O le vaiaso nei ua faamoemoe e faia ai toe sauniga o le tamā matua o Alesana Satele 69 tausaga o le soifua i lona aiga i Niu Sila. O ia e toalua iai tagata na maliliu fasia i se solitulafono ua molia ai se taulealea 24 tausaga o Falefa.
O le faalavelave na tupu i Leulumoega uta i le po o le Aso Tofi 22 o Novema 2018 e pei ona faamatalaina e leoleo vaaiga i le nofoaga na maua iai tino maliliu, o se vaaiga faafefe tagata. O le tuanai o aso talu ona tupu le faalavelave na faatino ai i le vaiaso ua mavae atu nei le ifoga i le aiga o le tamā o Alesana.
Ua faailoa e se tasi o le fanau a le tamā matua, o matai ma tagata o le afioaga o Falefa na latou faatino le ifoga i auala masani e tusa o tu ma aganuu faasamoa. O ie o le Malo o le pulou o le ola na faia ai le ifoga. O tupe ma ie o le Malo na foai e le nuu mo le aiga o Alesana i Leulumoega ina ua mae’a le ifoga.
E lei faailoaina lava e leoleo le mafuaaga o le faalavelave ae ua na’o se faamatalaga mai se leoleo sinia o loo lipotia i se lipoti e faapea o tupe sa umia e le tamā ua maliu na faaosooso ai lē ua molia e faia le gaioiga sa ia faaaoga ai se agaese. E faapea se molimau e lei maua le ato tupe a le tamā matua i le taimi na iloa ai le faalavelave ua tupu.
O loo iai foi se isi tala salatua e faapea sa iai se mea sa lē fiafia ai lē ua molia i lona taui mai lana galuega sa galue ai mo le aiga peitai e ui i ia tala salatua ua laumanu’ia solo agai i le pogai o le faalavelave, o loo faatalitali pea aiga oi laua ua maliliu i se taunuuga o suesuega a leoleo.
O le ifoga i tu ma aganuu a Samoa o se auala pito maualalo lea e uia e se tagata ua faia se agasala matuia, e saili ai se faamagaloga mai aiga o lē ua aafia le soifua i se gaioiga solitulafono. O aso ua mavae a alu se ifoga e lē faigofie mo i latou e malaga e faatino auā e leiloa pe tua ma ni ā. A talia ae umi se taimi e tootutuli ma ifo ai a’o ufi o latou ao i ietoga e lē mafai ona iloa ese isi. A lē talia foi o se tasi lea itu faigata.
O aso nei ua lē toe iai ni tulaga faapea e tutupu auā ua vave ona talia se ifoga ma faaulufale. O le tāua tele o lea vaega o a tatou tu ma aganuu ua amanaia ai i faaiuga fai a le faamasinoga ma ua maua ai le faamāmā avega mo se faasalaga o lē ua molia ma faamaonia sana solitulafono mamafa ma matuia.
