Talofa lava Samoa, malo lava le folau manuia, e avea foi lenei avanoa taua e faamanuia atu ai le Eseta, ma lona faamanatuina i lenei foi tausaga, i le maliu ma le toe soifua manumalo mai o lo tatou Alii manumalo. E iai le faamoemoe sa tatou maua se taimi lelei ma le toafilemu i aiga ma fanau, maua foi se isi faasiliga malosi e faaauau ai la tatou faigamalaga mo le lumanai.
Ae iai le talitonuga sa tatou maua se aoaoga taua ma se faamalosiau, a o ni luitau taua, mai le soifuaga o le susuga i le faafeagaiga ia Maligi Evile e pei ona momoli atu ia tatou tusitusiga e lua ua tuanai.
Faafetai tele mo lea foi auauna ma lona soifua tautua, ua faaiu ai i le soifua galue mo le Atua ma lana galuega. O le faafetai faapitoa foi ona o le ofoina mai o lona taimi atoa ai ma faamatalaga uma tau ia te ia lava, e fesoasoani mai ai i le faatalauula atu a le auaunaga nei, mo galuega i luga o le Samoa Times.O lenei vaiaso o le a sei vavae foe o le tatou tusitusiga, sei o tatou vaavaai ma faitau nisi o faamanuiaga o loo i le itupa o tamaitai ma tina o le atunuu. O tina ma le itupa vaivai e pei ona faaigoa ai e nisi, peitai e tulituliloa e le Samoa Times, se tasi o uputuu a le atunuu, ma o loo faamaonia e oo mai lava i lenei vaitaimi o loo iai ona pine faamau ma faamaoniga, ‘E au le ina’ilau a tina’.
O lona uiga e foliga mai e malolosi tele tina. O le afioga ia Leaupepe Taulapapa Faimaala, o se tasi o tina e tele foi sona sao e le gata i galuega sa galue ai, ae sa oo lava foi i totonu o upufai o le malo tutoatasi o Samoa.
O le a silasila ma faitau i nisi o vaega taua sa ausia e lenei tina, vaeane ona mamalu i suafa aua le faafeagai ai ma le tausiaina o aiga ma nuu faapea le atunuu.
E lei gata i tulaga sa faaeaina ai, ae sa mafuta foi i se tasi o tama sa iloga lona tulai mai i lea vaitaimi i totonu o le faiga malo a Samoa. O le afioga ia Vaovasamanaia Filipo sa avea ma minisita o tupe a le malo mo se taimi umi, ae o ia o se Loia ma Faamasino i le matagaluega o faamasinoga a le atunuu.
