E toe faatalofa atu i lenei foi vaiaso i le faagasolo ai o galuega aemaise o faiva alofilima o le mamalu o le tatou atunuu i soo se tiute ma soo se galuega o loo feagai ai i lenei foi vaitaimi o le tausaga. Talofa lava, o se faaopoopoga lenei o le tatou itulau mo lenei vaiaso.
Ae toe faafetai tele atu lava i le tatou sui ua mavae atu i vaiaaso e tolu ua tuanai, le afioga ia Vamasenuu Zita Sefo-Martel, ona o le finagalo faatamalii ua mafai ai ona maua le avanoa e faasoa mai ai taleni ma meaalofa, aemaise o agavaa e fai pea ma luitau mo i tatou uma.
O le agaga maualuga o lenei tusitusiga, o le saili malo aemaise ai o le faafoi o le faafetai e amanaia ai galuega lelei ma le tāua, sa nafa ma fitaituga ai le mamalu i tamalii ma tamafanau a Samoa, i soo se vaega lava o le soifuaga nei.
E leai se mea sili nai lo le tatou amanaiaina ma patipatia le anoanoai o galuega ma taumafaiga ua tatou aeae ai nei ma sao i maa o malie.
O le vaiaso nei o le a toe liliu mai i Niu Sila, i se tasi o tamalii sa matuā iloga lona taumafai ma le lē faalogologo tiga, tauvi ma le filigā mo se manuia o a‘oa‘oga a le fanau i le vaega o aoga faataitai, poo aoga amata.
E lē gata i Samoa a o lei malaga mai i Niu Sila, ae faapea foi le taunuu mai ma aumau ai i fafo.
E toatele tagata sa fetāla‘i lo latou silafia ma avea ma auala e fesuisuiai ai galuega e tautua ai, ona o agavaa ma fesuiaiga mai lea taimi i lea taimi.
Ae peitai o le tina ua filifila mo lenei vaiaso, sa amata mai i le galuega faafaiaoga i le taimi muamua o lona soifua seia oo mai lava i le asō na feiloai ai ma le tatou nusipepa, o loo galue ai pea i le galuega faiaoga.
Ua litaea mālōlō ona o tausaga o le matua o le soifua ua iai, peitai e lē o mālōlō ai lona mafaufau ma lona finagalo saili malo e ala i le tuufaatasia ma le toe tusiaina o polokalame mo a‘oa‘oga.
Afamasaga Telesia Alipia
Master of Education:
Massey University
Bachelor of Education-Majoring ECE:
Massey University
Dip. In Education Administration:
University of South Pacific, Fiji
Certificate Early Childhhod Education:
Massey University
Certificate in Preschool Education:
WSPA, Samoa Teacher Training
Certificate in Preschool Supervisor:
WSPA, Samoa Teacher Training
O nisi nei o tulaga sa tauaveina ma tulai mai ai pea Afamasaga mai le tausaga 2006 ma faasolosolo mai mo le mālōlō litaea ai. Faatonusili, Pule aoga, Faiaoga mo a‘oa‘oga a atumotu o le Pasefika.
O tulaga ma ona agavaa uma ia sa faaaogāina ai pea i totonu o a‘oa‘oga a le Iunivesite a Aukilani (Faculty of Education University of Auckland New Zealanad).
Aso soifua: Aperila 14, 1941
Na soifua a‘e le afioga ia Afamasaga Telesia i le afioaga i Falealupo, a o tausinuu ai ona mātua i le tulaga Fesoasoani o le Ekalesia Katoliko.
Tuaā: Tamā: Vito Fonoti o Aunuu i Tutuila
Tina: Sofia Afamasaga o Fasitootai
i Aana Upolu
Sa faaipoipo Telesia ia Alex McDonald i Samoa lava, ae na tatala e le maliu le feagaiga ma le tamā o le aiga i le tausaga e 1984. E toatolu o la alo tamaitai, o loo galue le toatasi i Samoa, a o le isi o loo i Ausetalia ma le tasi o loo i Niu Sila pea.
Sa toe faaipoipo Afamasaga Telesia i le afioga i le Matua na Togi, Alipia II i le tausaga e 2002 e oo mai i le taimi nei o loo mafuta pea, ma o loo faamautu ai i le itu i Sisifo o Aukilani.
Ona o le tele o le soifua o lenei tina sa faaalu lava i le tulaga o le a‘oa‘oina poo a‘oa‘oga, o le a mafai ai ona e silasila i ni fesuiaiga o tausaga ma taimi i le soifua a‘oa‘oina ma le soifua galue.
O le a e faitauina o nisi taimi e galue ma a‘oga e pei o le tele o vaega o lona soifua auauna.
Soifua A‘oa‘oina i Samoa
Sa amata mai i aoga tulagalua i totonu o le afioaga lava i Falealupo, ona sosoo ai lea ma le toe siitia i Apia, ma faaauau ai a‘oa‘oga i le aoga maualalo a Taupousa i Savalalo ina o sefulu ma le lua tausaga le matua o le soifua.
Sa faaauau pea le aoga ina seia oo i le sefulu ma le ono tausaga, ma sa iai loa se manaoga faapitoa i le aiga, auā le itu tau i le seleni sa manaomia tele e mātua mo le tautuaina o le lotu ma aiga.
O le mafuaaga lea na ala ai ona vave faamuta a‘oa‘oga i le vasega ono poo le Form Six. O le taimi na avea ai ma faiaoga, sa toe maua ai le isi avanoa e faalauteleina ai le tomai e ala i le toe a‘oa‘oina. Na maua le avanoa faasikolasipi ai mo Fiti i le tulaga lava faiaoga.
A‘oa‘oga i Fiti
E lua tausaga sa a‘oa‘oina ai i Fiti, e pei ona silasila ane i ai i le faailoga o loo i luga, sa maua ane ina ua mae‘a le sikolasipi i Fiti.
O le tausaga e 1990 na mae‘a ai le sailia o le faailoga poo le tipiloma i le tulaga o galuega i ofisa ma fesootaiga i totonu lava o a‘oa‘oga.
O le 1991 na maua ai se valaau mai Niu Sila, ina ia amataina ma taumafai e faavae ma tuufaatasia se polokalame e toe a‘oa‘oina ai ni faiaoga e faaaogāina mo aoga amata.
A‘oa‘oga i Isaraelu
O le tausaga lava lea e 1991, na toe faamanuiaina ai mo se avanoa e toe aoga ai i Isaraelu, mo se tasi foi o polokalame e fesoasoani ai mo tina, ina ia mafai ona faaaogāina i totonu lava o aiga, e tilivaina ai le feau ma faaoo ai a‘oa‘oga mo le fanau laiti.
O le vaiaso fou o le a toe faaauau atili atu ai nisi vaega tāua o le soifua a‘oa‘oina o lenei tina Samoa, aemaise foi o nisi o galuega sa galue ma o loo galue ai pea e oo mai le aso nei.
