O le faauuga a le Iunivesite Aoao o Aukilani i le vaiaso na tea nei, sa savalia ai e le tamaitai o Regina Leai Faaletatau le laina mo i latou sa faamanuiaina mo lea faauuga. Na mafua ona ia savalia lea laina ina ua ae ma le manumalo lona taumafai sa feagai ai i le tolu tausaga talu ai, e ala lea i faailoga tikeri e lua, o le Bachelor of Arts ma le Bachelor of Laws.
O lagona o le fiafia sa lofia ai le tamaitai aemaise ai o nai ona matua, aua o faiva o fanau o se vaega lea o le soifua galue ma soifua tapuai o matua.
O le po o le Aso Faraile na tea nei sa faatumulia ai le faleaiga o le Brigham i Hobsonville i aiga ma uo mamae sa faapea ona agai atu aua le molimauina o lenei taumafaiga ua faamanuiaina, e ala lea i se aiga sa saunia lava e matua o le tamaitai faauu ma ona uso ma nai ona tuagane.
O le tamaitai o Regina o le alo tamaitai o le tina ia Luaipouomalo Faaletatau mai le afioaga o Faleu i Manono, a o lona tuaa tamā o le afioga Savea Upolu Faaletatau mai le afioaga o Sapapalii i Savaii.
