E lagona le agaga faafetai ma le faamalo ia i latou sa opogi le taumafaiga vaivai a lenei leitio Siufofoga o le Penina o Asuisui.
E uma upu ma tala ae lē taitai ona uma le agaga fia faafetai i le paia ma le mamalu o le atunuu i Brisbane i soo se faamoemoe e faatalauula ai lenei auaunaga, e le talitualimaina. Viia le Atua i Lona Mana faaaliali o loo maua ai le agaga fia foai.
O lenei faamoemoe sa faataunuuina i le po o le Aso Toonai 23 o Mati, lea sa auai mai ai le susuga i le toeaina ia Rev Faiumu Pio Faletuai mai Melepone.
Sa malaga mai le toeaina i nisi o tuatuagia ma faapea ona auai e molimauina le faamoemoe ua maualuga ma mamalu ai le po fiafia. E sisi lava le faamalama o le Isaraelu moni ma vaai i lona nuu, aemaise tauaiga.
E momoli foi le faafetai i tagata taitoatasi faapea le Aiga Samoa i Logan City, ua lē tasi ae ua lasi lo outou agalelei.
Tau ina ia faatutumu e le Atua mea ua faagaogao ona o lo outou alolofa moni i lenei alaleo vaivai auā le tautua ia Samoa i Brisbane faapea nisi vaega o au atu i ai lenei tautua faatauvaa. E lē gata i lea o leitiofoni i tausaga uma, Faafetai! Faafetai! Faafetai le agaga foai.!
Alofagia e le Atua ma faatutumu o outou falesaito. O le po atoa sa faafoeina e le susuga ia Seiuli Pesa Ilimaleota (sui faasalalau) se tasi foi o alii pese lauiloa i le musika. Sa lagolagosua le susuga ia Site Ah See faapea le tofa ia Faletuai Notoa Tafi Faletuai i nisi vaega o le po.
Mai le ta‘ele o matou fatu ma agaga e matou te talitonu e leai se vaa e atoa ni ona atu ae magalo le aufaigaluega vaivai i lo outou titi faitama.
Ia avea le toto paia o le Tamai Mamoe o le a faamanatuina e le lalolagi e magalo ai ni aleu. Faafetai lava ma saga faamanuia pea le Atua.
