Agai Falelatai e lesitala ana tulafono ma faasalaga

Ua faasalalauina nei e Alii ma Faipule o Falelatai le pule faamauina o Tapu e faasino i solitulafono ma agasala e tatau i tagata o le afioaga ona silafia ma usitaia e pei ona faamoemoe e pule faamau faaletulafono.

Ua aofia ai i ia agasala ma solitulafono le tetee i le Afioga Tutasi, le tali atu ma le faamasinosino o le Afioga Tutasi i le taimi e faatino ai, o le faasiliaupule ma le faamaualuga i le nuu poo le va paia o Aiga ma Tuimalealiifano, o le faatu o se faiganuu fou i totonu o le nuu, ma le soli o le va ma Faafeagaiga poo Faifeau.

Ua aiaia foi i lea pule faamau le solitulafono o se tagata na te faatu se lotu fou e ese mai lotu ua iai nei i totonu o le afioaga e pei ona lua lotu i Matautu o le EFKS ma le Katoliko, ae tolu i Siufaga o le EFKS, Katoliko ma le Ekalesia a Iesu Keriso o le Au Paia o Aso e Gata Ai poo le Mamona. Ua faamamafa i lea aiaiga le tapu ona toe talia nisi lotu fou e faaulufale i Falelatai aemaise lava i afioaga o Matautu ma Siufaga seia vaganā ua faatagaina e Aiga ma Tuimalealiifano.

O isi solitulafono ma agasala o loo faalauiloa i lalo o le vaega o le faasalalauga a Alii ma Faipule, o loo faasalalau i le nusipepa o le Savali o le aso 28 o Aukuso 2011, o le solitulafono o se tagata e pule i meatotino a le nuu ma le lotu, le faaoo o le maliu i se tagata, umia o laau faasāina faapea le toto o laau faasāina, o le solitofaga, mulilua, feusuaiga matagā ma fanau, o feusuaiga faamalosi ma alo tamaitai o le nuu, atoa ai ma isi solitulafono matuia o loo aiaia i le Tulafono a le Malo.

E lē ese Falelatai ma isi afioaga o le atunuu i le faia o faasalaga e pei ona pule faamau faaletulafono faasalaga a le afioaga mo i latou e solia, e pei ona soloa i le au fuefue poo le tafi ma le lau.

“Afai ae oo i le tulafono se tetee i le afioga Tutasi ma ua lē mafai ona faataunuu faasalaga e iai le soloa i le au fuefue poo le tafi ma le lau, ona nofo pea lea o le tagata i lona fanua ma pule pea i ana meatotino e tusa ma lana aiā tatau seia oo i lona maliu ae lē toe auai pe toe taliaina sea tagata ma lona aiga i le nuu o Tuimalealiifano e oo i lona iuga, vaganā lava ua faia se isi faaiuga a Aiga ma Tuimalealiifano poo Alii ma Faipule o faiganuu e lua ina ia toe faaa’e ai lea tagata i le nuu poo se faiganuu”.

 

Aiā Tatau o tagata

O se tasi lea o vaega tāua o loo aiaia i le Faavae o le Malo Tutoatasi, o le aiā faaletagata soifua. O le faaiuga a lea afioaga i le aia tatau ua faaalia ai i le faasalalauga faapule faamau e faapea: “E gata le aiā tatau a le tagata i lona toalua ma lana fanau ma lona fale ma lona lava fanua. E pule pea le tagata i ana meatotino ma nofo pea i lona fale, ae lē mafai ona oo atu sana aiā tatau i le Pule a Aiga ma Tuimalealiifano e ona le nuu poo le pule a Alii ma Faipule o faiganuu e lua. Afai e tetee isi i se tagata poo se aiga i lea pule, ona nofo sala lea i le va ma Aiga ma Tuimalealiifano”.

I le faasalalauga a le afioaga o loo faaalia ai, ua faia e Falelatai le faasalalauga ma le faaeteete auā lava le puipuia o le mamalu ma paia o le Aiga Tauaaana ma le latou Tama e tusa ai ma lona faavae ma lana Afioga Tutasi e malu ai le nuu aemaise o le talalelei a le Atua.

O le afioga i le Tama Aiga, Tuimalealiifano Vaaleto’a Sualauvi II o loo sainia lea pule faamau faatasi ai ma nisi o matai o le afioaga, e aofia ai le afioga Anae Misa Pita II, Lealaitagomoa Malie, Taefu Lemi ma Faalavaau Itaifafo.