Afea Ekalesia SISDAC a Kuiniselani e le taitai aoao ia Pr Uili Papu

O loo afea le ekalesia SISDAC a Kuiniselani e le faigamalaga a le taitai aoao ia Pr Uili Papu ma le faletua ia Deeana Papu. Na faia se taumafataga i le afiafi o le Aso Tofi sa auai faafeagaiga ma toeaiina e faafeiloai ai lana auauna ma le faletua, a o toesea le taitai o Kuiniselani ia Pr Lagolago ma le faletua ia Pua  i le aai o Sini.
O lea faigamalaga a Pr Uili ma le faletua ia Deeana o le fia asia lea o lenei matagaluega a o feagai ma le fausiaina o le malu o le matagaluega e tapuvaetasi i ai sauniga tuufaatasi i amataga o masina uma i Kuiniselani.
O se faamanuiga tele i le maua ai o avanoa faaauro e faafofoga ai i ni upu faamalosi e pei ona iai le sapati, i le logomalie o ana saunoga i le lesona ma le lauga e tauala mai i afioga mamana a le Atua.
O se tasi o vaega o le saunoga a le taitai aoao o le SISDAC ia Pr Uili Papu e pei ona fesiligia poo le ā  se tulaga ua oo i ai le ofisa maota tutotonu o le ekalesia i Samoa e pei ona faatama‘ia i le afi.
Na ia saunoa ai e ta‘i miliona a le matagaluega e toe fausia ai le galuega atoa,  o lona uiga e tusa ma le 12 miliona lea o le a toe fausia ai le galuega tele i se masina e lē o toe mamao.
O le faanaunauga ina ia vave ona toe faatū le galuega auā le laveaiina o agaga ma tapuai ai i le Atua. Na fai sao i sauniga lotu i luga o le leitio ma na toe taliu le faigamalaga i Niu Sila i le Aso Sa, aso 9 o Iuni. Agalelei le Atua ma faafualoa le soifua o le susuga i le taitai ma le faletua auā le taitaiga o le galuega aoao a le SISDAC i le lalolagi.