I le suafa manumalo o Iesu Keriso lo tatou Alii ma lo tatou Faaola, ou te toe faatalofa atu ma faafeiloai atu ai i le atunuu pele Samoa. Poo fea lava o e maua mai ai tusitusiga a le Samoa Times aemaise le tatou Taiala o vaiaso taitasi, e faatalofa atu i le agaga faaaloalo tele. Faamalo le folau ma le onosai i luitau o lena vaiaso ua tuanai atu. Salamo 23: “E ui lava ina ou savali i le vanu o le ata o le oti, ou te le fefe lava i se mea leaga, aua o Oe ta te faatasi ma au, o lau laau ma lou tootoo e faamafanafanaina ai au”.
O se mea lea e ao ona tatou faafetai ai pea, aua e ui ina fesouaina la tatou faigamalaga i lea aso ma lea aso, a o loo folafola mai pea le afioga a le Atua, O loo faatasi o Ia ma i tatou, e faamafanafana, faamalosi, leoleo ma puipui, e tautai i la tatou faigamalaga. O se mea lea e ao ona tatou faafetai ai pea e le aunoa.
E iai le manatu maualuga o loo mafai ona maua se faasiliga malosi e ala i le fesoasoani atu a le Taiala o le vaiaso. O le naunautaiga lava o le loto, ia atinae o tatou aiga, atinae a tatou fanau, atinae o tatou olaga e tusa ai ma taiala o le Afioga a le Atua, aua pau lea o le upu e ola, e tumau, e le suia lona mana e oo lava i le faavavau.
Sa tatou talanoaina i le vaiaso ua tuanai le mafuaaga ua mama‘i ai le toatele faatasi ai ma nisi o fautuaga e tusa ai ma le afioga a le Atua i le mafuaaga ua mama‘i ai nisi e toatele. O le tatalo, ia avea i tatou ma tagata popoto, ia tatou faaaogaina fautuaga ma timaiga ua tuuina mai e ala i le Afioga a le Atua. O le Upu e ola ai i tatou, o le upu e faapotoina ai tatou i le Amiotonu, o le upu foi e aoao ma aoai ai i tatou. Manatua, o fuafuaga lava a le Atua mo i tatou mai le amataga, o fuafuaga lelei, mo lo tatou manuia, o fuafuaga mo le ola maloloina, o fuafuaga ia maua e tatou se iuga e iai le faamoemoe.
O lenei vaiaso, o le a tatou talanoaina ai le Faaolataga Atoatoa ua saunia e Iesu Keriso aemaise ai le Faasaolotoina o i tatou mai le malosi o Satani.
O loo tatou faalogo pea i tala i nusipepa ma televise o loo faasalalau mai ai le faatupulaia pea o aoaoga ma talitonuga i temoni ma galuega a temoni. O le mea e ofo ai le loto, e tutusa lava le malosi o nei galuega i nuu faapaupau ma nuu ua taua o nuu Kerisiano, e aofia ai Samoa ma Niu Sila foi.
I lenei vaega o le taiala, o le a tatou talanoaina ai nisi o fesili e masani ona fesili ai le toatele: Faamata e moni temoni ma a latou galuega leaga o fai? E mafai ona ulutinoina pe pulea e Satani se Kerisiano? E Faapefea ona ou maua le manumalo aiai mai faaosoosoga a le tiapolo? O a mea e ao ona ou faia mo lou faasaolotoga? E faapefea ona tumau lou faasaolotoina?
1. Faamata e moni temoni ma a latou galuega leaga o fai?
O temoni ma galuega faatemoni, e moni ma e ao ona malamalama ma nofo mataala i ai tagata uma. O temoni, o agaga leaga ia o loo i le lalolagi, ma o loo saili ni tino (bodies) e faaali (manifest) mai ai a latou galuega leaga. O le faamoemoe autu o galuega a temoni, o le faapologaina ma faatigaina lea o tagata, e ala i ana togafiti taufaasese ma le pepelo ina ia le taunuu le finagalo o le Atua mo o latou soifua.
