O loo faaauau finauga a le Kamupani Vaalele a le atunuu, le Polenisia ma le Kamupani Vaalele o le Polyblue i le faaauau ai ona tautuaina e se kamupani Tonga o le vaaiga o vaalele a le Polynesian Blue o loo malaga mai i Samoa.
O se finauga na laga i le amataga o le tausaga ina ua faafaigaluega e le Kamupani Vaalele a le Polynesian Blue se kamupani o inisinia vaalele mai i Tonga le Palu Aviations e tautuaina a latou vaalele pe a tulaueleele i le malae vaalele i Faleolo.
E tulai mai lea suiga ae faato‘ā mae‘a foi ona faamautu e le Ea Niu Sila le ave o ana galuega tau faatinoga o femalagaiga uma i se isi foi kamupani e ese mai i le Polenisia ma ana tagata faigaluega.
O le tulaga la e pei ona iai le tuutuuga a le Polynesian Blue, ua lē mafai ai lava ona toe lotea e ni inisinia Samoa a le Polenisia ni vaalele a lea kamupani pe a tulaueleele i Samoa.
O le finauga a le Kamupani Vaalele o le Polenisia, o loo manino lava tulafono o le faafaigaluega ai o kamupani mai fafo poo tagata faigaluega mai fafo. E faato‘ā fai lea tulaga pe afai ua lē maua nisi e iai le tomai faapitoa e faatino ai galuega i totonu o Samoa.
O le mau a le Afioga Tauā Fatu Tielu, o loo tele le tomai i inisinia Samoa o loo galulue ai i le Malaevaalele ma o se galuega lenei o le tautuaina o vaalele e ala i siaki ma galuega faainisinia ua autausagā o faatino lava e alo o Samoa o loo galulue ai i Faleolo.
O le agai la a le Polynesian Blue i se isi kamupani ma ni tagata faigaluega mai fafo na ta‘ua e Tauā e lē o ogatusa ma aiaiga o le faatinoga o galuega i totonu o Samoa.
“Faapea lava a‘u ia, o loo manino lava lea tulaga i le faatinoga o auaunaga i totonu o Samoa,” o se saunoaga lea a le alii Ofisa Sili o le Polenisia.
Na faatautaia ni talanoaga i le vaiaso na tea nei e faatatau lava i lenei mataupu ma e mae‘a lava e leai se tasi o maua.
O le finauga a le kamupani o le Polynesian Blue, o loo iai le saolotoga e mafai ai ona o latou agai i se isi kamupani ese poo ni tagata faigluega foi mai fafo e faatino ai le latou auaunaga.
O loo iai lipoti faapea o le tau o le auaunaga o loo ofo atu i Tonga e taugofie atu i lo le tupe sa totogi ai e le Polynesian Blue inisinia Samoa. E ui i lea o loo tumau lava le manaoga o le Polynesian Blue i ana inisinia mai Tonga.
O lea la ua iai nei se mafaufauga i le alii Ofisa Sili o le Polenisia, o le a agai sa‘o loa e saili se fautuaga faaletulafono i lenei mataupu auā o lea e lē o maua lava se maliega i faatalatalanoaga ua mae‘a ona faatautaia.
