Agasala & Faaolataga

O Iesu le ala, upu moni & ola
Ioane 14:6 O Iesu lava na fetalai, “o a‘u nei le ala, ma le upu moni, ma le ola, e le alu atu lava se tasi i le tama, pe a le ui mai ia te au”
O le vaiaso talu ai na aoaoina ai i tatou e ala i le olaga faatuatua o tagata o le Atua. Na faapea ona faamalosia ai tatou e ala i le Salamo 46:1-O le Atua o lo tatou malu ia ma lo tatou malosi, e fai o ia ma fesoasonai silisili i puapuaga.
O le mea lea e le tatau ai ona tatou fefefe, pea tutupu mai faafitauli ma faigata i lo tatou siomaga, pe sousou foi le faigamalaga ma foliga mai ua leai so tatou faamoemoe. Fai mai le faisalamo, o le vaitafe e faafiafia ona magavai i le aai o le Atua, o le mea paia, o iai afioaga o le Silisili Ese.
O loo i totonu ia te ia le Atua, ma e le faagaeetia lava ia, aua e fesoasoani le Atua ia te ia i le vaveao.
Ua tuanai atu lena vaiaso o le ufitia ai o si o tatou atunuu i le puapuaga faalenatura na lamatia ai le soifua o le toatele o nisi e pele ia i tatou. Pau le mea e faafetai ai ona ua avea na o se vaega ae o loo tumau pea le toatele o tatou.
O le mea lea Samoa e ao ai lava ona tatou tau fai faafetai i le Atua, ona o lana pule faasoa mai pea i lea aso ma le aso. E leai lava se isi o tatou e fai loto, e le tatau foi ona tatou faameo i le Atua, aua poo le a lava le mea e oo mai, o le molimau a le Tusi Paia, e ao ona tatou fifilemu ma iloa “O ia lava o le Atua, e viia o Ia i nuu ese, e viia foi o Ia i le lalolagi atoa”. (Salamo 46:10)
A o faasolosolo pea ou mafaufauga ma manatunatu atili i le mea sa tulai mai, sa faafuasei ona peiseai ua toe faamanatu mai e le Atua ia te au le taua o la matou matafaioi – o le folafolaina o le upu a le Atua.
Pei lava ona tatou iloa, o le finagalo o le Atua ina ia le fano se tasi a ia maua uma e tagata le ola e faavavau. (Ioane 3:16) O le fesili ua tulai mai, Pe ana faapea o oe lea sa malaia i le faalavelave na tea atu nei, faamata sa e sauni e te lua fetaiai ma lou matai?
Talitonu Samoa o se fesili e le faigofie ona taliina, ae ou te manatu e ao ona e faatauaina lenei fesili, ona e leai se tasi o tatou e mafai ona alo ese i le malaga a le maliu ma le oti. Pe e te manao i ai pe leai, e iai lava le aso e te oti ai. O le mea lea e ao ona e faafetai ai i le Atua ua mafai ona e maua le avanoa e toe sauniuni ai ma tapena ai a o lei oo mai lea aso ia te oe.
Ou te faafetai foi au i le Atua aua o se fafagu lelei lenei mo au, aemaise lou aiga, o si au fanau faapea le ekalesia ua tuuina mai e le Atua e galue ai.
Ou te manatu foi e faamalosi atu i lou atunuu pele Samoa i lea lava fesili, ina ia aua nei o tatou ola faasamasamanoa ae ia tatou iloa e iai le mafuaaga na tuu ai i tatou e le Atua i lenei lalolagi. E ao ona e silafia, na faia i tatou mo lona viiga. Ae paga lea, o le molimau a le Tusi Paia, ua agasala tagata uma ma ua le oo atu ai i le viiga o le Atua.
O le agasala foi ua avea ma va pupuni ia i tatou ma le Atua. Ae faafetai, e ui lava ina o tatou agasala, ae ua saunia foi e le Atua le ala e toe maua ai le avanoa o le tagata e sao atu ai i lona mamalu.
O le mea lea Samoa le atunuu pele, ou te le mautinoa poo a auala o loo e talitonu e te sao atu ai i le manuia e faavavau pei ona folafola mai, ae tasi le mea ua ou mautinoa e ala i le aoao mai a le Tusi Paia, e avea ma faamalosi a le Taiala i lenei vaiaso, e faapea – Ioane 14:6, O Iesu lava na fetalai, “o a‘u nei le ala, ma le upu moni, ma le ola, e le alu atu lava se tasi i le tama, pe a le ui mai ia te au”.
Ioe Samoa, se Atua ina alofa lenei Atua tatou te auauna i ai, ua tuu avanoa mai ai pea ia i tatou ina ia tatou faia filifiliga mo le lelei ma le manuia. E leai se manatu e faamasino ia te oe ma lou soifua, o le galuega lena a le Atua, a o le augani a le Taiala, avea ia mea ua faapupula ai o tatou mata e le Atua e fai ma aoaoga ia i tatou.
Afai tatou te tagai ane i mea o loo tutupu mai i lenei vaitau, pesi mai o matagi ma afa, faamai eseese faapea tala o taua, mafuie ma lologa, faamata o le ā se lagona e oo ifo i lou loto i lou vaai atu i nei mea e tutupu mai? O le tala a le Tusi Paia, a tutupu nei mea ona outou iloa lea, ua latalata lo‘u toe afio mai.
Samoa e, vaai nei e tuai. E leai lava se isi auala e te maua ai le ola e faavavau, pei ona faamanatu atu le Taiala ia te oe i lenei vaiaso, “ua na o Iesu lava le ala, upu moni, ma le ola, e le alu atu lava se tasi i le tama, sei vagana ua ui atu ia te ia.”
O le fesili – e ui atu faapefea?
Ioe, e ao ona e talia o ia i lou loto, talia o ia e avea ma Alii ma Faaola ia te oe. O i tatou uma o tagata agasala ma e manaomia se faasaolotoga, e ao ona tatou talia le galuega laveai a Iesu i luga o le satauro e faasaolotoina ai tatou. Samoa e, e telē le eseesega o lou iloa o le Atua i lou mafaufau, ma lou taliaina o ia i lou loto ma soifua ai e tusa ma ona ala. Ioane 1:12, “Ao i latou uma e na talia o ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua.”
Samoa e, aisea tatou te saga faataliga tuli ai? O Iesu lava na fetalai “Faauta, ou te tu atu i le puipui ma tuitui atu, ai se tasi e faalogo mai i lou leo, ma tatala mai le puipui, ou te ulufale atu ia te ia, ma te tali sua foi ma ia, o ia foi ma au.”
Samoa e, filifili nei loa Iesu, Luka 19:10, “aua ua sau le atalii o le tagata, e saili ma faaola i le na le iloa.”
Manuia tele lenei vaiaso Samoa!