O le manatu lea o le tamaitai o Lasi Masipa‘u o le taitai lea o le Mafutaga o Tina Asofitu Tutoatasi i Samoa i le polokalame faagasolo ua vaaia nei le faatino i Apia i vaiaso taitasi. I Aso Gafua ma Aso Lulu uma ua iai se a‘oa‘oga ua faasoa ai lava tina o le mafutaga tele lenei i tomai o le faiva alofilima. Ua faaaogā ai le laufala e gaosi ai teufugalaau, o ato, o ili, faapea pale mo maliu e tina ua auai mai i aulotu eseese o le Ekalesia Asofitu Tutoatasi.
O le mafuaaga o lenei taumafaiga ina ia mafai ai e tina ona maua lenei foi tomai auā le sailiga o seleni a le aiga.
“O le tele o taimi o loo maua le avanoa e fesootai ai tina o le Ekalesia e ala i mafutaga faalelotu ma ua maua ai foi le faamalosiau mai i le tasi tina i le isi, ae o le manatu na faatino ai lenei a‘oa‘oga ina ia maua ai ni oloa e gaosi mai lava i aao o tina ma faatau atu i le atunuu.
O le tupe e maua e le tina e mafai ona fesoasoani ai a o mafuta ai ma ua toesea ai ma aiga ma fanau i aso o loo faatautaia ai a latou galuega taulima”.
O loo loma nei le fono tele a le Ekalesia Asofitu Tutoatasi a Samoa, ma o se tasi lea o faatasiga tele ua avea ma maketi o le faatauga o nei galuega taulima.
O le tele foi o nei galuega taulima ua faatau i luma o le maota o le Ekalesia i Taufusi i se nofoaga ua faatau ai fua o faaeleeleaga faapea meataulima a le Ekalesia. O le maota tele foi lea o le SISDAC (Samoa Independent Seventh Day Adventist) lea o loo faatautaia ai nei a‘oa‘oga ma galuega taulima i vaiaso taitasi.
E pei ona silafia o le Ekalesia o le Asofitu Tutoatasi a Samoa ua o ese mai i le Ekalesia tele o le Aso Fitu o le toe Afio mai, lea e faamautu lona laumua i Lalovaea.
O le ekalesia lea o loo i lalo lava o pulega mai i fafo ae o le SISDAC ua faauluulu lava e lana fono o taitai le faatautaiga o ana galuega faatino. Ua faaopoopo foi le numera o ana aulotu talu ona faatuina ma ua fono mai i Samoa ona lala i Amerika Samoa, Niu Sila, Ausetalia ma Amerika ma le faamoemoe lava e taitai lava e tagata Samoa lotu mo tagata Samoa lava ia o le Ekalesia.
O se tasi la lenei o ia polokalame ua o latou faatino, o le atina‘e o tina e ala i le faa‘oaina o i latou i tomai eseese e pei ona iai faiva alofilima ua faatau nei.
