O le aoga o Matata Eseese a Ausetalia o loo faatu i le nofoaga o iai le Iunivesite Aoao o Samoa, ua molimauina le faaopoopo pea o le numera o alii ma tamaitai ua a’oa’oina ai.
Ua lē gata foi ia i latou o loo nonofo i Samoa ua maua ai avanoa, ae ua faapea foi alii ma tamaitai mai Tonga, Fiti, Papua Niu Kini, le Atu Solomona ma le Atu Kuki, Niue, Tuvalu ma Tokelau.
O le tali lenei a Ausetalia i avanoa faigaluega na saili atu e taitai o Malo o le Pasefika le FORUM ona o le taumafaiga e fesoasoani i le faatuputupulaia o le numera o tagata e tau saili galuega i atumotu o le itulagi.
E tolu aoga faapea ua folafola Ausetalia e faatutū i atumotu o le Pasefika ma e oo mai i le taimi lenei na o Samoa ua faagasolo lelei ana a’oa’oga.
O matata lava e faigofie ona saili ai galuega a tagata e lei iai se avanoa na maua ai ni faailoga poo ni tusipasi a o laiti.
O le faaiuga la o le vaiaso na tuanai atu na faauuina ai nisi mo le fa a’i lenei o tausaga i le aoga lenei i Lepapaigalagala ma o tomai tau i le gasesega o taumafa mo faleaiga ma faletalimalo, faapea ai tomai i le faakamuta, o nisi ia o tusipasi na faamautu ma tauaao atu i se faauuga tele na faia mo alii ma tamaitai e to’a 92 o le Pasefika.
Sa iai ma se tipiloma i le tomai faa faufautua e ofo atu i tagata lautele ma o se taimi muamua foi lea ua a’oa’oina ai ia tomai faapea e ala i lea aoga maualuga.
O le Fono a Taitai o le Pasefika i le tusa ma le lima tausaga talu ai na laga ai le moomia o le aapa mai o ia malo tetele o le Itulagi i le faafitauli lenei o le faatuputupulaia pea o le numera o tagata o le Pasefika o tau saili galuega ma ua agai atu i Niu Sila ma Ausetalia e tau saili ai avanoa nei.
O le tali mai a Niu Sila lea ua iai galuega ofo mai faavaitaimi i ai latou e mafai ona galulue i faatoaga fualaau’aina ma fualaau fai supo. Manatua foi e ese lea mai i avanoa o le Quota lea ua maua ai lava galuega ma nofomau o le toatele mai i Samoa nei.
O le tali a Ausetalia na amata lava i aoga nei ae ua na o Fiti, Papua Niu Kini, Nauru ma Kiripati na faapea ona ofo i ai e Ausetalia avanoa e pei o avanoa na ofo mai e Niu Sila ia Samoa, Niue ma Tonga o galuega faavaitaimi ia.
O le tausaga la lenei ua mae’a le fono a Taitai o le Pasefika lea na usuia i Niu Sila ae ua ofo mai loa ma avanoa faigaluega faavaitaimi mai i Ausetalia mo atunuu e pei o Samoa.
O se isi lea avanoa ua toatele faalapotopotoga ma aumalaga a nuu ua talanoaina nei le agai e talosaga i ai ma o le ofisa lava ua patino le faatuina mo nei avanoa faavaitaimi, i totonu o le Matagaluega a le Palemia, lea o le a faatautaia ia avanoa, lea ua ta’ua le ono amata i le tausaga fou ona malaga ese ai le mamalu o le atunuu e faamanuiaina ai ma e i le va o le ono (6) masina i le 12 masina le umi o ia avanoa faigaluega.
Ae mo aoga maualuluga e pei o le aoga lea e i Samoa nei, e iai le eseesega ma Matata Eseese o loo i Samoa nei, auā o tusipasi ua faauuina ai le to’a 92 e pei ona vaaia i le vaiaso na tea nei, o loo tatala foi e Ausetalia le avanoa, e mafai ona saili ai galuega a i latou ua faamanuiaina i Ausetalia pe afai e iai se manaoga e malaga ma saili galuega ai i lea atunuu.
O le toatele la o i latou ua faauuina i le vaiaso na tea nei o tagata ua fai si leva o galulue i isi galuega ae na tau saili lava ni tusipasi auā le unaia o totogi ma faamanuiaga.
O le faalautele foi o le atina’e o tagata tafafao mai i Samoa ua mautinoa ai le tele o avanoa faigaluega i ituaiga matata ma tomai nei e pei o le gasesega o taumafa ma isi nafa o taligamalo.
O galuega kamuta o loo toatele foi o loo galulue ai e aunoa ma ni faamaoniga o ia ituaiga tomai ma ua toatele nei ua mafai ona maua ia faamaoniga e ala i le aoga lenei o matata eseese a Ausetalia.
Ua faaalia le malosi o le lagolagosua a lea Malo i taumafaiga a le aoga lenei ua faaigoaina o le APTC ma o se taimi foi o lenei tausaga o le a faauu ai le toatele mai Fiti ma Papua Niu Kini aemaise le Atu Solomona o loo a’oa’oina i le tomai faaseila, faainisinia o vaa ma isi tomai eseese ua a’oa’oina i le APTC.
Na faatumulia le Maota o Tupulaga Talavou a le EFKS i Sogi i le molimauina o le faaiuga o taumafaiga a i latou ua faauuina ma le faamoemoe o le a telē se suiga o le soifua galue o i latou nei, pe e faaauau i atumotu e omai ai poo le agai foi i Ausetalia ona o lea ua ausia lea foi laasaga fou i le soifua suesue ma le aoaoina.
