Ua tele a‘oa‘oga ua faatautaia ma faalauiloa ai le aafia o tina ma fanau teine i siama eseese ua maua i Samoa e mafua mai i feusuaiga.
Ua faalauiloa atugaluga ma popolega ae e foliga mai o nei taumafaiga ua pei o le pa‘u o le timu i le tua o le pato. E foliga mai e lē o tau tonu i agaga o le toatele le leaga o le tulaga ua iai Samoa pe a faatusa i isi atunuu pe a talanoaina loa gasegase o feusuaiga.
“O le tatou va nonofo ai atonu o le isi lava lea tulaga faigata, ona o le va tapuia faaleaganuu,” o se faaaliga lea a le Afioga Faumuina Manu Samuelu, lē o loo faauluulu i ai a‘oa‘oga o loo faagasolo nei a le Faalapotopotoga o le Soifua Manuia a Samoa ina ua talanoaina le mataupu o le toatele o tamaitai o Samoa ua aafia i gasegase e mafua mai ona o feusuaiga.
O le folasaga i le fono a Taitai tamaitai o Samoa na lāgā ai i le masina lenei ua tusa o le tasi vaetolu (1/3) o tamaitai ua fai o latou aiga, ma tamaitai ua fai a latou uo, ua maua i siama ua mafua mai ona o feusuaiga. E tele siama ua feaveai e nisi o tamaitai ae o le faigata lava ona e lē o mafai ona suesue uma tamaitai fai toalua poo tamaitai fai uo.
“Ua fā tausaga o unai a‘oa‘oga, e lē gata i lenei Sosaiete ae faapea foi le Soifua Maloloina i ona vaega eseese, ae e lē o toatele lava o agai i falemai e siaki. Seiloga lava ua agai mai tina maitaga e siaki o latou manava, o inā e tele ina maua ai o loo tauave e tamaitai siama nei ua mafua mai ona o feusuaiga poo ma‘iafi se‘i tulou”.
O le ogaoga tele o lenei mataupu na lāgā ai e Minisita o le Kapeneta ina ua faatautaia se fono a ta‘ita‘i tamaitai i le vaiaso ua tea. Na lāgā ai le popolega ona ua matuā faatuputupulaia le numera o tamaitai ua aafia.
O se molimau a le Soifua Manuia o Samoa, e lē na o tamaitai ua faitoalua, ae ua toatele foi le tupulaga talavou o loo a‘oa‘oina i aoga maualuluga ua oo atu mo siaki ma ua maua ai i nei gasegase.
Aisea ua fiu ai e unai le mataupu ae foliga e lē o amanaia lava?
O le tali a le Faalapotopotoga mo le Soifua Manuia o Aiga, e lē o atoatoa le momoliga o le feau i le matautia o siama nei. “E afeifei lava faamatalaga ma ua lē maua ai e tina ma tamaitai le atoaga o le feau lea e fia momoli atu, ma ou te talitonu lava o le tatou aganuu lea e faapea ai auā e tau afeifei tala pe a iai faatasi sui o aiga i se mafutaga e tasi,” o se faaaliga lea a Faumuina.
O faamaumauga a le Faalapotopotoga o le Soifua Manuia o Aiga i Samoa mai ia Ianuari seia oo mai ia Novema, o tina lava ia na oo atu e siaki ma maua ai siama o ma‘iafi ua faaalia ai o le siama o le Glamydia lea e matuā toatele ua aafia ai, ona sosoo lea o le siama o le Gohorrhea ae e ese isi siama matautia ua tuufaatasia foi o loo maua ai lava i latou ua oo ane i le Faalapotopotoga e siaki ma faamaonia le maua ai. E silia i le 500 na faamauina le oo atu i lea vaitau o le tausaga.
I le fale failele lava ia na ta‘ua e le tamaitai tausi soifua ua vaaia lea nofoaga, e tele tina ua fananau ae o loo aafia i siama o ma‘iafi ma o le tulaga e oo i ai pepe fou, e fananau mai e aloua mata, ma ua iai lava vailaau ua tului ai mata o pepe fou e tau togafitia ai lea faafitauli ma togafitia ai loa ma failele.
“E to’atele tina ua aafia ae o le tulaga lava lea e faapopoleina ai le Soifua Maloloina o le itu lea e na o i latou lava e omai e siaki ia o loo maua ua aafia e mafai ona togafigtia ma tape siama ia e feaveai, ae o le toatele e lē o oo mai i le falemai mo siaki”.
