E lē mafai ona vave tino le faamoemoe o le aufaasalalau ma tusitala o loo finau ai e tutoatasi le latou pitolaau i le faavaeina o se fono faatonutonu poo se media council, pe a lē tutu faatasi.
O le finagalo lea o se tasi o sui faasalalau sinia o loo faauluulu i ai le fale televise o le TV1 m le leitio faasalalau o le FM 89.1FM i Mulinuu.
O le faletua le afioga Galumalemana Faiesea Matafeo o se tasi o tamaitai tusitala na faaeaina i se faailoga a le Pasefika i galuega tau televise ma o se tasi foi ua leva tausaga o galue faatusitala i le atunuu.
O lona finagalo na faailoa i se fono faalauaitele a tusitala ma tagata faasalalau i Samoa sa taulamua ai le faalapotopotoga o le PACMAS o loo auala mai ai fesoasoani eseese mo le galuega faasalalau i le Pasefika ae faatupe i fesoasoani a le Malo o Ausetalia le AUSAID.
O lea fono faalauaitele poo se media forum sa sailia ai ni auala e mafai ona fesoasoani mai ai lea faalapotopotoga e faamaopoopo ma tuufaatasia itutino uma o faasalalauga i le atunuu, ina ia mafai ona fausia ai se pulega lelei e taitaia galuega faasalalau ma tusitala i Samoa.
Faaalia e Galumalemana Faiesea o se itu lelei ma tāua le tutu faatasi o i latou o loo umia ma pulea galuega ma auaunaga uma tau faasalalauga, auā o le a mafai ai ona ausia nisi o fuafuaga o loo faatinoina e le asosi o tusitala i le atunuu le JAWS.
O le fuafuaga a le Malo e fausia se fono faatonutonu e unaia polokalame e faaleleia ai lenei tautua, ma avea foi ma fono e faato‘ai i ai faaseā mai le atunuu ona o ni faaletonu i le galuega faatusitala ma faasalalau o loo finauina ai pea le tatau ona leai se aafiaga o le Malo i le faatūina o lea fono.
O le autū foi lea o le galuega a le PACMAS ia maua e itutino tau faasalalauga i Samoa se autasiga e mafai ai ona faataunuu lea faamoemoe. O le o ese pea o nisi itutino o faasalalauga mai le fausia o se fono faatonutonu, e tasi lava le fofo o le aapa loa o le Malo e fausia ma tofi ni tagata latou te faatautaia.
O le Aso Tofi na tea nei na faatino ai le fono faalauaitele a le PACMAS ma sui o auaunaga tau faasalalauga i le atunuu, lea na taunuu ai i le tuuina atu o se talosaga i lea faalapotopotoga mo le faatupeina o ni aoaoga mo tagata faasalalau ma tusitala, le aumaia o se tagata poto faapitoa i le tulafono e soalaupule faatasi ma sui o le JAWS le tulafono ua fausia mai e le Malo e faatū ai le fono faatonutonu poo le media council.
O le afioga i le sui Palemia, Fonotoe Nuafesili Pierre Lauofo na saunoa e tatala le fonotaga lea sa saunoa ai le sui Palemia i le tāua o le pitolaau a le autusitala ma tagata faasalalau i le atinaeina o le Malo. Peitai o lana fautuaga ia faia le galuega faasalalau ma le mataalia ina ia alofia ai faaletonu e tutupu ma tuua‘ia ai le latou galuegafai.
