“E fia faamautu sootaga ma tagata Samoa sa aoaoina i le Iunivesite, ma fia talanoa i le mataupu o fesuia‘iga o le tau”
O le aumalaga o sui mautofi maualuluga o le pulega o le Iunivesite o Waikato i Niu Sila ua taunuu i laueleele o Samoa i le faamoemoe e fia faamautu sootaga ma sui o le Malo, fia asia nisi o tamafanau a le atunuu sa aoaoina i le Iunivesite, ma talanoa le mataupu i fesuia‘iga o le tau poo le Climate Change.
O le Chancellor poo le Faa-Ao o le iunivesite, o Jim Bolger se tasi sa avea ma Palemia o Niu Sila i nisi o tausaga ua mavae o loo taitaia le aumalaga faatasi ai ma nisi o sui sinia o le iunivesite.
E lē galo lea taitai i loto o tagata Samoa a o avea ma Palemia o Niu Sila ona sa tele foi lona sao i atinae o le atunuu i lalo o ana taitaiga faalemalo.
O loo aofia foi ma le Pule o le iunivesite le vice chancellor o Professor Roy Crawford. O le Associate Professor o John Campbell o le a faia sana folasaga i le Iunivesite aoao a Samoa i le Papaigalagala e faatatau i le mataupu o le fesuiaiga o le tau.
O se mataupu ua faafagogo tagiao i le faafofoga ma le silasila a le atunuu ma le lalolagi, peitai o se mataupu e tāua ona ua ave i ai le faamuamua i lenei vaitau ona o tulaga ua tutupu ma aliali mai i lo tatou siosiomaga i mala faalenatura ua vaaia ma molimauina.
E tusa ma le luaselau fanau a Samoa o loo aoaoina i le Iunivesite o Waikato i le tausaga nei ma o se numera toatele. Ua faaalia ai e le alii Polofesa o Crawford o se avanoa lelei tele le toe malaga mai i Samoa e feiloai atu i nisi o tamafanau a le atunuu sa aoaoina i le iunivesite ma toe asia le tulaga o loo iai lo latou olaga galulue i tofiga o loo tautua ai i soo se galuega i pisinisi tuma‘oti ma faalapotopotoga tuma‘oti ma totonu o le Malo.
O se tasi o tamalii sa aoaoina i lea Iunivesite i Niu Sila o le susuga Papalii Niko Lee Hang, o se tasi o loo avea nei ma Faipule o le Palemene mo nofoa e lua o le au palota taitoatasi. Sa avea ma minisita o Tupe i se tasi o paeaiga talu ai a le Palemene.
O nisi o tamafanau a Samoa ua iu mai lea lava iunivesite o le afioga i le Loia Sili a le Malo le afioga Aumua Ming Leung Wai, o le pule o le Iunivesite aoao a Samoa le afioga i le alii Polofesa Fui Tuua Ilaoa Asofou Soo ma le tamaitai Faatonu o le ofisa o le toe fuataina o tulafono le Samoa Law Reform Commission, Leilani Tuala-Warren.
O le a lē gata ina feiloai atu le aumalaga i le Ao Mamalu o le Malo, ae faapea foi i le alii Palemia. O le a asiasi atu foi i le Kolisi o Samoa o loo toatele ai alo ma fanau o le atunuu sa aoaoina i le Iunivesite o Waikato.
