E alalaga leotetele auā ua faatumulia lagona o le fiafia, i susuga i Faafeagaiga ma o latou sui usufono, i le koneferenise a le Ekalesia Uesiliana Metotisi o Ausetalia, na faagasolo i le faaiuga o le masina o Setema 2012, na faia i le itu i Matu o Kuiniselani.
Na faamanuiaina le susuga i le faafeagaiga ia Pastor Josephine Aufa‘i i totonu o le D.B.M.D (District Board of Ministerial Development). O le uluai Samoa lea ua mafai ona ofi atu i le komiti e gafa taulimaina tulaga e faatalatalanoa ai aiaiga mo le manuia ma le alualu i luma o le galuega a le Atua.
O le susuga i le faafeagaiga ia Pastor Josephine Aufa‘i, o le alo tamaitai o le Peresetene aoao o le Ekalesia LMS Pasefika le susuga i le Toeaina ia Rev: Afoa Alapati ma le faletua ia Sarai Tuuga Stevenson.
Na lei muta ai iina faamanuiaga a le Atua i o tatou tagata Samoa a o faagasolo pea le Koneferenisi a le Ekalesia Uesiliana Metotisi o Ausetalia. Na faasilasila aloaia e lana Afioga i le Sea poo lana Susuga i le Peresetene aoao o le Ekalesia Rev Rex Rigby, i latou ua avea ma faifeau faamaonia o le Ekalesia, ma o le susuga i le faafeagaiga ia Rev Risatisone ma le faletua ua avea nei ma faifeau faamaonia o le Ekalesia Uesiliana Metotisi Ausetalia, ma ua filifilia nei ma faifeau fou o le Ekalesia Uesiliana i Inala.
O le Aso Sa ua tuanai, aso 7 o Oketopa na lauga faamavae ai le susuga i le faafeagaiga ia Rev Aufa‘i Talaifei‘i ma le faletua ia Lili, lea ua faamaonia mai nei le avea o laua ma penisiona malolo. O se tasi o faifeau fou na faau‘u o lenei tausaga 2012, o le Tina lea ia Faalaeo Umaga ua mafai ona faamanuia ina ana taumafaiga faafaifeau i le Elder Lay Minister Pastor Faalaeo Umaga.
E momoli aloaia le faafetai i Aufaigaluega uma ma o latou faletua, i tupu ma tamalii, alo ma fanau i Ekalesia Samoa Uesiliana o Ausetalia, faamalo le tapuai ma le finau i le Atua ma lona malo.
