Na alu tupe a le Malo e faafou ai le maota i Tuaefu ao avea le afioga i le Tui Atua ma Ao o le Malo, peitai e le’o iai se faamatalaga mai le Malo poo le a tonu le faiga o lea tulaga aua e le’o faaaogaina lea maota mo le Ao o le Malo ua seei nei i le tofiga. O le maota o le Malo i Vailele sa fausia i le taimi o seei le afioga ile Tapaau Faasisina susuga Malietoa Tanumafili II ile tofiga ina ua ave le maota i Vailima sa avea ma maota faalemalo o le Ao Mamalu o le Malo e fai ma fale mata’aga. Talu ona fausia le maota i Vailele i lea taimi e lei afio ai le susuga Malietoa ae sa faaaoga se tasi o maota i Motootua e faia ai sauniga uma e tusa ma ona tiute o le Ao o le Malo.
Ina ua filifilia le afioga i le Tui A’ana Tuimalealiifano e avea ma Ao o le Malo sa iai le finagalo o le Malo e sili ona faafou ma toe fau nisi potu faaopoopo o le Maota i Vailele e afio tumau ai le Tui A’ana poo le afioga i le Tamaaiga ma lana Masiofo mo le faataunuuina o lo la valaauina i le tofiga Ao Mamalu o le Malo. E $400 afe tala le tupe na faaalu ai. Na faaalia e le Palemia susuga Tuila’epa L Sailele Malielegaoi, na manatu le Malo ile taimi na ave ai le maota i Vailima e fai ai le fale mata’aga e fau loa se fale lelei mo le Ao o le Malo lea na tusia ai e inisinia ma le au tusiata a le Matagaluega o Galuega a le Malo le ata.
Na faailoa e Tuila’epa na avatu le ata i le kapeneta ose maota matagofie tele, peitai ina ua maea ona fau le fale na matua eseese mamao le manaia o le ata ma le fale ua tu mai. Na saunoa le palemia ma ia faaalia na iloa le faavalevalea o tusi ata ma inisinia a le Malo. Sa tatau ona tusi se ata o se maota fogafalelua tele e talafeagai lelei mo le Ao o le Malo e pei ona faaalia e Tuilaepa i lana saunoaga na tatala aloaia ai le toe faafouina ma le faaopoopoina o nisi o potu o le maota i Vailele.
Na faamalulu le palemia i le Tama Aiga ma lana masiofo ona o le galuega ua tuai ona afifio ai i le maota o le Malo i Vailele aua sa mamao tele lona aiga i Matautu Falelatai sa faamautu ai ma tau savali e faatino o la tiute e tusa o lo la tofiga. Na molimauina le fiafia o le Tamaaiga ma lana Masiofo ina ua latalata le nofoaga ua faamautu ai i le tele o la tiute e faatino aemaise lava o sauniga e tauaao ai tusi faamaonia o sui o Malo mai fafo.
