Ou te faafeiloai atu i le agaga faaaloalo i le mamalu o le atunuu aemaise lava i paaga masani a le taiala o le vaiaso. Malo le folau, malo foi le onosai i tiute ma tofiga ua valaau ai outou e le Atua. O le sini autu ma le faamoemoe atoa o lenei itulau i vaiaso taitasi, o le fia soosootauau atu i le galuega fita a le aufailotu aua le tomatauina o soifua faaleagaga o o tatou tagata. E iai pea le faanaunautaiga o le a uunaiaina ai i tatou ina ia usiusitai ma anaana i le afioga a le Atua ina ia tatou maua se soifua maloloina ma le faamanuiaina.
O le naunautaiga lava o le Taiala ia faamalosia ma tapenaina oe e ala lea i le fausiaina o lou faavae mautu. Soo se tagata lava e fia alualu i luma le soifua ma fia ausia ni matatia maualuluga, e ao ona fausia lona olaga i ni faavae mautu. E faapena foi le olaga Kerisiano, e le mafai ona mautu lou olaga, pe a aunoa ma le faavaeina i le afioga a le Atua, poo le Upu a le Atua. O afioga lava a le Atua, pau lea o le upu e le mafai ona luluina, e mavae atu le lagi ma le lalolagi a o le afioga a le Atua e tumau lea e faavavau. O le ala lea o le fagufagu atu pea i lea vaiaso ma lea vaiaso, e taua le tapue o o tatou olaga i le upu a le Atua. E le gata i lea, ae ia aua nei muta ai i lo tatou augatupulaga nei aoaoga taua, a ia avea o se oloa taua e mafai ona e faasoa ma tufa atu i nisi augatupulaga o loo mulimuli mai.
Ua vave lava ona ou manatuaina se faamanuiaga sa maua i le vaiaso ua tuanai atu e fetaui lelei ma le mataupu sa tatou talanoaina i le vaiaso ua tuanai: o le Alofa Tunoa o le Atua e ala i le faatuatua.
Na valaau mai se tasi o uso ia te au pe iai nisi o le matou Ekalesia e fia auai i le koneferenisi sa fai i Niu Sila nei i le vaiaso na tea nei. O le fonotaga lenei e tatau ona totogi le $140.00 a le tagata e toatasi ona faatoa auai lea. Ae sa valaau mai lenei uso ma ofo mai e tusi atu igoa o tagata e fia auai ae le mafai ona gafatia lenei totogi. O lenei uso, ou te le masani ai, ou te lei fesili foi poo fea na ia aumai ai lau telefoni. Peitai na mafai ona saoloto le auai atu o tagata e sefulu mai le matou ekalesia i lea koneferenisi ina ua totogiina uma e lea uso le tau.
O le faatupeina e lea uso o le auai o nisi o le matou ekalesia i lea fonotaga, e lei faia i luga o se feagaiga poo se masaniga. E lei faia i luga o se talosaga, poo se faiā vava lalata ma se tagata o le matou ekalesia, peitai na mafai ona taunuu ia fuafuaga lelei ona o lona lava loto fuatia ifo lelei. Ou te talitonu o galuega lelei nei e mafai ona tatou faia pe a tatou malamalama i le ola faatuatua e ala i le alofa tunoa o Iesu Keriso.
O le a faaauau pea le tatou mataupu e uiga i le agasala ma le faaolataga.
O lenei vaiaso, o le a tatou vaavaai ai i suiga ua tatou maua ina ua suia o tatou olaga ma ua tatou talia le faaolataga e ala i le maliu o Iesu Keriso.
• Ua le toe iai se faasala i ou luga
O i tatou uma o tagata agasala, peitai ina ua faaolaina i tatou ma ua talia le galuega alofa a Iesu Keriso i luga o le Satauro, ua avea ai tatou pei o se tagata e lei agasala. Ua tauamiotonuina nei tatou ia Iesu Keriso. Roma 5:1 “O lenei, ua tauamiotonuina i tatou i le faatuatua, o lea ua tatou lelei ai ma le Atua.” E le gata i lena, a ua tatou maua foi le leleiga ma le Atua. Manatua ona o le olaga agasala sa tatou iai, sa avea lena ma va pupuni i lo tatou va feagai ai ma le Atua.
• Ua Faaolaina i tatou
Manatua foi, o le taimi lava na tatou agasala ai, ua iai foi i o tatou luga le faasalaga. Peitai, ua avea le taliaina e i tatou o le galuega laveai a Iesu Keriso ua tatou maua ai le ola fou, ina ua mavae le soifuaga tuai faauta ua faafouina mea uma, ma ua avea ai nei tatou ma tagata fou ia Iesu Keriso.
