au.”
O le avea o i tatou ma fanau a le Atua o se valaau sili ona maualuga lea. O au lava ia ou te matua faafetai aua e sili atu lou mitamita ua avea au ma atalii o le Atua, i lo le faapea ua avea au ma atalii o le tupu o Peretania poo Tonga poo fea lava. Ua ou iloa ma mautinoa e le taitai ona faatusalia manuia e maua e fanau a tupu o le lalolagi nei i manuia e maua mai i le avea ma atalii o le Tupu o tupu ma le Alii o alii.
Pei lava ona faailoa atu i le amataga, o le avea o tatou ma fanau a le Atua, ua faapena ona suia ai foi ma lo tatou tulaga. O i tatou sa ola i le pologa ma le agasala, ua faapena ona faasaolotoina ma tau amiotonuina e ala ia Iesu Keriso. O i tatou foi sa nofo sala ma ua tatau ona totogi le sala, ua faamagaloina ma fufulueseina e le toto o Iesu Keriso. Sa tatou ola i le mativa ma le lē tagolima, a ua faaoloaina ma faatamaoaigaina ona o Iesu Keriso. Sa teena foi i tatou, a ua taliaina ma ua iai le faaa‘ua‘u o Iesu Keriso. O i tatou foi sa inosia, a ua alofaina ona o Iesu Keriso. Sa tauleagaina a o lea ua tauleleia ona o le maliu o Iesu Keriso.
E taua tele le iloa lelei o le tulaga lea, ona e leai lava se eseesega o lea tulaga ma le tagata e taumafai e maua ni fesoasoani tau tupe poo se penefiti mai le malo ae lei ausia taiala ma tulafono moomia e pei o le aloaia faaletulafono o le nofomau poo le avea ma tagatanuu o le malo o Niu Sila. E le mafai ona tatou soifua i tua atu o taiala o le malo fou (malo o le Atua) faatasi ma lona tupu (Atua) ae manao ia maua manuia faaleagaga.e pei ona folafola mai mo i latou uma ua ausia faletulafono taiala o le malo o le Atua.
I le Tusi o 1 Peteru 2: 24”… O le na aveina e ia lava a tatou agasala i lona lava tino i luga i le laau, ina ia tetea i tatou ma agasala, tatou te nofo ai i le amiotonu, O ona faalavalava ua malolo ai outou.” O loo manino le tala a le tusi paia; na tauave e Iesu a tatou agasala i lona tino i luga o le satauro; ina ia tetea i tatou ma le agasala, ae nofo ai i le amiotonu. E le mafai ona nofo i tatou i le amiotonu sei vagana ua iai se teteaga ma le agasala. E le mafai foi na tatou talia faalavalava o Keriso tatou te malolo ai pe afai e le ola ma soifua i le amiotonu a Keriso.
E le tutusa le soifuaga e ola ai le tagata ua suia lona tulaga ona o Keriso ma le tagata o loo soifua pea i le agasala. O le soifuaga o le tagata ua suia lona tulaga e tatau ona soifua i le faatuatua i folafolaga a le Atua. E tatau foi ona savali e tusa ai ma taiala o le afioga a le Atua. O nisi o faataitaiga faigoefie o le usitaia o taiala e aofia aim ea nei mo se faataitaiga: Afai e totogi le lafoga e tatau ona totogi le lafoga ae aua le taumafai e fai nisi togafiti ina ia sao mai ai i le faia o le amiotonu e ala lea i le totogiina o le lafoga.
Afai o le galuega e amata i le valu, e tatau foi i le tagata ua suia lona tulaga ona amata i le valu ae le o le taunuu i le falefaigaluega i le sefulu ae tusi le valu. O le tasi lenei vaega ua lapelape ai le talalelei ma faigata ai i le toatele ona talia le faaolataga ona o le soifua felanulanuai o le toatele ua faigata ai ona iloa le mea moni.
Samoa e, ua faasaolotoina mai i tatou mai le pule a Satani e ala i le maliu o Iesu Keriso. O nei suiga sa lemafai i lo taua lava malosi ma lo tatou lava atamai peitai ua mafai ona o le alofa tunoa o le Keriso. Ia manatua o nei suiga e mafai lava ona tatou faataunuuina i le soifuaga nei e ala i le usitaia ma le gauai i tulafono ma taiala faaleagaga.
O lou silafia o lou tulaga o oe o le atalaii ma le afafine o Keriso e ala i le galuega maea a Keriso e saoloto mai oe mai lou taumafai e faamalie le toatele o tagata. Poo le a lava lou taumafai e faamalie le toatele e le mafai lava ona e faamalieina tagata uma. E faapena foi i galuega tatou te faia ona o le vaaiga ma faafiafia i tagata. O le mea moni e le mafai lava ona tatou faafiafiaina tagata uma. O le olaga suia o le soifua e faafiafia i le Atua a le o tagata. O le tatalo ia tatou maua se vaiaso manuia, avea lau auaunaga i soo se tulimanu o e galue ai o se viiga o le Atua, ae silisili ai ona ua e iloa ua suia lou tulaga mai le agasala ma ona aafiaga, ae ua avea nei oe o se afafine poo se atalii e faafiafia i lou Atua.
Ia manuia tele le vaiaso