Afea laufanua o Sini e Moseniolo Alapati Lui Mataeliga

O le maea ai o faamoemoe tetele o le Ekalesia Katoliko lea sa talimalo ai Samoa i le masina o Iulai i le Divine Mercy poo Alofaaga Mamana a le Tina Paia, ma le faatasiga a Tupulaga Talavou i Samoa ma atunuu i fafo lea faatoa mavae atu, o se auala lea na afea ai e le faauluuluga o le Ekalesia Katoliko mai Samoa le Afioga Akiepikopo Alapati Lui Mataeliga laufanua o Sini i Niu Sa Uelese mo sana malologa ao lei toe tuuvaa atu mo le malo o Roma.
Saunoa le afioga i le Moseniolo, faia ia lea auala ua ia maua e momoli ai le faafetai i afioga a alii Pelepitelo ma Patele faapea Tamaitai Taupousa aemaise le paia maualuga o le Ekalesia Katoliko i Ausetalia atoa, le agaga faafetai ma le faamalo i lo latou taupati atu mo ia faamoemoega tetele sa faia i Samoa.
Ta’ua e Alapati le loto faafetai i tupulaga talavou o le ekalesia i atunuu i fafo ona o le tau tata pea i le moa o le ala i lona faasinomaga ma le tamaliiaga o le tagata soifua e tapuai ai i lona Atua, ao i ai i lenei lalolagi le tumau.
I le saunoaga faalaeiau a Mataeliga na ia faamamafaina ai le avea lea ma auala e le mavae ai pea le faatuputupulaia o le ola ma le faatuatua o tagata lolotu i le talitonuga i le faaolataga a Iesu Keriso e ala i lona maliu ma toetu manumalo mai le tuugamau mo le togiola mo tagata uma.
Fai mai a ia, o saunoaga tuusao a lo tatou Faaola na ia faatusa ai le tagata loto mama e pei o se tamaitiiti e le alualua lona mafaufau, ma o lea foi na ia fetalai ai ina tuumaia tamaiti e omai ia te au, aua le vavao ia tei latou aua e pei i latou nei o-e oi le malo o le lagi.
I le faatumulia ai o le aso Sa na mavae atu nei 20 o Setema i le malumalu o St Theresa Miller Liverpool sa osia ai se Misisa Samoa mo le Puleaga a Sini ma Samoa uma.
Ta’ua e le afioga a Patele Paulino Tui Kolio i le vaega o talafou e faapea, o se loto faafetai ona ua maua se avanoa e faataunuuina ai lea sauniga mamalu ma feiloai atu ai i le afioga i le Akiepikopo Alapati Lui Mataeliga, faatasi ai ma le afioga ia Patele Etuale Etuale e pei ona malaga mai ai i Samoa mo le faamoemoe i le nofoaga autu o le Ekalesia Katoliko i le Vatigana i Roma.