Le Afioga i le Minisita o Aoga, Taaloga ma Aganuu, Loau Solamalemalo Keneti Sio o loo ootiina le lipine e tatala aloaia ai le faleaoga fou o le aoga tulagalua a Lepa

E lē o le faleaoga muamua lenei ua agalelei mai ai le Malo o Iapani e faatupe lona fausiaina. I le molimau mai tausaga ua mavae, o le itu lava tau a’oa’oga o loo ave i ai le faamuamua a le Malo o Iapani mo ana fesoasoani mo le Malo o Samoa. 

O le vaiaso na tea nei lea foi na maitauina le tatala aloaia ai o se faleaoga fou mo le aoga tulagalua i totonu o le afioaga o Lepā. 

E 11 potu aoga fou ma nisi o vaega e faaaogāina e le fanau aoga faatasi ai ma le pa piliki ua siomia atoa ai le faleaoga lenei mo le malupuipuia ai o le fanau aoga i soo se taimi o aoga.

O le faiga paaga lenei a le Malo o Samoa ma le Malo o Iapani lea o loo molimauina le faaauau ai pea ona fesoasoani mai le Malo o Iapani i le fausinaina o le tele o faleaoga i totonu o Samoa. 

O nei fesoasoani o loo tauala mai i le ofisa o le Amepasa o le Malo o Iapani i totonu o le atunuu.

O le tatala aloaia ai o lenei faleaoga fou mo alo ma fanau aoga i Lepā, o se isi lenei laupepa fou i le olaga a’oa’oina o tama ma teine aoga a’o totoe ai le kuata e tasi o lenei tausaga faalea’oa’oga.

O le Afioga i le Alii Palemia, o le tofi foi o le Itumalo lenei o Lepā na saunoa e faafetaia le sao o i latou uma na togimaa i lenei galuega tele. 

Ta’ua e le Alii Palemia ia Tuilaepa Saielele Malielegaoi, o le faatupulaia pea o le fuainumera o fanau e resitala ai i lenei aoga ua mafua ai ona a’e se manatu o le komiti a le aoga ma le afioaga ina ia fausia lenei galuega fou. Faatasi ai ma le anavatau a le afioaga o Lepā ina ia ave ai le faamuamua i aoga a le fanau mo lo latou lumanai manuia.

Na faafetaia foi e Tuilaepa le sao a le aukamuta, o le komiti o le aoga, o mātua ma le mamalu o lo latou afioaga i le lē faalogologo tiga e tusa ai ma le tele o aso sa gapatia ai i lenei galuega tele. Aemaise lava, ia ogatasi ai ma le manulauti a le Malo ina ia galulue faatasi vaega ma itutino uma e unaia le ave o fanau i aoga ona o lea ua lelei atoatoa vaega uma e faatino ai aoga e pei ona iai faleaoga fou i le tele o nuu ma afioaga.

O le Afioga i le Minisita o le Matagaluega o Aoga, Taaloga ma Aganuu ia Loau Solamalemalo Keneti Sio, na ootiina le lipine o lenei faleaoga fou ma ia faafetaia ai foi le sao o le Matagaluega o Aoga e tusa ai ma le galulue faatasi ma komiti o aoga taitasi ina ia faatino vaega lelei uma mo aoga a le fanau.

Na faamanino foi e se tasi o sui o le Komiti a le aoga lenei a Lepā, le faaaogā uma ma le tatau o seleni na faamatuu mai e le Malo o Iapani e fausia ai lenei faleaoga fou, ma e leai se seleni na totoe mai ai i le fesoasoani a le Malo o Iapani.

O le lu’itau foi a le Amepasa o Iapani i totonu o Samoa na ia ta’ua ai, e tatau ona maua atu i lenei faleaoga fou nisi ta’ita’i o Samoa i le lumanai e pei foi ona iai le Palemia o Samoa o loo iai nei, o se tasi o tamafanau mai le afioaga lenei o Lepā.