Tanoa Tusitala, Samoa

O le faatupulaia o pisinisi e faaaogā fale o aiga (private homes), o fale aiga, beach fales, fale talimalo Samoa, o avanoa e nonofo i nuu ma afioaga, o pisinisi mo taumafataga poo catering, o pisinisi ia o loo i fafo mai i le lio o faletalimalo, ua avea nei ma tauvaga mo faletalimalo tetele i le atunuu.

O le lu’itau tele lea ua faafeagai nei ma le au fai faletalimalo, ona ua matauina o le toatele o tagata tafafao maimoa mai fafo poo turisi ua sili ia latou ona nonofo i tamai pisinisi ia ei fafo mai o le lio o faletalimalo.

O suesuega ma faamaumauga na faatautaia e le pulega o tagata tafafao maimoa mai fafo poo le Samoa Tourism, o loo manino ai, o le 76 pasene o turisi e omai i Samoa, o loo nonofo i faletalimalo.

Peitai ua matauina le faatupulaia o tagata e mananao e malaga mai ma nonofo i fale e umia taitasi poo private homes. Ua faamauina le tusa ma le 21 pasene o private homes. 

Sosoo ane lea ma fale tu matafaga 15%, o nuu ma afioaga 5% ma le isi vaega e ta’i 5% lea e aofia ai faletalimalo Samoa.

O le lu’itau numera tasi lea ua iai i pulega o faletalimalo tetele, e moni o loo tulaga muamua, ae ua fai si vave o le faatupulaia o tagata e fia nonofo i pisinisi talimalo lea ei fafo mai o le lio o faletalimalo tetele.

O le mafuaaga e lē o mafai ona faailoa mai i le suesuega, ua faailoa mai foi, o le tautua lea o loo ofo ane e pisinisi laiti ia ua sili atu nai lo le tautua o loo ofo ane e faletalimalo tetele.

I faamaumauga i tulaga tau tautua poo le service o loo numera tasi le tautua o loo faatino e pisinisi a aiga taitasi i totonu o nuu ma afioaga, e oo lava i le tulaga tau i tupe totogi o loo numera tasi ai le vaega lea.

O se tasi o pisinisi o le Uili’s Farm’s House i Vaivase, o loo latou faia le auaunaga lea o le faaaogā o fale o aiga poo private home.

O le faaaliga o fefaasoaina o turisi a Samoa, poo le Samoa Tourism Exchange lea na auai ai le pule o le Uili’s Farm’s House, lea na faaalia e le tamaitai pule, Berrylyn Petelo Leavai, o ia na amata na’o le lua potu o lona fale na faaaogā peitai ua toe faaopoopo isi potu ona o le tulaga manaomia o lana auaunaga. O ia potu uma e pei ona faaalia e Leavai, e atoatoa uma i ai mea e manaomia.

Saunoa foi Leavai, e iai se tasi o tauvaga mo faletalimalo e palota atu i ai tagata i le auaunaga aupito sili ona lelei, ma o lana tamai pisinisi na manumalo ai i le faletalimalo aupito toatele tagata na fai agai i ai faamatalaga a tagata i luga o upega tafailagi i le lelei o lana tautua.

“O le mea lena ua ou iloa ai, le manaomia o la’u pisinisi e le mamalu o le atunuu aemaise lava i tagata e malaga mai fafo.”

“O loo iai le faamoemoe e toe faaopoopo isi apartment’s o la’u pisinisi ona o le naunau lava ia ofo lelei le tautua auā le ta’uleleia o si o tatou atunuu.”

E faapena foi i le isi pisinisi na faalauiloa i le faamoemoe a le Turisi i le vaiaso na tea nei. 

Ae o le talitonuga o Leavai, afai ae tele nisi pisinisi e pei o lana pisinisi i Samoa, e mautinoa le ave i ai o le faamuamua a tagata tafafao mai fafo. 

E ta’i tausaga ma faia le faamoemoe a le Ofisa o Turisi i Samoa.