Faaalia e le Ofisa o le Soifua Manuia i Samoa, e toatele tina e agai atu i ai i taimi o a‘oa‘oga ma e lē ‘asa lava se asiasiga i afioaga ma maua mai ai tina ma teine talavou ua maua i se siama poo ni siama foi o feusuaiga.
O le faafitauli ua maua e nei asiasiga, e faigata tele ona faasufi isi tina e fai ni siaki ona o le matamuli nei maua mai suesuega o loo maua ai. E lē gata i lea o le maasiasi i iloa e isi tina ae o le taumafaiga lenei e suesue ai tina e faia i lalo o puipuiga ina ia aua ne‘i iloa fua tamaitai e aafia.
E taumafai foi le Faalapotopotoga ina ia suesue faatasi tamaitai ua aafia ma o latou taitoalua poo uo tama poo alii o loo feoai ina ia mautinoa e tape faatasi siama o loo maua ai. “O isi tina e siaki atu e tailua taitolu siama o loo feaveai i le taimi e tasi.
O ā auga o nei gasegase?
Pe siaki pe leai, o le faatalatalanoaina o lenei faafitauli ua maua ai lava i latou ua tauavea siama o le ma‘i o feusuaiga, ma e pei ona ta‘ua e le Soifua Manuia o Aiga, e faigofie lava ma e vave foi ona maua ai alii i lenei gasegase auā e vave lava ona aliali mai ai āuga. Mo tamaitai e tiga le ‘ona ma a agai foi i le fale lē ta‘ua e fai se feauvai e matua tiga lava.
O tamaitai foi e sau ai se‘i tulou le alou i le tamaitai ma e manogi leaga foi. O āuga lava nei e mafai ona iloa ai e le tamaitai ua aafia i nei gasegase.
Mo le itupa o alii, e pei e mu totoga aemaise lava totogasā ma o se tulaga e matuā lē mafai ai lava ona savali isi pe a ogaoga aafiaga. E faigofie lava ma mauagofie i nei aso togafitiga e ala lea i inumaga o fualaau, ma o le faamoemoe lea o le Soifua Maloloina ma le Sosaiete o le Soifua Manuia o Aiga Samoa, o le oo atu o soo se tasi ua maua i ia āuga e aumai fualaau ma ia togafitia foi paaga o loo mafuta i lenei vaitaimi. O le maasiasi na ta‘ua e i latou o loo faatautaia lenei auaunaga, e atili ai le aafia ma e lē aumaia le maasiasi ma le vaaiga a tagata ma auala e umi ai ona pologa le tagata o loo tauaveina nei siama mai i āuga tiga ma le lē mamā o nei gasegase faapea.
O isi auga o le tiga o le tua faatasi ma le ‘ona i tamaitai, ae o alii e matuā faigata lava ona fai le feauvai se‘i tulou. O le isi āuga e fesootai ma nei siama o le sosoo o ma‘itaga e fafano ma e tele lava ina siaki atu e pei ona ta‘ua e le falemai ma Faumuina, o loo aafia le tina i ni siama faapea.
Ae o ai ua faapogai ai le pepesi o nei gasegase?
O le toatele lava o tina ma teine talavou, o alii o loo mafuta i ai e ala i faigauo, o mafutaga faaleulugalii poo mafutaga faapouliuli o i latou ia o loo pepesi mai ai nei siama. E toatele foi isi tina ma tamaitai o i latou ia o loo pepesi mai ai siama i o latou taitoalua ma uo tama. O le tulaga moni lava ua manino le tele o ulugalii e lē o tāmau i le paaga e tasi ma o se foliga vaaia lea o le tele o mafutaga i le va o ulugalii i Samoa i le taimi nei. O le taumafai la e unai le feau e tausi i le tautoga pe ua lava le paaga e tasi e te nofo lelei ai, e matuā leai se faaaogāina i le tele o ulugalii i Samoa.
O le tali la ua ofo atu e ala i le auaunaga faafomai, faatausi soifua ma le auaunaga a i latou o loo i faalapotopotoga mo le soifua maloloina o aiga uma, ia puipui ma ia siaki ia togafitia, ma ia ola soifua maloloina i latou ua aafia i nei gasegase auā e pei ona ta‘ua e le Vaega o le Fale Failele, ua oo atu i fanau le aafiaga o nei gasegase pe a lē togafitia.
