E faatalofa atu i le paia ma le mamalu o si o tatou atunuu Samoa. E amata mai lava i mauga tetele e oo ifo i mauga iti, ou te talitonu o loo iai le manuia o le Atua, mo i tatou uma i lenei vaiaso fou ua tatou aulia mai. Faamalo le galulue i faiva alofilima ua tofia ma valaau i ai i tatou e le Atua tatou te auauna ai.
E avea foi lenei avanoa e molimoli atu ai se faamanuiaga mai le taiala o le vaiaso mo tina uma o Samoa, mo le latou aso e pei ona sa faailogaina i le Aso Sa ua tuanai atu. O le mea moni, matou le salu atu i la outou galuega matagofie ma le taua i totonu o aiga, nuu, malo, Ekalesia ma faalapotopotoga. Faamalo le fautua lelei. Malo le sailimalo. Faamalo le onosai i luitau ma tiga ona o lo outou valaauina. O le tatalo a le taiala, ia aveaveai ai pea le faatauaina o outou i aso uma, ae aua na o se aso se tasi.
O loo faagasolo pea ona tatou aoaoina mataupu faavae o le olaga faa-Kerisiano ina ia faigofie ona malamalama ma manino i le uiga o upu a le aposetolo o Paulo i se taulealea sa saili e fia fau lona olaga i luga o le papa. (Silasila i le 2 Timoteo 3:16-17) I le vaiaso ua tuanai atu, sa tatou talanoaina ai le iuga poo le taui o le agasala e pei ona molimau mai le tusi o Roma mataupu e ono a o lona fuaiupu e luasefulutolu. “Aua o le oti o le taui lea o le agasala.”
E ui e matuia ma leaga le taunuuga o le agasala ma lona aafiaga i le mafutaga ma le manuia sololelei o fuafuaga a le Atua ma le tagata. Peitai, e lei muta ai le saili mai pea o le Atua ina ia laveai mai le tagata mai le faafanoga ma le pule saua a le agasala.
Na ou taua i le vaiaso ua tuanai atu, O agasala uma o le tetee ia i le natura paia o le Atua, ma o le ala foi lea na faateaeseina ai le tagata mai ona luma ma ua faasalaina i le oti talu ai lava le agasala. Ona e tonu ma paia le Atua, e le mafai ai ona tuu e Ia le agasala e aunoa ma sona taui. Ae ona o Ia foi o le Atua Alofa, e naunau ai pea lava lona finagalo ina ia faasaoina le tagata na ia faia. O le tonu ma le paia tele o le Atua, na ia auina mai ai lona Atalii i le lalolagi, o le totogi foi lea o le agasala a le tagata.
Ioane 3:16-17 “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. Aua e lei auina mai e le Atua lona Atalii i le lalolagi ina ia faamasino i le lalolagi, a ia faaolaina le lalolagi ia te ia.” Roma 6:23 “… a o le ola e faavavau, o le mea foaifuaina mai lea e le Atua, i lo tatou Alii o Keriso Iesu.”
Ua manino ma ua malamalama e tusa ai ma mau o le afioga paia a le Atua i le mafuaaga na afio mai ai Iesu i le lalolagi; ina ia faasaolotoina, ma laveaiina, faaolaina mai le tagata mai le pologa ma le pule saua a le agasala. E lei mafai foi e le tamaoaiga, o le tomai ma le malosi o le tagata ona totogi lana sala pe faasaoina mai foi o ia mai le matautia ma le leaga o le agasala. Ae faafetai i le Atua ma lona alofa ua ia auina mai ai Iesu Keriso, e maliu i le satauro, tanumia ma toetu manumalo mai i le tuugamau ma le oti, e sui tulaga ia i tatou ina ua le mafai e i tatou ona faasaoina i tatou lava. Ua faapea foi ona ia totogi ma soloieseina le tatou aitalafu ona o le agasala.
Na aveina e Keriso a tatou agasala i lona lava tino i luga o le satauro, ina ia tetea i tatou ma le agasala, ae ola i le amiotonu. O ona faalavalava foi ua malolo ai i tatou. Ua faapea foi ona aoao mai le Tusi Paia; E lei iloa e Keriso le agasala aepeitai na faia o Ia e le Atua ma agasala, mo i tatou; ina ia avea i tatou ma Amiotonu a le Atua ia te ia.
Na faatauina mai i tatou e Keriso ai le faafanoga o le tulafono, ina ua faafanoina o Ia mo i tatou, ina ia oo mai ia te i tatou le manuia ia Keriso Iesu, ina ia tatou maua i le faatuatua le na folafolaina o le Agaga lea.
O le fesili: O le a le mea e tatau ona ou faia ina ia magalo ai agasala?
O loo faapea foi ona manino le aoaoga a le Tusi Paia i lea tulaga. Ina salamo ia ma liliu i le Atua, ina ia soloiesea a tatou agasala, ina ia oo mai ai le tausaga e filemu ai mai i luma o le Atua (Galuega 3:19). O le mea moni, e leai se filemu sei vagana lava ua salamo, liliu ese mai le agasala ma liliu atu i le Atua ma talia o Keriso e avea ma Alii ma Faaola i lou soifua.
O le tala a le tusi, “A o i latou uma e na talia o ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua. O i latou, e le o le toto na fanau ai, e le o le manao foi o le tino, e le o le loto foi o le tagata, a o le Atua lava. “O lona uiga la, ua avea nei i tatou ma atalii ma afafine o le Atua i le faatuatua ia Iesu Keriso.”
O le tala lelei lea mo tagata uma; ua tauamiotonuina i tatou i le faatuatua, o lea ua tatou lelei ai ma le Atua, ona o lo tatou Alii o Iesu Keriso. O ia foi ua tatou maua mai ai le ola fou. O le molimau a le aposetolo o Paulo; O lenei, afai o ia Keriso se tasi, o le tagata fou ia; ua mavae le ola tuai, faauta, ua oo mai le ola fou.
Samoa e, ou te toe valuvalusia aa o le laau ma ou toe faamanatu faamanuiaga ua tatou maua e ala mai i le maliu o Iesu Keriso. Ua faamutaina le pule a Satani i luga ia te oe. Ua leai foi sana aia e faasese ma taitai ese oe mai le finagalo o lou Matai. Ua tatou saoloto ma ua leai se pule a le agasala i lo tatou soifua ona o le maliu o Keriso.
Ia manuia faiva ma tiute o lenei vaiaso
