O loo ua faagasolo asiasiga a le vaega o suesuega o fua o faatoaga i Nuu auā le tau saili o se fofo i le aafia ai o nisi o maumaga talo i le itumalo o Lotofaga ma se vaega o Falealili ua lipotia atu le aafia i faama‘i o ia faatoaga.
O se tasi o faifaatoaga mai i Lotofaga ua ta‘ua le tele o le aafiaga o lea faama‘i o le anufe ua aafia ai maumaga na matuā tele le faamoemoega o atinae o aiga ua maua mai ai.
O le faifaatoaga lenei sa agai lava i Amerika Samoa ana to‘aga ma o loo faapea foi ona agai i isi maketi fou ua faamautu mai i Niu Sila peitai o le vave o le sosolo o le faama‘i ua faatamaia ai le tele o vaega o ana to‘aga ua molimauina ai le mafatia tele ma o se tasi o ona alo ua moomia le pili i le Iunivesite Aoao o Samoa ua lē mafai ona faaauau lana aoga ona ua le o toe gafatia le pili aoga.
E fai tagata faigaluega ma o loo totogi foi ma o le taimi lenei ua ia ta‘ua ua latalata nei ina vāea lana aufaigaluega ona o le lē o toe lava o se tupe maua i le faama‘ia ai o ana talo. E le na o ia foi ae e agai mai i Lotofaga lenei faifaatoaga. Ua toatele nisi ua aafia uma to‘aga tetele i le anufe lea ua matuā lepeti ai le tele o tiapula.
O le sailiga na agai i le Ofisa o Faatoaga ma e lei manino lelei nisi i lea faafitauli ma lona tulai mai i le taimi lenei peitai na ta‘ua e Iuma Mulitalo o se tasi o nafa ma faama’i o fua o faatoaga si le vaega lea o suesuega i Nuu, ma ta‘ua ai e lea foi tamalii o loo suesue pea i le taimi lenei le mafuaaga ma le taumafaiga ina ia vave foia le faafitauli.
Ta‘ua e Iuma o le anufe o le fofo o loo fautuaina fai faatoaga ina ia agai e faatino o le avane o se paelo ae salu i ai le anufe o loo pipii i lau talo a faapea o loo sosolo lava le maua o lea manu faalafua ona sala ese atoa lea o le lau talo. O loo iai foi togafitiga e mafai ona tui ai le tiapula ma tape ai le sosolo o le anufe.
“E iai lava taimi o le tausaga e molimauina ai i nisi o talo nei faama‘i, o lea ua iai le tali atu i le faama‘i o le lega lea na muai aafia ai lava le talo a le atunuu ae o talo mo le auina atu i fafo lea ua maua i le taimi lenei – Samoa 1 e oo i le Samoa 5 – o talo nei ua agai i ai le ofisa ina ia mautinoa le lelei atoatoa ma le mamao ese ma faama‘i e pei ona ta‘ua,” o se saunoaga lea a lea sui o le ofisa i Nuu.
“O loo fai pea i ai suesuega ae o le tulaga tāua lava ina ia togafitia lea faafitauli ae ia tele pea le talo e maua ma faafailele mai mo faifaatoaga latou te totoina”. Faaalia e le alii lenei ua tele le suiga o maumaga i lenei vaitaimi ma tausaga e tele ua tuanai ona ua le o toe to’atele foi le atunuu ua toe gafatia le galueaina o fanua mo le talo auina atu i fafo, poo maumaga tetele ma e na o se numera laititi lava o loo faaauau le faatino o lea tulaga.
Faaalia foi e lenei ofisa a lē mafai ona faatino e tagata faigaluega lenei auala o loo iai vailaau o loo maua i le faleoloa o faatoaga e tali atu ai i lea faama‘i aemaise o le mau faama‘i e mafai ona vaaia i le matai‘ai a le atunuu.
O le atugaluga lava o le lelei o le toe foi mai o le talo ma le faamautu ai o maketi i fafo e toe la‘u i ai le talo lenei mai i Samoa ae o lea foi ua agiga mai lipoti o ni faama‘i ma le ono aafia ai o lenei foi matai‘ai na tele tausaga o toe agai le Matagaluega o Faatoaga ina ia toe faaleleia ma faatau atu i fafo.
O le tele o le talo ina ua aafia Samoa i le faama‘i o le lega na aumai i Asia ma o Alafua i le Aoga o Faatoaga a le Iunivesite o le Pasefika i Saute lea na amata ona faafailele mai ai le tele o tiapula. Na faapea foi ona faasoa atu i Nuu ma tufa ai loa i faifaatoaga mo le faataitai ai.
O lea la ua vaaia le malosi o le toe foi mai o le talo i le atunuu ma ua agai atu foi i fafo – o le faamoemoe o le Matagaluega o Faatoaga ina ia aua ne‘i toe tulai mai se faama‘i e pei o le lega e lepeti atoa ai taumafaiga ua tele tausaga o punouai le matagaluega aemaise o le au faifaatoaga ina ia toe faamalosia.
O loo avanoa le ofisa i Nuu mo le fesoasoani e mafai ona ofo atu i le mamalu o le aufaifaatoaga ua afaina a latou atina‘e ona o lenei tulaga.