Tumau atu pea i lo tatou Atua poto e toatasi le viiga ma le faaneetaga, aua o lona lava alofa ua tatou tuvae manuia mai ai foi i le amataga o lenei vaiaso fou. Faamalo le soifua, malo le onosai, malo foi le tapuai. Poo fea lava le itu o lenei kelope o loo e maua mai ai tusitusiga a lenei nusipepa, e faatalofa atu le Taiala o le vaiaso ia te oe.
E iai le manatu o loo faapena ona faamalieina oe i tatou mataupu faaauau pea i vaiaso taitasi. O le naunautaiga lava ia mafai ona avea ma fesoasoani i mafatiaga o loo faapea ona lutia ai le folauga i lea vaiaso ma lea vaiaso. O le faanaunauga maualuga o le Taiala o le faamalosi atu pea e ala i le afioga a le Atua, aua e pei lava ona e silafia Samoa, e pei foi ona tusia, “E mavae atu le lagi ma le lalolagi, ao le Upu poo le afioga a le Atua, e tumau lea seia oo i le faavavau.
Aisea la tatou te le faatuatuaina ai le Upu ma manatu o loo tusia mai i le Upu lea pe a faapea e pau lava lea o le mea e tumau? Aisea tatou te talitonuina ai le pepelo ma aoaoga le moni? Afai o oe o se tagata poto, e tatau ona e faatuatuaina nei aoaoga ma nei poloaiga, aua e mavae mea uma, ae tumau pea le Afioga a le Atua.
O se vaega tele o le galuega faaola a Keriso, o le faamaloloina lea o le tagata mai ma‘i eseese. Sa ou taua foi, o le faamalologa na faamau faailogaina i le tau na totogiina e Iesu i luga o le satauro. O lona uiga, o ituaiga ma‘i eseese e pei o ma‘i fulafula, ma‘i vevela, ma‘i mageso, ma‘i papala, ma‘i tauaso, ma‘i fiva, ma‘i mamae, ma‘i polopologa, ma‘i gugu ma le tele lava o isi ma‘i sa tauaveina e Iesu nei mala ma ma‘i i luga o le satauro mo i tatou.
I le tatou taiala o lenei vaiaso, o le a tatou aoaoina mai ai i le Tusi Paia nisi o mafuaaga ua mama‘i ai le toatele o Kerisiano. E toatele tagata na valaau mai ma fesili mai, pe aisea ua mama‘i ai le toatele o tagata Kerisiano pe afai sa tauaveina e Iesu Keriso i luga o le satauro mo i tatou, mala ma ituaiga faama‘i eseese. O nisi la nei o mafuaaga e ala ai ona mama‘i le toatele.
O le le tausia lelei o le tino. E masani ona ou faaalogo i ou matua o faatonu mai ina ia fai lelei o matou lavalava i taimi e timu ai ma taimi e oo mai ai le tau malulu e pei ona ua tatou iai i lenei vaitaimi. O uiga faalekeakea ma le osooso o le malosi na faatuatuanai ai le fautua mai a nai matua. Mulimuli ane ua amata ona tafe le isu ma iu ai ina natinati atu i le falemai ma alu ai tupe e totogi ai le talavai ma le vaaiga o le fomai talu ai le ola faatamala. Ua le gata foi i lea, ae o le taumamafa i meaai e le tatau mo le soifua maloloina lelei. Ua malie lava e talia tiga e mulimuli mai ae sei muamua ona faamalie si ona manao. O le mafuaaga la lena e mama‘i ai nisi o tatou, ona o le ola faatamala ma le magafagafa.
