Faatalofa ma faafeiloai atu i le paia ma le mamalu o Samoa le atunuu pele i le suafa manumalo o lo tatou Alii o Iesu Keriso. Malo le soifua maua ma le lagi e mama. E iai lava le faamoemoe o loo aualiitia mea uma i le alofa ma le agalelei o le Atua.
O le vaiaso na sei mavae atu nei, na tatou talanoaina ai i le taua ma le lelei ona tuuina i lalo o se faavae. E le gata i le alaga tatau ona mautu faavae o o tatou fale a o le faavae foi o tatou olaga Kerisiano. E matua moomia tele le faamaoni i le tausisia lelei o taiala ua maea ona tusitusia ma faamauina lelei e le au tusiata ma ua atoatoa ona suesueina lelei e le au inisinia ua iai tomai faapitoa i ia ituaiga galuega. O le malosi o se faavae e tofotofoina lea i le taimi o mafuie, lologa ma timuga.
E faapena foi ona matua faatauaina lelei e soo se Kerisiano le lelei faavaeina o lona soifua faaleagaga i mataupu silisili ma aoaoga a Keriso. 2 Timoteo 3:16-17 “O tusi paia uma lava e mai le Agaga o le Atua ia, e aoga foi ia e aoao ai, e aoai ai, e faatonu ai, e faapoto ai foi i le Amiotonu, ina ia atoatoa ona lelei ai le tagata o le Atua, ia saunia lava ia i galuega lelei uma lava.”
I le amataina o le galuega o le fausia o se faavae mautu ma ia malosi faaleagaga, e tatau ona tatou toe foi i le amataga o le foafoaga a le Atua o le lalolagi, ina ia tatou malamalama i le faaolataga aemaise ia faatumulia o tatou loto i le agaga faafetai ona ua fai Keriso ma o tatou Faaola. E tatau ona tatou malamalama muamua pe aisea e moomia ai e le tagata se Faaola, ae pe faaola foi mai le a? E moomia foi ona tatou malamalama lelei i le matautia o le leaga o le agasala, aemaise ai o lona taui, e oo i le faavavau.
I le Kenese e lua a o lona fuaiupu e sefuluono ma le sefulufitu o loo manino ma malamalama lelei ai le faatonuga poo le upu na tuu e le Alii le Atua i le tagata e ola ai. “Ua fetalai atu foi le Alii le Atua i le tagata, o loo faapea atu, o laau uma o i le faatoaga e te ai ai; A o le laau e iloa ai le lelei ma le leaga, aua e te ai ai; aua o le aso e te ai ai e te oti ai lava.”
O le Kenese mataupu e tolu, o loo iai se tala i le pau o le uluai tagata ina ua la le usitaia le faatonuga poo le upu a le Atua ina ua la filifili e talia le tuumumusu atu a le gata. I le fuaiupu e ono o le Kenese e tolu, na ai ai loa Eva i le fua sa faasaina e le Atua, na ia avatua foi i lana tane faatasi ma ia, na ai ai foi o ia. Na aai Atamu ma Eva i le fua o le Laau Faasaina. Ua le usiusitai i le Atua, ma ua agasala ai i laua.
O loo aoao mai le Tusi Paia e ala i le tusi o le Kenese, na oo mai le agasala i le lalolagi e ala mai ina ua agasala le uluai tagata (Atamu ma Eva). O lenei agasala sa faatupuina e Satani, e ala mai lea i ana togafiti leaga lea na ia faaauala mai i le gata; o ia na ia luluina i le loto o le tagata le fatu o le masalosalo ma le le talitonu i le Atua.
Ua faailoa manino e le Tusi Paia, o le gata lea na faaosoosoina Atamu ma Eva e pei ona taua i le tala, o le pau o le uluai tagata, o ia lava o le mea faigaluega a Satani. O le aina o le fua o le Laau Faasaina, o le uluai agasala lea. Ua mafua ona avea le aiina o le fua, ona sa faasaina e le Atua ona ai. O le aiina e le tagata o le mea sa faasaina e le Atua, o le faailoga lea o lona le fia faalogo, ma lona le fia gauai e usitai i le upu poo le faatonuga a le Atua ma mea uma e finagalo ai le Atua.
I le vaaiga faalemafaufau, e faailoa mai ai le loto faamaualuga naua ma le le talitonuina e le tagata o le Atua ma ana fuafuaga lelei e malu ma saogalemu mai ai i le tele o faaosoosoga. E mafai foi ona tatou faapea, a silisili foi i le itu i manaoga lilo o le loto, e aliali ai le fia atua ma le fia tutoatasi mai pulega a le Atua. A tatou toe manatu i le faatinoina o ona lagona, e faailoa mai ai ua faamalieina o ia i mea e le paia. O le iuga, ua le toe foliga le tagata i le Atua; ua matua faaleagaina, ua nofo sala ma ua faasalaina i le oti.
I le Kenese e tolu, fuaiupu e fitu, valu, ma le fuaiupu e sefulu, ina ua pupula o laua mata, ua la iloa ua le lavalava i laua; ona la fatu ai lea o lau o le mati ua fai mo laua titi. Ona lalafi ai lea o i laua ai luma o le Alii le Atua i laau o le faatoaga.
E ui i le le usiusitai o le uluai tagata i le upu poo le faatonuga a le Atua ae o loo atagia pea le natura alofa tunoa o le Atua. O lea na ia saili mai ai pea i le tagata e ui ina leiloa i le agasala ma ona aafiaga.
E le o iai se eseesega tele i nei ona po talu mai le amataga o le lalolagi. O le uiga lava lea o le tagata ina ua le savali e tusa ma ala o le Atua; o le taumafai lea e ufiufi lana agasala, ma lafi mai le Atua, ae peitai o loo saili mai pea lava le Atua i le tagata ina ia laveai ia te ia. O le mafuaaga lea o lo tatou moomia o se Faaola poo le Faaolataga.
Samoa e, o le tatalo a le Taiala i lenei vaiaso, ia tatou talia le faaolataga ua ofoina mai e Iesu Keriso mo i tatou. E ui lava ina ua tatou agasala ma tatou lalafi i le silafaga a le Alii ona o sese ma agasala, ae o loo saili mai pea o ia mo i tatou, ina ia faaolaina i tatou mai le agasala ma ona aafiaga.
Manuia tele lenei vaiaso Samoa!
