E lē o se tulaga matagofie ma talileleia i le faafofoga ma le silasila a le mamalu o tagata lautele o Niu Sila, le taalo o le au faipolokiki ia latou faaiuga fai ma le taaloga, ae vane atu ai ma pūpū solo ai ma taga a le au totogi lafoga ma le au fai saofaga a le atunuu.
Aemaise lava o lenei vaitaimi i le pa‘ū maualalo ma le aafia tele o le tamaoaiga o le atunuu, ma o loo tau posiposi foi ma tau faasoasoa tupe ma seleni a aiga faapea totonu o galuega.
E lē aiāina faaiuga ma suiga o galuega ma faatatau a tagata taitoatasi aemaise ai foi galuega ma tiute tauave.
Peitai e ao lava foi ona silasila ma fuafua faaiuga ma suiga i lona taimi talafeagai ma aafiaga e ono alia‘e mai.
E pei o isi foi upu faafailauga a le atunuu, E ao ina fua le lauga a le failauga i foliga o le aso, o le atamai ma le tomai faafaleupolu e fetalai ai ma maitau uiga ma gasologa o foliga vaaia o le aso ma tagata faalogologo.
O le faamavae ese mai o Lumanuvae Winnie Laban mai le nofoa o lona itumalo, o lona lē toe tauva foi lea mo le sui faipule o le Palemene a Niu Sila, e lē o tuu māmāina i le tele o finagalo o tagata lautele. Talu ai e iai vaega e mafua ai lagona ma finagalo aga‘i i le mataupu i le faamavae o le tamaitai faipule.
O loo fafau lagona ma manatu o nisi, i le latalata tele mai o le isi faigapalota tele a le atunuu, peitai ua lē mafai ona faatali ma onosai le finagalo o le sui a faipule, seia faatino le filifliga a tagata o lona itumalo i le taimi e pei ona faatulagaina.
O lona tāua o le tālia o lea taimi atofaina, ona e mafai ai ona lē maimauina se vaega tupe tele a tagata totogi lafoga, e toe faia ai le faiga palota laititi a Mana, auā so latou sui e sui tulaga ma faamae‘a ai le galuega a Luamanuvae ua lē mafai ona faaauauina.
O le aso muamua o Novema o le masina fou lea ua atofaina ma ua faamaonia mai, o le a faataunuuina ai le faiga palota laititi a le itumalo o Mana, lea sa tulai mai ai Luamanuvae Winnie Laban.
E taugata ma e telē se seleni o le a faaaluina ai mo lea suiga ma le faia o le palota, ae toe lava o nai masina mae‘a ma faia le faigapalota tele a le atunuu.
O le a toe totogi aisea lea vaega tupe tele, a o lea e iai le vamoe e faasaoina ai lea seleni tele ma tau putiputi lea vaega tupe mo nisi atina‘e aogā.Na fesiligia lava le ofisa o le komesina o faigapalota mo sui o le palemene a Niu Sila i Ueligitone, pe fia moni lava se seleni a tagata totogi lafoga o fuafua e faaalu mo le faiga palota laititi a le itumalo o Mana.
O le tali mai a le ofisa o le komesina o faiga palota, e tusa lea ma le ‘afa miliona tala, pe tusa foi ma le lima selau afe tala, o le vaega tupe lea ua mae‘a ona faataatia ese mo le toe sailia o se sui faipule o Mana, e suitulaga ia Luamanuvae.
Ua maitauina i lenei tausaga atoa i taaloga ma faiga faapolokiki, ua foliga mai o se mea fua lava le takiki solo o polo a le au taaalo, ae lē se‘i silasila toto‘a ma vaai i le tigaina ai, ma amo pea e le au matamata le avega, ma le faafafa e totogi le tau o a latou taaloga o loo faagasolo.
O fea e aumai ai lea tupe, a o ai tonu e palasi i ai le seleni o le a faaaluina? O le mea moni lava o tagata fai saofaga ma le au totogi lafoga, o se isi faaupuga o tatou uma, o oe ma au foi.
O se tulaga ua matuā fesiligia ai le taitaiga faalevaega faaupufai, ae lē gata i lea o le faia o faaiuga a sui a faipule, ma ua tuumāmāina ai finagalo ma manatu ia i latou sa faia le filifiliga ma palotaina le sui.
E lē tau faailoina le tulaga maualuga ma le matatia sa amataina e Luamanuvae, o le avea ma tamaitai muamua o le Pasefika i totonu o le Palemene o Niu Sila.
O ia foi o se tamaitai minisita muamua mai lava i totonu o atunuu o le Pasefika, ma isi lava tulaga taualoa sa ia tauaveina.
