E toe faatalofa atu i le paia ma le mamalu o si ou atunuu Samoa, aemaise le au faitau o le tatou nusipepa faapea paaga masani a le taiala o le vaiaso. O lenei ua tatou laasia manuia mai le masina lona lima o lenei tausaga i le alofa ma le agalelei o le Atua. Tumau atu ia i le Atua poto e toatasi lona viiga aua ua tatau ma onomea. O le tatalo ia faaaogaina pea e le Atua aso o totoe o le olaga e faataunuuina ai lona finagalo.
E iai le faamoemoe o loo faamalieina lau faitau i lea vaiaso ma lea vaiaso e ala i le faamalosi atu a le taiala o le vaiaso. O le vaiaso ua tuanai sa matua faamamafa ai le tatau ona faatauaina e soo se Kerisiano, ona fausia se faavae mautu e ala i le Upu a le Atua.
Ia manatua lelei, o fuafuaga a le Alii le Atua mo le tagata talu mai le foafoaga o le lalolagi, o fuafuaga lelei mo lou manuia, o fuafuaga ina ia e soifua saogalemu ma ausia le iuga e iai le faamoemoe. O le mea moni, e le mafai ona e ausia lea vaega, sei vagana ua e soifua i taiala ua maea ona faataatitia mai e le Atua e pei ona sa tatou silasila i ai i le tatou lomiga o le vaiaso talu ai. Sa tatou vaavaai i ai i fuafuaga matagofie ma le maualuga a le Atua mo le tagata, ae peitai sa le usiusitai le tagata, ae ua faasaga atu e opogi fuafuaga a Satani, ma ua tetee atu ai i fuafuaga a le Atua.
Pei lava ona ou iloa ma e silafia Samoa, ua faia i tatou ia foliga i le Atua, peitai ua avea le tetee atu ma le lē usitaia o taiala a le Atua ma mea ua faaleagaina ai le fesootaiga vavalalata a le tagata ma le Atua, ma ua avea ai a tatou agasala ma pupuni i lo tatou va feagai ai ma le Atua. Viia le Atua, e ui lava ina agasala le tagata ma lafi i le silafaga a le Atua, ae sa saili mai lava o Ia ina ia faaolaina le tagata agasala.
Soo se filifiliga lava tatou te faia e iai lona taunuuga. A lelei le filifiliga e lelei foi lona taunuuga, a leaga pe faaletonu, e le lelei ma leaga foi lona taunuuga. Pei la ona tatou faitau i ai i le vaiaso ua tea nei i le filifiliga a le uluai tagata e teena le faatonuga a le Alii le Atua ae faasaga atu i fuafuaga a Satani. Sa le taunuu lena filifiliga i se lelei, ae na o le faalumaina ma le faasalaina.
I le tusi o Isaia 59:1 & 2, o loo manino mai ai le aafiaga o le agasala i le va o le tagata ma le Atua. “A e peitai, o a outou amio leaga ua fai ia ma pupuni i le va o outou ma lo outou Atua, o a outou agasala foi ua alo ai ona fofoga ia te outou ma ua ia le faafofoga mai ai.” O le upu lea na fetalai atu ai le Atua i le perofeta o Isaia, ina ia faaali atu ia Isaraelu lo latou solitulafono e ala i le faataga anaana i le Atua. Faatasi ai la ma lenei, e leai se mea e lelei i le agasala ua na o le tigaina ai.
Ia manatua, tasi lea vaega taua e ao ona malamalama lelei i ai soo se kerisiano, o le matautia ma le leaga o le mea na faia e le agasala i le mafutaga a le Alii le Atua ma lana tagata, ina ia faamalosia ai le fausiaina o se faavae faaleagaga mautu ma le malosi. O le agasala, ua fai lea ma pupuni i le va o le tagata ma lona Atua. Ua faapea foi ona alo fofoga o le Alii le Atua ma ua le faafofoga mai ai. O lona uiga pe a faafaigofieina, a e valaau atu i le Atua a o loo e faia pea le agasala, o le a le mafai ona faafofoga mai o Ia i lau valaau atu.
