E foi lava le faamanū i lē Ona le viiga, auā sa laolao le vasa i Asuisui ma leai se manu e olo a o alo Ekalesia e 5 a le Itu Samoa o le Ekalesia AOG i le suesueina o mafaufauga o alo ma fanau i Afioga Paia a le Atua.
O le suega sa faia i le Mataio 18, 19 ma le 20 ma e na o tamaiti o loo i le Kolisi sa sue ai i le afiafi o le Aso Faraile, 24 o Aukuso. Sa saunia lenei suega e le Ofisa o Aoga Aso Sa i Ausetalia. O le Peresetene o le Susuga Tauamanu Loli, Susuga Fei‘i M. Bryce, o ia o le Failautusi, ma le Susuga Tofao Lalotoa, o ia o le Teutupe.
Sa potopoto le Falelima mo le lauina o togi sa faia i le Aso Sa, 26 o Aukuso ina ua mae‘a le Sauniga lotu, ma na faamanuiaina ai David Fualau i le tulaga muamua, mai le Ekalesia i Inala o loo taitaia e le Susuga Ps Taeauga Ropati Frost, ma o ia foi lea o le Taitai o le falelima a le Assembly of God Church of Samoa i Qld, ma le failautusi o le Matagaluega a Ausetalia atoa. O le tulaga lua sa faamanuiaina ai foi Jeff Fualau e mai le Ekalesia lava lea i Inala ma o ia o le uso matua o lē na sili.
O le tulaga tolu sa mauaina e se teineitiiti mai le Ekalesia i Pallara o loo tausia e le susuga ia Ps Kirisimasi Hytongue, o le toeaina lea o le Pulega a Kuiniselani.
O tulaga uma nei o tamaiti i totonu o le Falelima e iai Ekalesia nei o Inala o loo tausia e le susuga i le taitai ia Ps Taeauga Ropati & Saeseese Frost, Pallara – Ps Kirisimasi & Besse Hytongue; Carole Park – Ps Sini & Sauao Tauti; Brisbane – Ps Lega & Ula Frost, ma Red Cliffe – Ps Toluono & Alafou Ulisese.
Sa matagofie ma maualuga le viiga o le Atua ona o pesega faaleagaga a Aoga Aso Sa taitasi, aemaise ai le tala faaleagaga sa faatinoina e le Aoga Aso Sa mai Inala.
