(Rev Aisoli & faletua ia Fualole Iuli)
Ua sagisagi faamanuao ma olioli livaliva ina ua feiloai fiafia i luma o nuu ae lē o tua o nuu le aumalaga mai Samoa ma le Faasinoti Ekalesia Metotisi a Kuiniselani. E toaono le faigamalaga lea na to‘ai taunuu mai i le Aso Toonai aso 23 o Fepuari 2013.
O le faigamalaga mamalu e aofia ai le Peresetene Aoao o le Ekalesia mai Samoa, le susuga ia Rev Aisoli ma le Peresetene o le Auso Fealofani, le faletua ia Fualole Iuli ma nisi o le au mautofi mai Samoa.
E lima matagaluega sa tuufaatasia i sauniga o le Aso Sa i le malumalu tapuai o le Ekalesia a Bundamba o loo tausia e le afioga i le Sea ia Rev So‘afa ma le faletua ia Logotaeao Mulipola lea sa lauga ai le Peresetene ia Rev Aisoli Iuli. Na matuai goto ane i loto ma finagalo le logo mālie foi o le upu folafola.
O nisi o le aumalaga sa auai atu i isi Ekalesia sa faia lava a latou sauniga i o latou malumalu tapuai.
O le faapogai o le afea o Brisbane, ona sa iai ni fuafuaga a le Faasinoti e fia soalaupuleina faapea ni semina sa faia i le Aso Gafua auā lava le atili solosolo lelei o polokalame o lenei tausaga ua tau amata.
Ua faamoemoe o le Aso Tofi o le a tuua ai Brisbane mo le fonotaga tele lea o le a usuia i le Atu Solomona e pei ona malaga mai ai ma afea laufanua lanulauava ma le mafanafana o Kuiniselani.
O le afioga i le Sea ia So‘afa ma le faletua ia Logotaeao Mulipola o loo faauluulu i ai le Faasinoti a Kuiniselani.
O le aao tusitusi o le Faasinoti o le susuga ia Rev James Matamua, a o le teuoloa o le susuga ia Rev Laauli Leiataua.