Loto lē Faamagalo. E toatele tagata o loo mama‘i ona o le loto lē Faamagalo. Ua avea le loto lē Faamagalo e fai ma faitotoa e sao mai ai temoni i lou loto ma faapologaina ai oe. O nisi foi la o taimi ua e masalosalo vale ma ua e le talitonuina soo se tagata e oo foi i le Atua. I se suesuega sa faia i Amerika e ni tagata ua iai tomai faapitoa i le aafia o le tino o le tagata i mai, na latou iloa ai, e tele le aafiaga o le soifua maloloina lelei o le tagata, ona o mea e le tatau ona ia tauaveina i lona mafaufau. O nisi o nei mea, e iai le loto le faamagalo, faatuiese ma le pulega, fefe, ita, popole, inoino, ma le mataua. Na faapea foi ona faamaonia mai ai i lea suesuega, le iai o gasegase e mafai ona malolo i togafitiga faafomai, ae iai foi ma‘i ua foi mai i le fomai e le foi lava i se lelei, sei vagana le anapogi ma le mana o talosaga i le Atua i lona alofa tunoa. O le a faalautele lea mataupu i le lumanai.
O le sese o le tautinoga. Ia manatua lelei, ua suia lo tatou tulaga mai le nofo sala i le saoloto, tagata tuai i le tagata fou, tagata sa oti ona o le agasala i le tagata ua ola ona o Keriso. O se vaega tele o le soifua suia, o le faafouina lea o o tatou mafaufau. O manatu faiaina tatou te tautala i ai i aso uma, ua faapea ona tatou tuuina atu ai le pulega ia Satani e osofaia ma faaleaga mai ai i tatou. Faataoto 6:2 “ua maileia oe e upu a lou gutu; ua maua oe i upu a lou gutu.” Faataoto 23:7 “Aua e pei ona manatu o ia i lona loto, ua faapea lava o ia…” O le tele la o taimi, ua tatou tautino, o le ma‘i tumau lava lea o lo matou aiga, o lona uiga, ua e ioe e te oo foi oe i le ma‘i lea, ona o le ma‘i tuufaasolo o le tou aiga, ae manatua, ua uma ona solofa ma aveeseina i le toto manumalo o Iesu Keriso nei ma‘i uma i luga o le satauro.
Ona o le lē malamalama. O se tasi lenei o auupega malosi o loo faaaogaina tele e le fili o le faatauasoina lea o mata faaleagaga o le au Kerisiano mai le aoaoina lea i le Afioga a le Atua. Ia manatua lelei o le malo o Satani, o le malo o le pogisa, e faagaioi i le pepelo, togafiti faataulaitu ma le taufaasese faatasi ai ma le tetee i le pulega. Ua faapea foi ona matuā galue malosi le fili e taofi le tagata faatuatua mai lona malamalama. Tele o taimi e tusa ma le afioga a le Atua, ua faasalaina i tatou ona o le leai o so tatou malamalama. A tatou malamalama i aoaoga a le afioga a le Atua, e leai se mea e taofia mai tatou i manuia ma mea uma ua faasaolotoina mai ai tatou.
Le usiusitai i le faatonuga poo le Upu a le Atua. O le feagaiga a le Atua ma Isaraelu i le Feagaiga Tuai, sa iai ma tuutuuga na tuu e le Atua ia Isaraelu lea e aofia ai ma le Faamalologa mai ma‘i eseese. Esoto 15:26 “Afai e te (1) matua faalogo i le leo o le Alii lou Atua, (2) ma e fai le amio tonu uma i ona luma, (3) ma e uai mai ou taliga i ana poloaiga, (4) ma e tausi i ana sauniga uma lava; ou te le tuuina atu ia te oe se tasi o ia ma‘i na ou tuuina atu ia Aikupito; aua o au o le Alii, o le na te faamaloloina oe.” O le taunuuga o le usitai o le manuia, saogalemu, malu puipuia, maloloina. Peitai, o le le usiusitai i poloaiga a le Atua e iu i le pologa, saisaitia, tigaina, faanoanoaga ma ma‘i.
Ai ma inu faaletatau i le tino ma le toto o Keriso. E toatele le au Kerisiano e le o manatu mamafa i taiala o le Faamanatuga. Ua leai se migao, ava ma matau i le tino ma le toto o Keriso. Ua tele ina fai ona o se mea ua masani ai e aunoa ma le suesue ifo le tagata lava ia i lona lava loto, ae lei tagofia le Faamanatuga. A o le faatonuga o lenei sauniga paia e pei ona faailoa mai e le afioga a le Atua e faapea “A ia suesue ifo le tagata ia te ia, i le ai ai o ia i lenei areto, ma inu i lenei ipu. Aua o le ai ma inu, ua ai ma inu o ia i lona lava faamasinoga pe a le faautauta o ia i le tino. O le mea lea ua mama‘i ai ma vaivai ai ni o outou e toatele, ma nisi e toatele ua latou momoe. Aua afai ana tatou faamasino ia te i tatou, po ua le faasalaina i tatou faatasi ma le lalolagi. 1 Korinito 11:28-31.