E tele tusi o le Tusi Paia o loo aoao ai Iesu Keriso i le motu o tagata ma Ia tautino ai i le leaga o galuega a agaga leaga. Na faapea ona tuliese ai ma faasaoloto e Iesu le Alii Faaola le toatele o tagata sa ulutinoina e agaga leaga. O nisi nei o agaga leaga; agaga o le fefe, agaga pepelo, agaga ma‘i, agaga mativa, agaga le talitonu, agaga popole ma le atuatuvale, agaga masalosalo. (Silasila i le Mareko 5:1-9; Mareko 9:17-29; Mataio 9:32, 33).
O nei ona po ua toatele tagata ua talitonuina ma ua latou vaaia le mana o Satani e ala mai lea i galuega a agaga leaga e pei o le taufaasese, fofo, vai ma togafiti faataulaitu, o se iite ma vavalo i ao o le lagi, poo se saili faailoga poo se taulaitu, poo saili atu i e oti.
I le Tusi o Teuteronome 18:9-12 na lapatai atu ai le Atua i le au faitaulaga ma sa Levi ina ia aua nei iloa pe faaaoao ona fai o mea inosia aua e le finagalo Ieova lou Atua ina ia tatou faia mea faapena. O mea nei ua inosia e le Atua; ‘o se tasi na te faaui ane lona atalii po o lona afafine i le afi, o se fai togafiti faataulaitu, o se iite i ao o le lagi, po o se saili faailoga po o se taulaitu, po o se fesili atu i aitu, po o se ua i ai le aitu vavalo, po o se saili atu i e ua oti. Aua e INOSIA e le Atua o i latou uma o e faia na mea; e TULIA foi i latou e le Atua ai ou luma ona o na mea inosia.’
I le fetalaiga a le Atua i le fanauga a Isaraelu lea na ia toe faailoa atu i ai lana tulafono na ia faapea atu ai: “Ia paia outou; aua o au o Ieova lo outou Atua e paia lava au. Aua tou te FAASAGA atu ia i latou o i ai aitu vavalo, aua foi e te SAILI i taulaitu E LEAGA AI OUTOU; o au o Ieova lo outou Atua.” “O le tagata foi e LILIU ane i e o i ai aitu vavalo, ma e taulaitu, e mulimuli atu i ai e mulilulua ai, ou te faia mou FILI lea tagata, ou te VAVAEESEINA foi o ia i lona nuu.” (Levitiko 20:31; 20:6)
Ioe, e tutusa lelei taiala na tuu e le Atua i le nuu o Isaraelu ma taiala mo tatou le au faatuatua i lenei itu o le lalolagi. O mea ua inosia ma faasaina e le Atua mo lona nuu o Isaraelu ua inosia ma faasaina foi e le Atua mo nuu ese e aofia ai ma tatou. Ia manatua lelei, o galuega faataulaitu e tutusa lelei ma le le usiusitai i le Upu a le Atua. Soo se tagata foi e liliu atu ma faasaga atu i aitu vavalo ma saili togafiti atu i taulaitu, ua leaga lava i latou ma ua fai foi i latou ma fili o le Atua.
Samoa e, lou atunuu pele, ou te le faamasino ia te oe, ae o le tatalo a le Taiala i lenei vaiso, ia suesue ane oe ia te oe. Aisea tatou te le talia ai le upu a le Atua e pei ona aoao mai? O le fautuaga mo oe le tamā, tinā, uso ma se tuagane, tatou talitonuina le upu a le Atua. Ua uma ona tuuina mai le pule ma le mana uma lava tatou te soli ai gata ma akarava, o le mana foi lea e faatoilaloina ai Satani ma ana galuega. O le mana o le toto manumalo o Iesu Keriso, na maliu ai i luga o le Satauro ua maua ai e i tatou le ola manumalo.
Ia maua se vaiaso manuia Samoa. Tatou savavali i le manumalo o Iesu Kersio!
