Ua iai se tala fiafia mo le Samoa Athletics ina ua maua le Pine auro a Kelvin Tuiala Masoe i le Long Jump. Ana leai Masoe semanu e misi atoa Athletics Samoa i pine auro a le Athletics. O le auro a Masoe e faaopoopo lea i lana pine siliva na maua i le Fu’a, 4×100 relay, ma le apamemea na maua i le 100m.
E na’o le valu pine a Samoa na maua i le afeleti, e tasi le pine auro, fa siliva ma apamemea e tolu. O pine uma na maua e tama ae e leai se pine a teine. O Papua New Guinea, Fiti ma New Caledonia na tu mauga i tauvaga afeleti.
O le oso a Kelvin 7.65 o le matati’a fou lea ua faatu e ia mo Samoa. E sili mamao atu lea i lana oso 6.49m na sao ai i le tauvaga faaiu. O le oso lona lua a Masoe i le tauvaga faaiu na maua ai le 7.10m le umi ma ofi ai i le tulaga o le pine siliva. Peitai, i le oso mulimuli na toe faaopoopo ai le isi 55cm, o se tulaga maoa’e lea ma manumalo ai Masoe i le pine auro i le oso faaiu e 7.65m.
Na ta’ua e Kelvin na fautuaina o ia e le faiaoga Ah Chong Sam Ah Chong e faamaualuga lana oso auā e toso e le maualuga le umi. O lana mea foi lena na fai i le taimi na oso ai i tauvaga faaiu. O le mamao na ausia e Masoe na fosi ai le oso a le sui a Papua New Guinea ma New Caledonia. E lei faaaogāina oso lona tolu a le toalua lea ma malo ai Masoe i le Pine auro. E lē o se taaloga tauva masani lenei a Masoe, e oo foi i le taaloga faaiu, na tuu e tamoe Kelvin i le 4x200m relay ae na toe sui e Ah Chong le polokalame e tauva Masoe i le oso mamao. O Marvin Delaunay-Belleville of New Caledonia na tu lua, ae tu tolu Peniel Richard of Papua New Guinea. O laua ia na faitau e manumalo i le pine auro ma le siliva.
Pine Afeleti a Samoa
Gold: Kelvin Masoe Long Jump
Silver: Men’s 4×100 relay; Jeremy Dodson 100m, Jeremy Dodson 200m; Laurence Faapoi Tasi Men’s Javelin
Bronze: Kelvin Masoe 100m, Kolone Pita Alefosio 110m hurdles; Nathaniel Sulupo Men’s Shotput
