E lē o ‘alo to‘ele le pulega o le Pacific Ezy Money Transfer i le tali atu i aioiga ma talosaga e oo atu mai faalapotopotoga ma ekalesia mo se fesoasoani tupe mo atinae eseese.
E ui foi ina tau faasoasoa seleni maua a le kamupani lafo tupe ma tala ai seleni faamomoli, ae lē mafai le vaai o le pulega i le fia ofo atu o lana fesoasoani, mo i latou o loo sulufai atu mai lea taimi i lea taimi.
O le faalapotopotoga o le Toomaga mo e Puapuagatia ua lauiloa i ana galuega fesoasoani mo tagata lautele e aafia i faafitauli ma mafatiaga eseese o le soifuaga nei, ma ua lauiloa foi lea faalapotopotoga i le tele o fesoasoani e tafe atu i ai, aemaise e lē o mapu ai le Toomaga i le faia o ana suegatupe e faatino ai ana galuega.
O le fesoasoani a le Pacific Ezy Money Transfer e lima afe tala na faia mo le sailiga tupe a le Toomaga e ta‘ua o le Golden Hearts Award sa faataunuu i le Aso Faraile 16 o Novema 2012 i le maota Samoa o le Iunivesite aoao a le atunuu.
I se pepa o faamatalaga mai le Pacific Ezy Money Transfer na faaalia ai, “E ui lava i le faigata o le faagaioina o pisinisi i lenei vaitau o le soifuaga, ia ae lē tuua ai le fesoasoani masani a le Pacific Ezy Money Transfer i le atunuu aemaise lava ana Charities masani i tausaga taitasi.
O le Aso Faraile na tea nei na tuuina atu ai le meaalofa e $5,000 tala Samoa i le Samoa Victim Support Group a o lumanai ai le latou suegatupe i lea lava afiafi.
Na faaalia e le Faatonu o le kamupani le tofa Faimalo Allan Stowers, ua mae‘a foi ona faia le foai tupe i le Susuga Reverend Victor Pouesi ma le Ekalesia EFKS o le Puaseisei i Magele mo le faatinoina o le polokalame o le sefulutolu aso o le Kerisimasi i lenei tausaga lea o loo toatele isi Ekalesia o loo auai i lenei faamoemoe ia Tesema o tausaga taitasi.
O nisi foai na faia e le kamupani i lenei masina e aofia ai le lagolagoina o le savali a le Afioga i le Ao Mamalu o le tatou malo i le sailiga seleni mo le faalapotopotoga o le Faataua le Ola, faatasi ai ma le $1,000 e lagolago ai le taamilosaga lakapi taitoafitu faavaomalo a le Malisi Sagata Iosefo o lenei tausaga 2012.
“E faafetaia a matou paaga aemaise le atunuu o loo faaaogāina le tautua, auā o nei tupe o le foai foi lea a le Paia o Samoa o loo faaaogāina le tatou tautua mo nei faalapotopotoga o loo faatinoina galuega lelei mo le manuia lautele o le atunuu”, saunoa ai le alii Faatonu o Faimalo Allan Stowers.