I le Kenese 3:24, na tuli ese mai ai e le Alii le Atua ia Atamu mai le faatoaga talu ai lava le agasala ina ua le usiusitai i le faatonuga a le Alii le Atua. O le mavae ese poo le tea ese o le tagata mai luma o le Alii le Atua ua lava lea e faailoa mai ai le ogaoga ma le tele o le aafiaga o le tatou va feagai ma le Atua pe a tatou ola pea i le agasala.
O loo faamatalatala mai e Paulo i lana tusi i le Ekalesia i Roma, le natura poo tulaga agasala o le tagata. Ua faatusaina e Paulo, o loo nofo sala, e leai se amiotonu, e leai se lagona, e leai foi se saili atu i le Atua. Ua o ese ma le Atua ma ua leaga i latou. E leai se ua amio lelei. Ua o se tuugamau e faamaga o latou faai. Ua oleole o latou laulaufaiva. Ua tumau o latou gutu i le fetuu ma le upu faafiufiu. Ua i o latou ala le olopalaina ma le puapuagatia. Ua latou le iloa le ala o le manuia. Ua leai lava so latou matau i le Atua. Ua le oo i le mamalu o le Atua. (Roma 3:9-20, 23)
Sa faamatalaina e se tasi o au uo ia te au i se tala faataitai le matautia ma le leaga o le agasala. Fai mai le uso lea, o le agasala e pei o le kelu (glue) lea e masani ona faaaogaina e tina e faapipii ai fulumoa o ietoga. O le taimi lava e pipii ai le kelu i le fulumoa ma le ietoga e le toe mafai ona aveese mai. E faapena le foi le agasala. O le taimi lava e maua ai oe e lave malolosi ma le suamalie o le agasala, o le a faigata ona e toe alu ese mai ai, sei vagana le mana malosi o le Atua e mafai ona faasaoina mai ai oe.
O mataupu faapei, e toe oo mai lagona le fiafia ma ua pei ua toe faamanatu ia te oe lou tuanai. O le fautuaga, aua nei e faatagaina le tuumumusu atu a Satani ma faaosoosoina oe i manatu vaivai faapena. Peitai, o le fausiaina o se faavae mautu faaleagaga, e moomia ai le malamalama lelei i le leaga o le agasala, o ona aafiaga ma lona taunuuga.
Ua faapea foi ona aoao mai Paulo e uiga i le taui poo le taunuuga o le agasala. “Aua o le oti o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Iesu Keriso.” O le totogi o le agasala o le oti.
I le mataupu lava lenei o le agasala, ua aoao ma faamalamalama mai ai e le Tusi Paia nisi o aafiaga o le agasala, lea ua le gata ina mavae ese ma tuli ese mai tagata mai luma o le Alii le Atua, ae ua faapea foi ona aafia ma oo mai ai mafatiaga, tiga, ma‘i ma faanoanoaga faaletino (Kene 3:16-17). Ua faapea foi ona aafia ai le soifuaga tau le tamaoaiga ma ua faamativaina ai le tagata. (Kene 3:16,18,19; Teu 28:15-68).
Samoa e, e le faigofie le aoaoina o lenei mataupu, peitai o le naunautaiga lava o le Taiala, ia faaaupegaina ma tomatauina lo tatou soifua faaleagaga i le Upu a le Atua, ina ia lava tapena ma saunia lelei tatou uma mo galuega lelei ua valaau ma tofia i ai tatou uma. O le tatalo faifaipea a le Taiala, ia tatou usitaia timaiga ma aoaoga e tusa ai ma le aoao mai o le afioga a le Atua.
O le vaiaso fou o le a tatou silasila ai i le tali poo le fofo a le Atua i le faafitauli o le agasala. Alofa mai pea le Atua ma faamalamalama ana afioga a o e faitau, ina ia tatou iloa lelei le tele o le aafiaga pea tatou fiafia pea e ola i le agasala.
Faamanuia tele le Atua i feau ma galuega o lenei vaiaso!