O le fesili: O le a le mea e fai pe a ma‘i?
E eseese lava manatu o tagata i lenei fesili. O nisi ua muamua nanati ma tili i le falemai mo togafitiga a o nisi foi ua tapatapa i le fualaau mo se mapusaga. O nisi foi ua totope atu i fofo mo se sailiga malosi. O le mea matautia tele, o le toatele lava o tagata faatoa tapatapa lava i le Atua pe a uma sailiga ma ua leai se fofo. E foliga mai faatoa manatua lava le Atua pe a uma taumafaiga uma, ma ua leai se fesoasoani e maua. Ona faatoa manatua loa lea o le Atua. Ae o nisi nei o taiala e ao ona tatou usitaia e tusa ai ma le aoaoga a le Tusi Paia, e ao ona tatou faia pe a tatou mama‘i.
Ae tatou te lei oo atu i sailiga fomai ma oo atu foi i le falemai mo se fesoasoani, o le mea muamua e ao ona tatou faia:
Tatalo ma faatoga i le Atua mo le faamalologa. O le faatuatua o le ki lea i le tali mai o le Atua ia tatou talosaga (Roma 10:17). “O lenei e tupu le faatuatua i le taulogologo atu, o le taulogologo atu foi o i le Afioga a le Keriso lea.” O le faatuatua o le faitotoa lea i le manuia ma le faamalologa a le Atua. E mafai foi ona tatalo ma faaee lima o se Kerisiano ia te oe pe a e ma‘i (Mareko 16:17-18). O faailoga nei e mulimuli atu i e uma e faatuatua ma talitonu i le suafa o le Atua, latou te tuli ese ai temoni, latou te faaee lima i luga o e mama‘i, ma latou malolo ai (Iakopo 5:16). “O le mea lea ia fetautauai a outou agasala, ma tatalo le tasi mo le tasi, ina ia faamaloloina outou. Ua aoga tele le tatalo faatauanau a le tagata amiotonu.”
Valaau toeaiina o le Ekalesia (Iakopo 5:14). “Ua ma‘i ea so outou? Ina aami atu ia i toeaina o le Ekalesia, ia latou tatalo mo ia, pe a uma ona faauu ia te ia i le suauu i le suafa o le Alii. O le tatalo foi e faia i le faatuatua e faaolaina ai le ma‘i, e faatuina foi o ia e le Alii; afai foi e agasala e faamagaloina ia.”
Samoa e, e tutusa lelei lava taiala na tuu e le Atua ia Atamu ma Eva talu mai le amataga o le lalolagi, ma taiala na tuu e le Atua i le nuu o Isaraelu aua lo latou saogalemu, filemu, faatasi ai ma le faasaoina mai ma‘i eseese. O taiala foi lava nei e ao ona mulimulitai ai le Ekalesia a le Atua aemaise i tatou uma ua taua o le au faatuatua.
O fuafuaga ma manatu o le Atua mo i tatou mai le amataga, o fuafuaga lelei ma manatu lelei mo so tatou manuia ae le o le malaia, o manatu ia tatou maua se ola maloloina, manatu ia tatou oo atu i se iuga e iai se faamoemoe. Ieremia 29:11.
Aisea e te le taliaina ai le upu a le Atua i lou loto, atonu foi o loo e mafatia i se ma‘i ma ua silia sailiga, o le fautuaga ma le timaiga a le Taiala mo oe, Talia nei le upu a le Atua. Talia le faamalologa e ala i le aoao mai a lana afioga. O le upu o loo ola, ma e ola pea lava. O le upu o loo iai le mana, o le upu o loo iai le faamalologa. Talitonu nei loa i ai e tusa ma lona aoao mai.
Manuia tele lenei vaiaso Samoa!
