Ua faafiafiaina le pulega o le falemai tumaoti o le Medcen i Vailima ua amata ona faagaioi e le Malo le faatauina o le falemai ma faaauau ai ona faaaogā mo le togafitia o gasegase eseese.
O le tala faaopoopo o le tupe a le malo mo le tausaga faaletupe o loo faagasolo e mae‘a i le faaiuga o Iuni o le tausaga nei, ua faapea ona aiaia ai se vaegatupe e $651,086 (onoselau lima sefulutasi afe ma le valusefuluono tala) e amata ai le faatauina e le Malo o le falemai tumaoti o le Medcen i Vailima. Ua faamaonia mai e se ofisa sinia o le matagaluega o le Tupe a le Malo le faagasolo pea o sailiiliga a se komiti galulue poo se task force mo le faia o feuiuiaiga uma o le faatauina o le falemai.
“O lea e faia lava galuega a le task force ma e lei iloa se taimi e mae‘a ai”. O le faaaogāina o le vaega tupe ua pasia, o le a ave ai le $151,086 e totogi ai saofaga i le NPF a le aufaigaluega o le Medcen.
O se vaega tupe ua maua ai le toomaga o le aufaigaluega ua fai si umi e lē o toe maua ni a latou saofaga mai o latou totogi e ave ia latou NPF e mafua ona o tulaga faaletonu tau tupe ua feagai ma le pulega o le Medcen.
O le vaega tupe e $500,000 afe poo le ‘afa miliona o le tuusa‘o e totogi ai le nonogatupe mai le faletupe o atina‘e sa fausia ai le falemai.
O Fepuari o le tausaga e 2010 na faia ai se faaiuga a le kapeneta e faatau e le Malo le falemai tumaoti, ina ua feagai ma le pulega o le falemai ma tulaga faaletonu i ana tupe maua.
O se talanoaga ma se tasi o faatonu o le komiti faafoe o loo pulea le Medcen ma o se tasi o le au faisea autū poo se major shareholder, le alii fomai o Leoo Dr John Adams na ia faaalia o loo faatali pea i le tulaga ua iai feutanaiga ma le Malo ua mae‘a ona faatino.
“E lē o mafai ona toe maua atu se isi faamatalaga mai a matou ona o loo tagofia nei e le task force a le Malo le tapenaga o le faatauina o le falema’i”.
E ui ina lē maua mai le alii fomai se faamatalaga lata mai o feutanaiga, ae o le avea o ia o se tasi o faatonu e iai ona sea poo shares i le falemai na ia talanoa mai ai i le tulaga faaletonu ua mafua ai ona aveesea le falemai sa avea ma taulaiga o a latou pulega ina ia avea o se tasi o auaunaga faalesoifua maloloina e sulufai i ai le atunuu e ui ina iai le eseese i le itu i le totogi o lana tautua, pe a fua i le totogi o loo faaaogā ai e le atunuu le falemai o loo i le pulega a le Malo.“
Sa matou talitonu e tulai mai le Medcen o se falemai tumaoti e ofoina se isi tautua sili atu auā o se auaunaga faapisinis tumaoti, peitai ua lē mafai lava ona togafiti faaletonu tau tupe”, na saunoa ai Leoo.
Mai le toatele o le aufaigaluega sa amataina le Medcen, na faaalia e le alii fomai ua toe toaono tausi soifua o loo galulue pea.
“O nisi nei o toa o le Medcen ona e ui ina iai faaletonu tau tupe ae o loo iai pea le loto i le galuega ma le faaauauina o le tautua mo le falemai tumaoti”.
O faaletonu i o latou totogi ona o le motusia o vaega tupe e alu ia latou saofaga ma le totogi o a latou nonogatupe i faletupe ma pisinisi e nono ma aitalafu ai tupe, o le isi lea vaega o feutanaiga ma le Malo, e pei ona iai se vaegatupe ua tuuina atu mo saofaga a tagata faigaluega i le NPF. “Ua faaletonu lava matou ona ua lē toe mafai ona faia ni a matou nonogatupe i saofaga, ae faafetai o lea ua tali mai le Malo”.
O le lagona faaalia lea o se tasi o tausi soifua sinia o loo galue i le Medcen.
O le umia e le Malo o le falemai o loo iai le naunautaiga o le alii fomai o Leoo Dr John Adams, talosia ia faaaogā tonu i se auaunaga faalesoifua maloloina e talafeagai lelei ma le tulaga na fausia ai le Medcen.
“E mafai ona faaaogā mo togafitiga o gasegase o le fatu, avea ma falemai e togafitia ai le gasegase o fatugao, ae pule lava le Malo ia latou fuafuaga”.
O le tausaga e 1998 na tatala ai le Medcen mo lana auaunaga faalesoifua maloloina, ma ua tusa nei ma le 14 tausaga talu ona faagaioia.
E 4 miliona se nonogatupe na faia mai le faletupe o atina‘e a Samoa e fausia ai.
