E 300 ma ona tupu le aofai o tagata e aofia ai fanau i Samoa e iai manaoga faapitoa.
O lea aofaiga tele ua pine faamau ai le faatupulaia pea o le numela o i latou e aafia ni vaega o o latou tino ma le mafaufau i ni tulaga faigata ma e manaomia ai pea se auaunaga mo le vaaia lelei o i latou aemaise o le itu i togafitiga ma auaunaga faalesoifua maloloina.
O le galuega lea o loo faia e le sosaiete o le Loto Taumafai ua iai ma le aoga mo i latou e iai manaoga faapitoa.
O se galuega ua mafai ona faatino ona o fesoasoani mai faalapotopotoga ma atunuu i fafo ua faafaigaluega ai nisi ua iai tomai aoaoina mo le faia o ni togafitiga mo fanau e iai manaoga faapitoa.
Ua faaalia e le faatonu o le sosaiete o le pule foi lea o le Loto Taumafai le afioga Letaa Daniel Devoe, o loo manaomia le lagolago atu a mātua o i latou e iai manaoga faapitoa i le latou galuega.
“E tusa ma le selau aiga e asia e le matou polokalame o le early childhood intervention ma o se polokalame o loo taumafai ai e ofo ni gaaluega tau togafitiga mo nai fanau ua iai faaletonu i o latou tino aemaise lava nai fanau e aafia i le taimi e lei fananau mai”, na saunoa ai Letaa.
O le autū lea na valaau ai e le sosaiete se mafutaga faaleaoaoga ma mātua o fanau e iai manaoga faapitoa i se taumafaiga e faailoa i ai le tāua o le latou lagolago ma logologo foi i ai nisi o vaega tāua i le vaaia o a latou fanau.
“O nai fanau nei e faigata tele le vaaiga ma o le isi lea agaga fiafia ona ua ofo mai le Malo o Saina e fausia se faleaoga ma se nofoaga autū mo nai fanau nei”.
O se fanua o le Malo i Vaitele o le a fausia ai lea aoga ma o le siitia i ai le aoga a le Loto Taumafai o loo i Motootua.
“E faafetaia ai lava lo tatou Malo aemaise le afioga i le Palemia ona o le faiga paaga a Samoa ma Saina lea ua auala mai ai le fesoasonai mo matou”.
O loo tālia nei feuiuiaiga i le tusia o le ata o le faleaoga ma le nofoaga autū mo i latou e iai manaoga faapitoa ona iloa ai lea o se tau o le galuega ma le taimi e amata ai.
“O le faatāua foi lea ua ave e lo tatou Malo ia i latou e iai manaoga faapitoa ia aoaoina lelei”. O le tausaga fou o le a siitia ai i le vasega 9 le aoga a le Loto Taumafai ma le faamoemoe ia faaopoopo le vasega tausaga 10.
Ae mo fanau e iai manaoga faapitoa e fia ulufale i isi aoga e aoaoina faatasi ma fanau e atoatoa le malosi o le tino ma le mafaufau, na faaalia e Letaa o le avanoa lea e tuu saoloto auā ua mafai ona aooga faatasi fanau e iai manaoga faapitoa ma fanau e atoatoa.
O se isi laasaga i faiga faavae tau aoaoga a le Malo ua aooga faatasi ai fanau. O aso ua mavae sa ese lava le aoga mo fanau e iai manaoga faapitoa ae peitai o lea ua iai le suiga.
