Na matuā faatumulia le malumalu o le Ekalesia Faapotopotoga Kerisiano Samoa i le afioaga o Laulii i le Aso Sa i le faamanatu ai o le atoaga o le 97 o tausaga talu ona faavae mai le lotu tuufaatasi a Laulii.
O se tasi lenei o afioaga e tele ona malumalu tapuai, ma o se faailo o le ola ma le tupu o tagata o le afioaga. O le sauniga lotu la na faatautaia i lenei tausaga na taitaia e le Fesoasoani o le Ekalesia Katoliko le susuga Lameko Ioane.
O le lotu lenei na amata mai lava i se finagalo o le tamā o le afioaga na tuumalo i le tausaga na tea nei, le Afioga Leniu Avamagalo faatasi ai ma isi matai o Laulii, ina ia faia se sauniga e tuufaatasi ai lotu eseese o le nuu.
O se lotu na manatua ai le toatele o le afioaga aemaise i aiga sa Leniu ma le aiga sa Toloa, na faapea ona fano i le faama‘i oti ma na agai lava le afioaga ma faafoi mai le toatele na aafia i lea faama‘i mai Saipipi.
Ua uma le faama‘i ae o loo manatua pea ia sui o le afioaga, ae ua faaaogā foi nei sauniga faaletausaga ina ia faamaopoopo ai le tupulaga ma faamalosia mafutaga faalelotu e toe fuatai ai soifua o le lumanai o le nuu ona o le tele o tausaga sa tulai mai ai ni vevesi ma tuua‘ia ai tupulaga o le nuu.
Na toatele foi alo o Laulii o loo nonofo i isi itu o le atunuu atoa ai atunuu i fafo na mafai lava ona auai mai i lea sauniga, ma na faaalia e le fesoasoani o le Katoliko o le a vaavaai i le tausaga fou e amata ai se faiga e mafuta ai le nuu atoa e amata mai i le Aso Faraile seia oo i le Aso Sa ma ta‘ape ai, ae ia maua e tagata uma se mafutaga e sili atu i le aso e tasi.
O se auala foi ua mafai ai ona faalauiloa faalauaitele le faitau aofai e pei ona fofogaina ai foi aulotu eseese ma faaopoopoga aemaise i latou ua tuua le mafutaga i le maliu.
O le ripoti la o lenei tausaga na lipotia ai o aulotu i totonu o Laulii
• Ekalesia Faapotopotoga Kerisiano Samoa: To‘a 6 sui na maliliu; To‘a 16 pepe fou ua fananau mai. Faitau aofai o le aulotu i lenei tausaga e to‘a 815 sui ua faamauina.
• Ekalesia Katoliko: To‘a 4 sui na maliliu; To‘a 6 pepe fou ua fananau mai. Faitau aofai o le aulotu i lenei tausaga e to‘a 465 sui ua faamauina.
• Ekalesia Aso Fitu o le toe Afio Mai (SDA): Leai se tasi ua maliu; To‘a 4 pepe fou ua fananau mai. Faitau aofai o le aulotu i lenei tausaga e to‘a 106 sui ua faamauina.
• Ekalesia Aso Fitu Tutoatasi (SISDAC): Leai se tasi ua maliu; To‘a 2 pepe fou ua fananau mai. Faitau aofai o le aulotu i lenei tausaga e to‘a 124 sui ua faamauina.
• Faapotopotoga a le Atua (Assembly of God): Leai se tasi ua maliu; To‘a 5 pepe fou ua fananau mai. Faitau aofai o le aulotu i lenei tausaga e to‘a 141.
• Lua aulotu a le Au Paia o Aso e Gata Ai: Leai se tasi ua maliu; To‘a 4 pepe fou ua fananau mai a le isi aulotu, ae to‘a 7 le isi aulotu. Faitau aofai a ia aulotu e to‘a 270 uma aulotu taitasi.
O le unaiga lava ua faamauina mai i taitai o le nuu, ina ia maua le nofo fealofani o le afioaga atoa ma ia unai le ola faatuatua ma le faakerisiano o tupulaga o le afioaga, lea ua vaaia le toatele o lona faaopoopoga i tausaga taitasi. Na faaiu lenei lotu faamanatu i se toonai tele na iai uma le afioaga.