O le faamatalaga lea a le taitaifono o le Iuni Lakapi a Samoa, o le alii Palemia foi lea, i le tulai mai o le malolo soo o le ‘au a le Manu Samoa taitoa 7 e pei foi ona molimauina i le Taamilosaga a le Pulega o Lakapi Faavaomalo le IRB lea sa faia i Ueligitone. O le malolo o Samoa i le semi-finals ia Kanata ua toe see ai i le tulaga ono i le faagasologa o ‘au maualuluga o lea taamilosaga a le Lalolagi.
E toatele foi le mamalu o le atunuu ua faaali le lē fiafia i le tulaga ua iai taumafaiga a le ‘au taitoafitu, peitai na ta‘ua e le alii Palemia o lea ua mae‘a ona talanoa i le faiaoga o le ‘au ma momoli i ai le finagalo o le Iuni lakapi a Samoa, e tatau lava ona faamalosi ma toe faaleleia tapenaga a le ‘au a le atunuu a o lei oo atu i isi taaloga o le IRB7s. O le faamatalaga a le alii Palemia, na manino lava le lē lava o le mānava ma le lē atoatoa o le malosi o tama o le ‘au a le atunuu i lea taamilosaga. “O le tomai i le faatinoga o le taaloga ua iai, ae o le mānava e lē o taitai lava,” o sana faamatalaga lea i tusitala. “A lē lava le penisini e leai ma se aogā o le 7,” o le faaaliga lea a le alii Palemia.
Ua faaalia e le alii faiaoga o le taitoa 7 o le taimi lenei e toaono tama o le ‘au a le Manu Samoa taitoa 7 ma o le taumafaiga o iai nei ina ia faamuamua le tulaga o iai le mafai e i latou ua manunu‘a ona taaalo i isi vae o le taamilosaga a le IRB.
O le faamatalaga a le Taitaifono o lea lava e tele le taimi e mafai ona toe agai ai i luga Samoa i lenei taamilosaga auā o lea e foufou mai le taitoa fitu a Iapani faapea ai le taitoa fitu i Hong Kong. Ua lē faamanuiaina foi taumafaiga a fanau i le Samoa A lea ua lua malolo sosoo i le taaloga ma le Western Force i Aso Faraile e lua ua tuanai. O se valaaulia na malaga ai le Samoa A i Ausetalia mo nei taaloga ona o le saili avanoa lava mo ni taamilosaga faavaomalo a o lei agai atu lea ‘au a le atunuu i taamilosaga o le Ipu o le Pasefika lea e faia i le masina fou.