Peitai e ui o lana faamavaega ma faaui ese mai faiga faapolokiki ona o se isi foi tofiga tāua mo lona lumanai, ae ua iai lava pea lona, ma le ila. O le toe togi o le solo ae ua toeitiiti lava ta le logo ua faaalia ai le lē fiafia o le toatele. Ua toe naunau le tamaitai faipule e toe saili se isi galuega, ae lē se‘i onosai e faasao mai lea limaselau afe tala o le a faaaluina mo le toe faia o se isi faiga palota mo lona itumalo, sa manatu i ai nisi.
E lē gata i lea, a o se mataupu ua tusi ai nei le lima umi o tagata papalagi ma le toatele o isi tagatānuu, agai i le taitaiga a le taitai, Phil Goff. Ua tuuaia le taitaiga ma faapea nisi manatu, ua leai se fia nofo o Winne Laban ona ua faaletonu le vaega faaupufai. Ua manatu nisi, e lē lava le malosi ma le agavaa o le taitai e faamalosi ai le sui faipule ina ia onosai se‘i mae‘a lona taimi i le tausaga nei, auā o le tausaga fou le palota tele a le atunuu.
Sa tulituliloa pea le taitai o le vaega faaupufai a le Labour, Phil Goff, poo le ā sona finagalo e uiga i lea mataupu, e pei ona vevesi ai le toatele, aemaise o lea ua aafia ai ma lana taitaiga o le vaega faaupufai.
Phil Goff
E lei manuia le taumafai atu mo le taitai o le vaega faaupufai, talu ai sa ta‘ua e lana failutusi faapalemene, le pisi tele o le alii faipule. Peitai sa ta‘ua e lana failautusi le mae‘a ai ona faamanino e Goff le mataupu lava lea, ma ua mae‘a foi ona taina ma faapepaina. O lana tali foi lea sa tali ane ai mo le au tusitala, ma le au faasalalau a televise ma leitio.
Sa tālia foi le lipoti e pei ona taua o le a faaoo mai i le Samoa Times, peitai e lei taunuu mai ma o loo tālia pea. Ae o se faatalanoaga sa maua i luga o se tasi o leitio a papalagi, sa ta‘ua ai e Goff lona talia aloaia o le faamavaega a Winnie Laban. Sa silasila i le taimi sa manaomia ai Laban e le galuega fou i le iunivesite, ma faamaonia ai e lē tatau ona toe nofo le faipule mo le vaega faupufai, ona e vave tele le taimi sa manaomia mai e amata ai i le galuega fou.
O le ala lea sa lē mafai ai ona toe taofia le faipule, e tau tulituli ai le taimi mo le isi faigapalota tele i le tausaga fou. Na saunoa Goff, sa faia lava le galuega o le siaki ma tāpā se faamaoniga mai le iunivesite mo le taimi ma le aso e tatau ona amata ai Laban, ma o le ala lea sa lē mafai ai ona fai se isi gaioiga a le vaega faaupufai.
Sa toe fesiligia foi pe aisea lava ua toe talosaga ai le sui a faipule mo lea tofiga fou, ae o loo nofo i luga o se isi tofiga tāua tele ma le maualuga e faatino ai manaoga o tagata sa filifilia lona sui. O le tali sa tuuina e le taitai sa ia ta‘ua ai, o le filifiliga fai toatasi lava lea e patino lava ia Lumanuvae, e lē aiāina fua e lona sui, e tusa lava poo ia o le taitai, e lē mafai ona ia suia se faaiuga ua faia pe a manao e sui se galuega.
E ono iai foi se isi faigapalota laititi e faia, peitai e lei mautinoa e oo mai i le taimi nei. Sa toe fesiligia foi le ofisa o le komesina o faiga palota i Ueligitone, pe ua iai nisi faigapalota laiti ua foufou atu ma faamautu. Peitai sa leai mai le ofisa, ma ta‘ua ai e na o le itumalo lava o Mana lea ua mautinoa, ma ua mae‘a foi ona faamautu le aso e faia ai e pei ona ta‘ua muamua.
Afai ae faamaonia le alu ese mai o le alii faipule o Manurewa, George Hawkins mai lona tofiga ma le nofoa o lona itumalo e pei ona polomisi ai, pe afai ae manumalo i le tofiga faufautua mo le Super City, la lea ua manumalo nei. O lona uiga o le isi foi lea faiga palota laititi o le a tulai mai. E talitonu ma mautinoa o le a sili atu le telē o se vaega tupe o le a faaalu ona e toatele le faitau aofai o Manurewa nai lo Mana.
O loo maluelue pea lava foi le isi sui faipule o le Labour, Chris Carter poo fea a fai i ai taualumaga o lona sui. Ua mae‘a foi ona fofogaina e le taitai le sauni o nisi e tauva mo le itumalo o Te Atatu, e ala i se faiga palota laititi foi, pe a faaletonu Chris Carter. O le totogi o lea foi taaloga, o le afa miliona foi poo le sili atu.
