Faatāua le Ola, FLO, ma lana kemupeni faaletausaga mo le 2018, na faia ai le Walk for Life, poo le Savali mo le Ola, lea na molimauina i le taulaga i Apia i le taeaopo o le Aso Toonai na tea nei.
O le savali faapitoa o le tausaga lenei, na aloaia ai le soifua galue ma le lagolago a le tamā ia Joachim Joe Keil i totonu o le faalapotopotoga o le Faatāua le Ola poo le FLO i Samoa.
Na amata mai lenei sauniga faaletausaga i le maota o turisi i le eleleefou. Sa taimua ai le faaili pu a leoleo ma taamilo ane i Maluafou agai ane i Taufusi ma faasa’o mai i le uati i Apia ma toe foi atu i le maota o Turisi.
Na taimua i le savali lana afioga i le Tui Atua Tupua Tamasese Efi, faatasi ai ma le taitaifono o le FLO, le Afioga a Tuatagaloa Joe Annandale ma le mamalu o le atunuu na latou lagolagoina lenei faamoemoe tāua. O faamanuiaga ma faafetai, o faafiafiaga pupuu mai le pulega o le FLO ma le autalavou.
Na ave foi le avanoa i le faletua o le Susuga Joe Keil, Celine Keil ma ia faafetaia ai le pulega o le FLO i le galuega tāua, ma le faaauauina o lenei tautua, ae o le amanaia ai foi o Joe i le faamoemoe o le 2018.
O le agaga lava foi lea e tasi, na talanoa iai lona alo, le alii o Nathan Keil, i lona lototele na talanoa ai ma le to’a mo se sina taimi puupuu, e faafetaia le pulega a le FLO ma lona aiga mo lona tuaa. O le malelega a lana Afioga i le Tui Atua, na tele ina faaperetania e faatatau lava i le taeao, atoa ai ma lana faafetai ma le faamalosiau.
Ua avea ai foi le faatāua i le talavou, pei ona saunoa le Susuga Papalii Carol Ah Chong, “O le 90 pasene oi latou o aafia i le faafitauli e pei ona maua i faamaumauga a le FLO, o le taumafai e pule i le soifua ma le pule i le soifua, o tupulaga talavou.”
O tapenaga foi o le aso faamanatu lenei, mo le Faatāua le Ola, ua mafuli atu ai le faatāua i tupulaga talavou o Samoa. Ua latou faatino ai talafatu e fua i pesepesega o aso nei, e aofia ai le pese, “e lē o a’u o se faitagamea poo se fuluulo….” E lē na’o faafitauli o le pule i le ola na tata’i iai lagona o le mamalu o le atunuu i lea taeao.
Ae ua aofia atu ai ma sauaga i totonu o aiga. Na atagia ai i le faatinoga o le pese o ta’ua i luga, le ogaoga foi o sauaga o lagona e faatino e tina poo tamaitai faasaga i latou tane po alii. E ese mai sauaga e faia e alii faasaga i tamaitai. O le faaiuga o le vaiaso lea na teu ai le tino maliu o se tamaitai, o se ta’ita’i ae o se tina ua lauiloa foi lana tautua i le malo ma le atunuu, ae o lona nuu ma lona aiga, le faletua ia Sa’u Justina Sa’u.
O lona maliu na lagona e le toatele tiga ona o tala ave, o foliga vaaia ae o molimau, o sauaga na feagai ma ia a’o soifua. Ua uma le suesuega faafoma’i i le mafuaaga o lona maliu, ma o loo tālia ai le taimi e faalauiloa faalauaitele mai ai.
Ae o le auala na faatino ai tala faatino e to va ai le polokalame o lea aso, e fanau talavou o galulue faatasi ai nei ma le FLO, na molimauina ai loimata maligi i se vaega o le aumaimoa.
E lei faavaivai lava foi le savaliga ma le tuleiga o nofoa a fanau e iai manaoga tumau, i lea taeao. O le aoga a le Fia Malamalama, ma le Loto Taumafai ma o latou faiaoga, na lagona uma le malolosi e savali i le taulaga, ina ua amata mea le faaili a leoleo.
Na ta’ape lena aso faamanatu ma faalumaga o lagona lelei ma le saoloto, i le uma ane ai o le lotu faafetai ma le taumafataga o le taeao.
O le savali mo le Faatāua o le Ola poo lou soifua, o se sauniga e ta’i tausaga ma faia e le pulega o le FLO, e valaaulia uma ai le atunuu e auai.
