O le tamaitai sui Palemia afioga Fiame Naomi Mataafa, o le Palemia o le Atu Kuki, ma le sui Palemia o Tonga faatasi ai ma sui o le aufaafiafia mai Saina, i le tatalaina aloaia o le faalauiloa o le Pasefika i Saina

Ua amata ona alu tala’iga faalauiloa i Saina e faatosina mai ai tagata tafafao o lea atunuu e tafafao i Samoa ma isi atunuu o le Pasefika. O se taumafaiga lea ua tulimatai nei e atunuu uma ona o le naunau e siitia le atina’e o tagata tafafao.

Mo Samoa o le masina o Iulai e amata ai ona taunuu ni malaga togipau a se kamupani vaalele i Saina o le a la’u mai ai turisi mai Saina ma isi atunuu o le atu Asia. O Samoa na faalauiloa ai le taumafaiga a lea atunuu ma taitai o lo latou Malo e fesoasoani i a Samoa ma le Pasefika e atinae turisi. Na malaga mai ai le Minisita o Turisi o tu ma aganuu a lea Malo ma se aumalaga e silia i le toaselau e aofia ai se aufaafiafia.

Na faatumulia ai le faletalimalo o le Sheraton Aggie Grey i Vaisigano i le po o le aso Gafua ua mavae i sui o Malo o le Pasefika na auai i le faalauiloaina o lea polokalame fesoasoani a Saina. Na saunoa ai le sui Palemia o Samoa le afioga Fiame Naomi Mataafa ma ia faailoa le naunautaiga o atunuu laiti ia siitia taumafaiga e atiinae ai tagata tafafao. Na ia faailoa ai foi e lua atunuu o le Pasefika o loo sili ona toatele turisi mai Saina e tafafao iai, o Fiti ma Guam.

Na faailoa e le Palemia o le atunuu i se feiloaiga ma tusitala i ni vaiaso e lei mamao atu, o ai na iloa poo le tatala mai o malaga a vaalele mai Saina e afea Samoa o le a faatupu fiafia i faletalimalo i le atunuu o le a tutumu ai potu ma taulia ai a latou auaunaga eseese. I le toe tolu masina aunuu le uluai malaga o a vaalele mai Saina, e fetaui le afea o Samoa ma le amata faaaopga i le masina fou o auala mo pasese e malaga ese ma pasese e taunuu i le malae vaalele faavaomalo i Faleolo.

O le faalauiloa i Samoa o le polokalame a Saina mo le atinaeina o turisi mo le tausaga lenei i atunuu o le Pasefika, na taualuga i se faaaliga o mea faapapa poo fireworks display sa maimoaina e le toatele. Sa faatino lea vaega o faafiafiaga i le uafu tele i Apia e se kamupani mai Niusila e faapitoa i le tapenaina o mea faapapa.