A iai Iesu i se aiga, o se aiga fiafia

E lē pei o se mafutaga a Siāsau ma Siāopo ae pei o se faatasiga a se aiga e tasi, ua taunuu ai lava le igoa o le polokalame a se tasi o faafeagaiga o loo i totonu o le mafutaga, susuga ia Pr Samuelu Afamasaga ua lauiloa ai i Brisbane, “A iai Iesu i se aiga, o se aiga fiafia”.

A o faamanatuina le aso malolo o le ANZAC Day i le Aso Lua 26 o Aperila, e tele aiga sa mafuta ma fai taumafataga faatasi i lea aso tāua, peitai na pei e tasi se aiga i le tuufaatasi a le mafutaga a le Leo o Tagata Samoa i le matagofie ma le mafanafana o le alofa faaleuso, faaletuagane, faaletamā foi ma faaletinā ma faaleuo i lea aso.

Ua leva ona taupule ma atofaina lea aso e faatasia ai aiga ma faia ai taaloga mo nai mātua matutua faapea le tupulaga talavou ma alo ma fanau. O se tasi lenei o mafutaga e tusa ma le 14 auauna paia a le Atua mai i nisi fata faitaulaga o loo mafuta atu ma faamaopoopoina lenei mafutaga. E lagona lava le tala aave i le agaga fiafia ma le lagolagosua o i latou uma faapea tupu ma tamalii, aufailauga ma le aufaitofā aemaise ao sinasina o loo mamalu ai soo se faatasiga fai.

E pei ona auina atu i nisi a tatou lipoti le galulue vaavaalua ma Iunivesite auā manuia o tagata lautele i tulaga tau a‘oa‘oga ae lē muta ai faagaioiga e faafiafiaina ai pea soo se tasi. Na amataina i le sauniga lotu, faagasolo loa taaloga ae faaiu i le taumafataga tele ma laugatogi e tauaao atu ia i latou ua lautogia aemaise lava faailoga sa faafiafiaina ai nisi o toe ulutaia o le atunuu sa auai.

Sa usuia foi le latou fono faalemasina i le afiafi o le Aso Sa e toe faamautu ai pea ma saga faamausaliina nisi laasaga fou auā le alualu i luma o le auaunaga. Talu ona faavaeina lea mafutaga ua tusa nei ua 300 tagata lesitala i totonu o le Leo o Tagata Samoa, o loo faatuputupulaia pea i le taimi nei.