O Leaupepe Taulapapa Fuatino Faimaala Vaovasamanaia Filipo, (Phillips) na soifua ae i le afioaga i Fasitoo i le tausaga e 1932. A o lei auiliiliina le soifuaga o lenei tamalii ma le faamatalaina o lona soifua, o sina faamatalaga i le uiga o le suafa Faimaala, o lona igoa muamua lea a o lei faaeeina i ai mamalu i suafa matai e pei ona iloa ai. O le igoa Faimaala, e faamatalaina faapea, Faimaala i aiga Tuala Fasitoo i le Falefitu ma Fasitoo. O le uiga o le igoa Faimaala ma lona faamatalaina, sa faatauaina tele ona sa fesootai lelei ma le tulaga sa faaeaina ai, ina ua faaee ma avea ma taupou o le afioaga i Fasitoo, i le suafa Fuatino, ina ua faatoa 16 tausaga o lona soifua.
O lona aiga tama o Fasitoo-uta, a o lona aiga tina o Taga i Savaii.
Soifua aoaoina
Sa aoaoina mai le aoga a Leifiifi, ona sosoo ai lea ma le ulufale atu i le Kolisi o Samoa, mulimuli ane sa toe ulufale i le kolisi i St Marys. Sa faaiuina aoga i Samoa, peitai e lei tapunia ai isi avanoa sa matala pea e faaauau ai aoga i atunuu i fafo mai o Samoa.
O Niu Sila le atunuu sa maua ai le avanoa o Faimaala mo nisi o aoaoga. E lei mafai ona vailiili atili e le tatou polokalame aoga i Niu Sila sa faaauau ai le soifua aoaoina a o iai pea o se tamaitai.
O le soifua aoaoina o Faimaala sa faamae’a i Niu Sila, i le taimi sa avea ai ma tamaitai tausimai pasi o le matagaluega o le soifua maloloina i Samoa. E mafai ona e faitauina i le vaega o le soifua galue ma galuega o loo pito i lalo.
Soifua galue/Galuega
Ina ua mae’a ana aoaoga, sa galue ai loa o se tamaitai tausimai pasi mo le falemai i Motootua. Sa toe maua foi le avanoa e faalautele ai le tomai faafomai tausimai pasi (registered nurse) i Niu Sila.
E le gata i le faalauteleina o le tomai mo galuega faatausimai, ae o lea lava foi taimi sa aoaoina ai ma le tulaga i le faafaileleina o pepe, poo le faatosaga (midwife).
O le aai i Dunedin, o Ueligitone, Aukilani ma Gisborne, o nisi ia o nuu sa faataunuu ai suesuega ma aoaoga, ae sa galue ai foi Faimaala mo le faalauteleina o le tomai ma le agavaa i le galuega faapolofesa sa galue ai, o se tamaitai tausimai pasi.
Na mae’a se taimi umi sa nofo ai ma galue i lea lava galuega i Niu Sila, ona e e pei ona e silasila ane i le tele o nuu ma falemai sa tautua ai Faimaala a o lei toe taliu i Samoa.