• Mautinoa ma le loto tele
Ua mafai nei ona tatou o atu ma le loto tele i luma o le Atua e aunoa ma se toe iai o se manatu faasala. Ua e mautinoa ua faamagaloina au agasala. Ua tauamiotonuina oe. Ua faaolaina oe. O oe foi o le tagata fou. Ua faaeaea nei luga lou ulu sa savali ma le masiasi, ae savali ma le loto tele ma le loto toa, o oe o le afafine poo le atalii o le Atua, ua e le toe savali faaletino, ae faaleagaga. Roma 8:1 “O lenei, ua leai se faasala o ia Keriso Iesu, o e le savavali i la le tino, a e i la le Agaga.”
• Ua avea ma Tamafai
Ua avea nei i tatou o se vaega o le fanau a le Atua. Ua suia mai le malo o le pogisa (Satani) sa tatou nofo pologa ai i le agasala ma ona aafiaga a ua liliu atu i le malamalama (Atua). Ua suluia foi i tatou i le malamalama o Ieova. Kalatia 4:7 “O lea, ua le toe fai tatou ma pologa, a o le atalii; a e afai o le atalii, o le suli foi, ona o le Atua.” Ioane 1:12 “A o i latou uma e na talia o ia, ma faatuatua i lona suafa, na ia avatu i ai o le a manuia ia avea i latou ma fanau a le Atua.”
• Ua ola faapaiaina
Ua vavae ese mai i tatou mo le Atua. Ua le o toe pule i tatou ia tatou, a o Keriso Iesu ua avea ma pule ia i tatou. O lona uiga, e le toe iai sau aia ia te oe, faapea foi au, a o Keriso e taitai ma faatonu mai tatou. O lona uiga ua faapaiaina lau tautala, o upu sa e fiafia i ai, o le a e inoino i ai. O lou fofoga o le a sau ai na o upu faamalosi ma upu faalaeiau ae le toe faaaogaina mo faitioga aemaise upu masoa. O le a faapaiaina foi ou ala, o mea uma sa e savali ai e le tusa ai ma le finagalo o le Atua o le a le toe uia. O vaega uma o lou soifuaga o le a vaaia ai ni suiga ogaoga, e oo lava i manatunatuga ma mafaufauga lilo o lou loto.
O lou taliaina o le faaolataga e ala ia Keriso Iesu, o se filifiliga sili lea ma le taua ua e faia. O se amataga lelei foi lena mo se lumanai manuia mo oe aemaise lau fanau ma lou aiga. E le faatusalia manuia atali o faatali mai mo tatou i mea o loo tatou vaaia e o tatou mata i le taimi nei. E maoae fuafuaga lelei a le Atua mo i latou o e usitaia o ia ma savavali i ona ala. Faataoto 29:11 “O ou manatu mo outou e mo lo tou manuia, ae le o le malaia, ou te manatu ina ia outou maua le iuga e iai le faamoemoe, ua fetalai mai ai le Alii”.
Manatua o lea ua suia ma siitia lo ta tulaga e ala i le maliu o Iesu Keriso. Na avea i tatou ma tagata toilalo i le agasala ma lona mana. Sa tatou nofo sala ma pologa i le agasala. Sa le maua se filemu, sa tatou ola i se siosiomaga mativa ma le tele o tiga ma puapuaga o le tino. Sa leai se faamoemoe. Sa tatou soifua i lalo o le toasa o le Atua. Ae peitai, o le Alofa Tunoa o le Atua, na ia auina mai ai Iesu Keriso ina ia le fano se tasi e faatuatua ia te Ia, a e ia maua e tagata uma le ola.
O le faamalosi a le Taiala mo oe Samoa i lenei vaiaso, aisea ea tatou te uumau ai mea o lenei olaga? O le molimau a Paulo fai mai, ina ua ou maua Keriso o otaota mea uma na. Pe le ua alagatatau nei ona toe fuli le tofa ma tagai ane poo faapefea mai lou soifua? Tatou talisapaia manuia o le Atua e ala i le taliaina o lona alofa tunoa. Filifili nei loa manu o maua lou avanoa. Avea Iesu ma au uo, avea o ia ma Alii ma Faaola i lou soifua, faaafio o Ia i lou loto, o le a le pine ona e vaaia manuia o le Atua i luga o lou soifua.
Manuia tele lenei vaiaso Samoa!
