E ui ina solosolo lelei le galuega ma le soifuaga i Niu Sila, peitai sa le mafai ai lava ona aveesea le lagona ma le fatu, o le tamaitai Samoa moni lava. Sa iai lava le lagona ma le manatu maualuga e fia tautua pea ma galue mo lona atunuu. O lagona ia sa faaosofia ai pea le loto ma le mafaufau, ma iu ai ina toe foi e saili se avanoa e tautua ai mo le atunuu.
O le toe taunuu ai i Samoa, ona galue ai lea i le falemai i Motootua ma faaauau ai le galuega faatausimai pasi e pei ona sa aoaoina ai. E tele se sao mo le galuega i le atunuu ona o le tamaoaiga ma le lava saunia i metotia ma agavaa sa aoaoina ai ma galue i Niu Sila.
O le iai i Samoa, o se taimi taua tele, ona ua mafai ona faataitai ai le tulaga sa faafoeina ai galuega i fafo, ma tufa atu ai lea agavaa mo nisi o tamaitai sa galulue ai faatasi i lea vaitaimi i le galuega lava faatausimai pasi, i le falemai tele o le atunuu.
E le gata i le faasoa atu o le tomai i le galuega mo isi tamaitai, a o se auupega malosi tele foi mo le matagaluega ma le falemai, ona o le iai o se isi e mafai ona galue ma tauaveina tulaga uma faatausimai pasi, ma le isi vaega o le galuega e pei o le faatosaga sei tulou.
O se tasi lea o tulaga sa le faigofie ona maua i lea vaitaimi, ma e seasea foi ona mafai ona faatinoina e teine tausimai, peitai sa mafai ona tautua ai le tamaitai o le atunuu lava latou ia, e aunoa ma le toe vaavaai mai i fafo, mo nisi e faatautaia ia ituaiga galuega.
O le a toe faaauau atu le soifua galue atoa ai ma galuega a le afioga ia Leaupepe Taulapapa Faimaala i le vaiaso fou. O le a e silasila ma faitau i nisi o matatia sa ausia e lea foi tamalii o le atunuu, a o iai pea i lona soifua galue mo Samoa.
Sa avea ma sui o le palemene ina ua filifilia e le itumalo o Palauli i Sisifo e fai mo latou faipule.
E tolu nofoaiga sosoo sa auai Faimaala o se sui faipule i upufai o le malo o Samoa. E lua nofoaiga sa ia tauavea ai le tofi mai le motu tele i Salafai, ae tasi le nofoaiga sa avea ai ma sui o Fasitoo.
O le tausaga e 1970 sa uluai avea ai ma sui a faipule, ma ulufale ai loa i faiga faapolokiki i lena vaitaimi. Ao avea ai ma sui o le palemene, sa faapea foi ona faaee iai se isi tofiga i totonu lava o le maota fono, i le tulaga o le sui fofoga fetalai o le maota, i le malae o le faautugatagi a Samoa.
O le nofoaiga muamua a Faimaala talu ona filiflia ma suia faipule, ao le faatoa lona tolu ai lena o paeaiga a le malo talu ona tutoatasi mai le tausaga e 1962. O le uluai palemia o Samoa i lena vaitaimi o le
