O le auga o le talanoaina o lenei mataupu, ona o le vaiaso nei na tulai mai ai se tulaga lē sa‘o ma solitulafono i le ofisa loia lenei, e iai a‘oa‘oga e aogā mo tatou uma.
Sa taumafai le ofisa loia lenei e fesoasoani i se client i se mataupu fefeu sa su ai lenei ulugalii e se isi lava o le latou aiga.
O finauga o le fale sa faatau e se auso, i ni tausaga ua mavae. Na faatau e lei faia ni aiga. Ua fai aiga o le auso, ua finau nei poo ai e ona le fale.
Na toe su e le isi uso lona uso, fai mai o tupe o lona totogi na fesoasoani e deposit ai le fale, ma o tupe na totogi e le uso laititi o nonofo faatasi i le fale, o tupe na totogi ai le la mokesi, ae lē o se rent na ia totogiina i lona uso.
Ua uma le mataupu ma ua maua le faaiuga faaletulafono e talafeagai (fair and just) mo le auso.
Mataupu Tulai Mai:
Ua faateia lenei ofisa ua aumai le tusi a se loia papalagi e avatu uma faila a le aiga lea sa tutū ai le ofisa loia lenei i ni tausaga se tele, na maua ai le faaiuga lea ua ta‘ua i luga.
E foliga o se togafiti e tau ‘alo ese ai mai le totogiina o le pili loia mo le galuega lea ua faaiu.
O le tusi mai a le loia papalagi e lē gata i le ofisa loia lenei o Woodroffe Law, ae o le tusi ua ave i isi loia ma se ofisa o le malo o Niu Sila.
O upu tusia e le loia i le tusi, e lē gata e lē sa‘o, solitulafono, ma o uiga o upu, ua faaleagaina ai le igoa o le ofisa loia Woodroffe Law (Defamation).
E pei ona ta‘ua muamua i tusitusiga i lenei Column, e faasā i le tulafono ona fai e se tagata se tala sese ma lē sa‘o e ta‘uvalea ai se igoa o se tagata poo se pisinisi.
O le tiute o le tagata na alu i le loia fou, o le ta‘u o le sa‘o i le loia fou.
O le tiute o le loia fou, papalagi, sa tatau ona ia saili muamua pe moni ma sa‘o mea na ta‘u atu e le client ia te ia. O le loia papalagi e iloa ona tiute i le tulafono.
O le loia papalagi e iai lona tiute e vaai pe sa‘o upu o lana tusi, a o lei aveina i isi tagata e faatāsina atu ai le igoa o le ofisa loia lenei.
E iai foi tulafono a Niu Sila ma tulafono a le New Zealand Law Society, e faatonu ai galuega fai a loia, ma mea e tatau ona fai e le isi loia i le va faaloia i luga o galuega.
Sa tatau i le loia papalagi ona fesili mai ia Woodroffe Law a o lei aveina lana tusi lē sa‘o e faasalalau, ma faaleaga faasolitulafono ai le igoa o le ofisa loia lenei.
O Laasaga Faale-Tulafono ua Faia:
Ua uma ona faila le tagi i le High Court a Woodroffe Law, e totogi mai le pili a le ofisa. (Summary Judgement).
Ua tusi i le loia papalagi e ta‘u i ai e sese lana mea ua fai, ua ia faata‘uvalea le igoa o le ofisa loia lenei, ma tagata e ona le ofisa.
E lē gata i le loia papalagi, ae o le ulugalii lea na o i le loia papalagi, o le a suina i le High Court ona ua ta‘uvalea sese le igoa o le ofisa loia lenei.
O le auga o le ta‘ua o lenei mataupu, ina ia nofouta ai i tatou uma. E puipui i lalo o le tulafono tagata uma ma pisinisi a tagata.
E puipui igoa lelei ma galuega lelei, mai i taufaaleaga sese ma lē sa‘o e fai, e afaina ai igoa ma tulaga o tagata ma a latou pisinisi.
O lea ua sauni le tagi a le ofisa lenei i le tulafono (High Court Civil action), e faasaga i le loia papalagi na tusia mai le tusi lea na ia aveina i isi tagata, ona o le lē sa‘o, sese ma solitulafono o upu o le tusi a ia o le loia na tusia.
E lē toe foi lenei tagi, se‘i vaganā ua faatoese mai le loia papalagi ma ave se tusi a le loia papalagi lea i tagata uma sa ave i ai lana tusi muamua, e faasa‘o ana tala sese na tusia i lana tusi. E lē gata i le loia a o le client lea na aveina le tala sese, ma a lē faasa‘oina le la loia fou, ua solitulafono foi laua. O le tagi i le High Court ae le ofisa loia lenei, e faasino le isi vaega o le tagi i le ulugalii.
Fautuaga:
A e alu i se loia, o lou tiute o le tautala i le sa‘o ma ave ni pepa e faamaonia ai au faamatalaga. A sese le galuega fai e le loia, e lē na o le loia e molia i le tulafono, e molia foi ma oe.
