O le aso 14 o Novema lea e toe agai ai le afioaga o Fausaga i le Faamasinoga o Fanua ma Suafa i se mataupu na tulai mai i ni nai masina ua tuanai, na faatea ese ai e le afioaga le faifeau Aso Fitu Tutoatasi (SISDAC) ona o ni lafoga na faia e se sui o le aulotu e faatatau i tagata o le afioaga.
O le toe laga o lea mataupu ona ua ave e ni sui lava o le afioaga le nuu i lea faaiuga, o le faatulai ese o le faifeau a le latou aulotu. O le mau a nei sui ua oia le aiā tatau e tapua’i ai e pei ona faamalosia e le Faavae o le Malo Tutoatasi o Samoa.
O lafoga na faia ma nisi o mataupu ua tulai mai i le va o le afioaga atoa ai sui o lea aulotu i totonu o le afioaga, lea na iu lava i le faaiuga na faia e le nuu.
O lafoga na faia e le failauga a le aulotu i se isi potopotoga faalelotu na aofia ai faamatalaga faapea e iai le taimi e olopala ai le afioaga, e lē gata i lea o agaga o nisi o le afioaga ua lē agai sa‘o i le lagi ae ua feoai solo i totonu lava o afioaga. O ni lafoga na manino ai le lē fiafia o le afioaga ma iu ai lava ina faia le faaiuga e pei ona toe agai ai nei i le faamasinoga.
O le finagalo o le nuu o le faia o nei lafoga ua lepeti ai le nofo filemu o le nuu ma e ono tulai mai ai ni vevesi i le va nonofo ai o talitonuga lotu i totonu lava o lenei afioaga o le atu Safata.
O lea la e tālia i le Aso Lulu le faaulu atu o le talosaga lenei a sui e toalua ua lu‘iina le faaiuga a le afioaga ma se tali foi a le afioaga latou i lenei mataupu.
Faaalia e sui nei o le aulotu i totonu o Fausaga ia ua ave le mataupu i le Faamasinoga o Fanua ma Suafa, talu ona tulai mai lea faaiuga ua tau savali atu lava le faifeau e faatino galuega faafaifeau i le latou aulotu.
Ta‘ua foi e nei sui e lei talia lava lenei lotu i totonu o le afioaga e ui sa iai foi nisi mataupu faapea na oo lava i le faamasinoga ina ia faataga ai le faatuina o le lotu i totonu o le afioaga.
E faaauau le manatu o nei sui e lei talia lava le latou talitonuga i totonu o le afioaga ma o se tasi lenei o faataitaiga o le faaiuga na faia i le latou faifeau. O le mafuaaga lea ua tapa ai se fesoasoani a le Faamasinoga o Fanua ma Suafa ina ia faatumau le manaoga o nei sui o le afioaga e faaauau le latou lotu i totonu o Fausaga.
