E vevesi uma autaalo mai le Pasefika i tausinioga mo le fia ausia o ni pine ae o loo vevesi solo le mafaufau o le alii o Tupuga Amo o le autaalo a le atunuu o le Atu Kuki, e saili se mama e faatino ai lona manao ua fia faaipoipo i lana manamea o se tamaitai o le latou ‘au masii o Emilene Taulu o le ‘au alovaa mai lea atunuu o le Pasefika.
O Emilene na manumalo le latou ‘au alovaa paopao i le pine apamemea. O le alii o Tupuga o le faiaoga poo le coach o le ‘au alovaa paopao mo le itupa o alii o le au masii a le Atu Kuki ma ua mafana le la faigauo ma le tamaitai o Emilene.
Na faaalia i le faamatalaga mai le ofisa o taaloga a le Pasefika 2019 na mae’a loa ona faailoa le faaaloalo a le ‘au alovaa a le vaega o alii mai lea atunuu e ala i se siva haka mo le au alovaa a tamaitai na manumalo i le pine apamemea, ae vaaia loa le agai ane o le alii o Tupuga ma tootuli i luma o lana manamea (silasila i le ata) ma tatala le pusa o loo iai le mama ma faailoa atu loa lona manao i lana manamea.
Na talia e le tamaitai le manao o lana uo ma lana faamatalaga o ia sa leai sona manatu o taaloga a le Pasefika i Samoa o le a faatino ai e lana uo lea manaoga. Fai mai o ia sa fesilisili atu lava Tupuga poo le ā le lapoa o se mama e ofi i lona lima tuu mama ma lona talitonuga o le a faatino le manao o lana uo pe a foi i fanua i le mae’a o taaloga. Ae ua faate’ia ina ua tatagi atu tulivae o si ana pele i luma o lana ‘au alovaa ma le toatele o tagata sa maimoaina le tuuga vaa alo paopao aemaise o tagata o le latou autaaalo.
“Ua leva ona ou faatali poo afea o le a faatino ai lenei laasaga tāua o se faigauo ua mafanafana ma ua militino faatasi, ae o lenei ua tupu i Samoa ma ua lē gata ina maua la’u pine apamemea ae ua faaopoopo i ai ma le mama i lo’u lima”, o le faamatalaga lea a le tamaitai o Emilene i le itulau faasalalau o taaloga a le Pasefika 2019 i luga o le Tusi o Foliga.
Na soisoi le tamaitai ma ia toe faamatala sa faapea o ia ai a faatino le manao o si ana uo faapelepele i se taimi filemu ma le paganoa, ae o lea ua te’i ua fai pupula atu i luma o tagata e toatele. O ai o ona silafia ma iloa pe toafia ni alii ma ni tamaitai o loo auai i taaloga a le Pasefika o le a foi i fanua, ae ua avea Samoa ma lana taligamalo ma nofoaga ua amata ai se faigauo o le a sau se aso mafuta faatasi i le faaipoipoga ma pine faamau ai taaloga a le Pasefika o le 2019.
